Luglaa 37
37
Joosɛf deeza wia
1Jekɔb faa haa so Keenan hɛri, bɔr la u mɛɛ n faa soge mɔɔ la.
2Jekɔb ni u diahina wiarɛ keŋ. Joosɛf n wa di binni fidaaniidaanɛɛ, u ni u mɛɛ haana Bilha ni Zilpa biibaala ɔɔ faa ra nɔɔni u mɛɛ peeza. U ɔɔ faa ra bagli wichɔgaa la u kpɛɛnna la n ɔɔ ra ɛɛ, di ra tɛɛ u mɛɛ.
3Jekɔb faa nɔŋŋuubuu di kaali u kpɛɛnna la maa, dikuu uŋ faa zɛŋŋɛ ka haa luluu la wia. Denii u kpa tagtajannanii bɛl di tɛu.
4U kpɛɛnna n nawɛɛ lugɔ ba mɛɛ nɔŋŋuubuu di kaali baa la, ba jaa hauh werge maa. Ba waa kaa ra ŋɔ wiŋɔnanaa di ra tɛu.
5Denii Joosɛf deezi, di baglaa tɛɛ u kpɛɛnna. Guŋ faa gil ba hauh werge maa di jaa. 6U faa ŋɔ ba benii, “Ií ra nuu. 7N deeza hiŋ biini, n na yaa n du koo di ra vɔɔzi mia. Anla miŋ vɔɔzɛɛ la izi di chi chiŋ, ii hor vɔɔzaa la chaali di wa baruu, di ra tognuu.”#Lug 42:6; 50:18
8Denii u kpɛɛnna la ŋɔ, “I ra fɛu lugɔ hinuu niŋ ŋmɛnɛ wa ɛɛ yaa kooriaa?” Ba faa waa kaa ra nyiŋŋi u wia tama maa, dikuu u deeza hiŋ ani gunla uŋ ŋɔwɛɛ la wia.
9Denii a hɔl bɛl u kaa deezi, di ŋɔ u kpɛɛnna la be, “Ií kaa nuu n deeza naa. Wiizi ni baagu ani chinchiŋwilaa fidikpaŋ tognoore di ra jaamiŋ!”
10U faa bagli u deeza hiŋ waarɛ di tɛɛ u mɛɛ gba. U mɛɛ hau u ni ka pɛɛzuu, “Beedee gunnɛi? I ra bagluu lugɔ n ni i maa ani i kpɛɛnna daŋ ŋmɛnɛ wa tognuu di ra jaamiii?” 11Joosɛf wia faa ra wii u kpɛɛnna la ni werge maa, ka u mɛɛ faa kpaa du u biini, ka ra binni gunla n niŋ wa ɛɛ.
Joosɛf kpɛɛnna n yoou wia
12A hɔl bɛl, Joosɛf kpɛɛnna la Sɛkɛm bá ga nɔɔni ba mɛɛ peeza. 13Denii Jekɔb ŋɔ Joosɛf be, “I zummɔ lugɔ i kpɛɛnna du Sɛkɛm di ra nɔɔni peeza. N daŋ humii ba be.”
Joosɛf ŋɔ, “N daŋ la.”
14U mɛɛ ŋɔ, “La di ga binni ba ni a peeza di na gunla baŋ duwɛɛ, ka bir ba di wa ŋɔ n be.” Denii u mɛɛ humuu di lii Hɛbrɔn Waluu biini. Joosɛf n ga hel Sɛkɛm, 15baal bɛl nau di u vollo ra juuri, u pɛɛzuu, “Beedee i ra nyiŋŋei?”
16Joosɛf ŋɔ, “N kpɛɛnnaa n na nyiŋŋi. I zum bɔr la baŋ duwɛɛ?”
17A baal ŋɔ, “Ba waa kaa hoo ɛŋ. N nuuwɔ baŋ ŋɔwɛɛ lugɔ ba ra la Dɔtannɛ.” Denii Joosɛf faa dau ba luge, di ga na baa Dɔtan.
18Joosɛf kpɛɛnna la n wa nau di u haa du bɔɔnɛɛ di ra ba, ba ta jina lugɔ bá kpuu.
19Ba ŋɔ dɔŋa be, “Deeza hiŋ labuu ra ba la. 20Ií gil ya kpuu, di kpau ha kɔlɔnzi naa bɛl biini, ka la ga ŋɔ yaa mɛɛ be lugɔ sechɔgii bɛllɛ lawuu di. Ka ya jaa na gunla u deeza la wia n niŋ wa bir.”
21Rubin n wa nuu guŋ, u ra nyiŋŋi u lɛɛu, di ŋɔ, “Ií gilɛɛ gil ya kpuu.
22Ií gil ya lawuu ha kɔlɔŋ naa biini, ka gilɛɛ waa kpuu.” Rubin faa ŋɔ gunnɛ ú vii wer lɛɛu ba be, di kpogluu ga tɛɛ u mɛɛ. 23Joosɛf n wa hel ba be, ba lawuu manaŋ, di lau u tagtajannanii la u mɛɛ n tɛu la di wir, 24ka kpau ha a kɔlɔŋ biini. A guŋ saŋa di nii waa kaa hoo de.
25Ban tau du de la, ba jaa so di ra di. Ba wa ŋɔ ba binni di nyugmazii gaa ba. Ismɛl kɔkɔɔzaa faa la Giliad di ga yau dɔzi tiuzaa kuna, nuuri aŋhina ani mɛr,#37:25 Kunsɔɔhrisuma aŋhinaa ba ra yir mɛr. di ra la Ijip.
26Denii Juda ŋɔ u dɔŋahina la be, “Di yaa kpu yaa niwee hiŋ di suah, beedee tɔnaa ya nai? 27Awia, ií gil ya lizuu di yoo tɛɛ Ismɛl kɔkɔɔza naa. Ií gilɛɛ gil ya lɛɛ u haahkɛ. U ɛɛ ya niweere.” Denii u lulla la maa sɛɛ lugɔ ba ɛɛ guŋ. 28Midian hina kɔkɔɔza la n wa hel ba be, ba lizuu di yoo saliŋhuŋŋa kebisau tokko di tɛɛ baa, ba jaa kpogluu kaali Ijip.
29Rubin n bittɛ la a kɔlɔŋ ka wɔɔ ga nawɛɛ la, a guŋ faa ɛɛu biinichɔg werge maa, u lau u tagta yeŋ piili. 30Denii u faa bir la u niuna la be, di ga ŋɔ, “A bie waa kaa hoo de. Ɛrɛɛ ń jaa ɛɛ naanɛi?”
31Denii Joosɛf kpɛɛnna na manaŋ di lau buuŋ kpu, di kpa u chal fɔg Joosɛf tagtajannanii la, 32ka jaa kpau di la ba mɛɛ be, di ga ŋɔ, “Pir biinii yaa na tagtajaŋ naa. Pessuu na, di Joosɛf tagtaarɛ gɛɛ waa lɛiyɛi?”
33Ba mɛɛ n wa nau la, u zumuu manaŋ, di ŋɔ, “Wibii maa, n biibaal tagtajannanii labuu. Sechɔgii bɛllɛ lau Joosɛf di kpuu la. U chuuri Joosɛf maanii!”
34Denii Jekɔb lau u laala piili, ka kpa gbɔglɔŋ tagta laali, di faa wii Joosɛf lee hɔpizikpila maa. 35Haali u biizi maa ɔɔ ɛɛ ania ba tig u bampirii, ka waa wette u suuh u wia, di ɔɔ ŋɔ, “N daŋ wii n biibaal naa lee guŋŋ di ra ba n siu.” Awia, u haa vɛɛ di ra wii u biibaal hiŋ lee.
36Annii naa maa n na ɛɛ la, di Midian hina kɔkɔɔza la ga yoo Joosɛf tɛɛ Ijip koori huŋhunna nabɔma bɛl banna yir Pɔtifa. Pɔtifa faa ɛɛ Ijip kooridia binna nabɔmaa.
Currently Selected:
Luglaa 37: vag
Highlight
Copy
Compare
Share
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
