Чөлде 36
36
36-нҗы бап
Дурмуша чыкан гызларың мүлки
1Макырың оглы, Манашаның агтыгы, Юсубың човлугы болан Гилгадың несиллериниң уругбашылары өңе чыкып, Мусаның, ёлбашчыларың ве ысрайыл тирелериниң уругбашыларының өңүнде шейле дийдилер: 2«Реб юрды биҗе атып, мүлк хөкмүнде ысрайыллара пайлап бер дийип, агамыз Муса эмр этди. Доганымыз Селопхадың мүлкүни онуң гызларына бермеги хем Реб агамыза буюрды. 3Эгер Селопхадың гызлары Ысрайылың башга тиресинден боланлара дурмуша чыксалар, онда оларың мүлки бизиң мүлкүмизден айрылып, баран әрлериниң тиресине гошулар. Шейдип, биҗеде бизиң мүлк пайымыз кемелер. 4Ысрайылларың байрам йылы геленде болса, гызларың мүлки әрлериниң тиресиниң мүлкүне гошулар. Шейлеликде, оларың мүлки бизиң тирәмизиң мүлкүнден алнар».
5Онсоң Муса Реббиң эмри боюнча ысрайыллара шейле буюрды: «Юсубың тиресиниң несиллериниң диййәни догрудыр. 6Селопхадың гызлары хакда Реб шейле дийди: „Олар ислән адамсына дурмуша чыкып билерлер, йөне оларың барҗак кишилери өз тирелеринден болсун. 7Ысрайылларың мүлки бир тиреден башга бир тирә гечмели дәлдир. Әхли ысрайыллар өз тирелериниң мүлкүне эелик этсинлер. 8Ислендик ысрайыл тиресинден мүлк алан гыз, өз тиресинден болан кишә дурмуша чыксын. Шонда хер бир ысрайыллы өз аталарының мүлкүне мүдимилик эелик эдип билер. 9Хич бир мүлк бир тиреден башга бир тирә гечмели дәлдир. Ысрайыл тирелериниң хер бири өз мүлкүне эелик этсин“».
10Селопхадың гызлары Реббиң Муса буйрушы ялы хем этдилер. 11Онуң гызлары Махла, Тирса, Хогла, Милка ве Нога өз какасының доганларының огулларына дурмуша чыкдылар. 12Олар Юсубың оглы Манашаның несиллериниң уругларындан болан кишилере дурмуша чыкдылар. Шейдип, оларың мүлки өз аталарының тиресинде галды.
13Иордан дерясының боюнда, Ерихоның гаршысында ерлешйән Мовап дүзлүгинде Реббиң Муса аркалы ысрайыллара берен парзлардыр хөкүмлери шулардан ыбаратды.
Currently Selected:
Чөлде 36: TukCyr16
Highlight
Copy
Compare
Share
Want to have your highlights saved across all your devices? Sign up or sign in
© Мукаддес Китап Терҗиме Институты, 2016
