Мүсүрден чыкыш 30

30-нҗы бап

Якымлы ыслы түтетги үчин сыпа

1Якымлы ыслы түтетги үчин акация агаҗындан сыпа яса. 2Онуң узынлыгы-да, ини-де бир тирсек болуп, ол дөртбурч болсун. Онуң бейиклиги ики тирсек болуп, чыкып дуран бурчлары билен биле тутуш бир битеви эдилсин. 3Онуң депесини, әхли тарапларыны ве бурчларыны сап алтына гапла. Онуң даш-төверегине алтындан җәхек чек. 4Онуң үчин алтындан ики саны халка яса ве олары җәхегиң ашагындан бири-бирине гаршы эдип, ики тарапына дак. Сыпаны гөтерип гидер ялы, ол халкалардан сырыклар гечир. 5Сырыклары акация агаҗындан яса ве олары алтына гапла. 6Сыпаны Әхт сандыгының янындан асылгы тутының өңүнде ерлешдир. Оны Әхт сандыгының гапагының догрусында гой, чүнки Мен ол ерде сениң билен душушарын. 7Хер гүн ирден Харун чыраны арассалап ягламага геленде, бу сыпаның үстүнде якымлы ыслы түтетги яксын. 8Ол агшам чыраны якмага геленде-де шейле этсин. Сиз бу якымлы ыслы түтетгини Мениң хузурымда хемише несилме-несил этмелисиңиз. 9Бу сыпада башга хич хили түтетги якылмасын, якма гурбанлыгы я-да галла садакасы берилмесин ве онуң үстүне ичги садакасы гуюлмасын. 10Йылда бир гезек Харун онуң бурчларында гүнәден сапланма гурбанлыгыны берсин. Гүнәден сапланмак үчин өлдүрилен малың ганыны дөкүп, йылда бир гезек несиллербойы гүнә гурбанлыгыны бер. Сыпа Реббе багыш эдилендир».

Мукаддес чадыр үчин салгыт

11Реб Муса шейле дийди: 12«Ысрайылларың хасабыны алмак үчин, илат санавыны гечир. Хасаба алнанларың хеммеси өз җаны үчин Маңа төлег төлесин. Шонда төлег төләп хасаба алнан адамларың башына хич хили бела инмез. 13Ине, хасаба алнанларың төлемели зады: мукаддес өйүң ресми өлчеги боюнча ярым шекел күмүш. Бир шекел ики мысгала#30:13 Ики мысгал – еврейче йигрими гера. Бу такм. 10 гр деңдир. деңдир. Маңа садака хөкмүнде ярым шекел күмүш берсинлер. 14Хасаба алнанларың яшы йигрими ве ондан ёкары болан адамларың хер бири шу мукдарда Маңа садака берсин. 15Баям, гарыбам шол ярым шекели төлесин. Төлег шундан аз-да болмасын, көп-де. Сиз шу садаканы Маңа берениңизде, гүнәңизден сапланарсыңыз. 16Ысрайылларың гүнәлеринден сапланмагы үчин, олардан пул йыгна ве оны Маңа йүз тутулян чадырың хызматы үчин сарп эт. Җаны үчин төлейән төлеги Мениң хузурымда ысрайыллара ятлама болар».

Бүрүнч леген

17Реб Муса ене-де шейле дийди: 18«Ювунмак үчин бүрүнчден леген яса. Онуң сүтүни хем бүрүнчден болсун. Оны Маңа йүз тутулян чадыр билен гурбанлык сыпасының ортасында гой ве ичине сув гуй. 19Шол сув билен Харун ве онуң огуллары эллерини ве аякларыны ювсунлар. 20Олар Маңа йүз тутулян чадыра гиренлеринде я-да гурбанлык сыпасында от үсти билен Маңа гурбанлык бермәге геленлеринде, шол сув билен ювунсынлар. Шонда олар өлмезлер. 21Олар шол сув билен эллерини, аякларыны ювсунлар, шонда олар өлмезлер. Бу Харун үчин ве онуң несиллери үчин аркама-арка гайталанян эбедилик дүзгүн болсун».

Месх ягы

22Реб Муса шейле дийди: 23«Ине, шу иң говы хошбой ыслы затлары ал: ярым пут#30:23 Ярым пут – еврейче бәш йүз шекел. Бу такм. 6 кг деңдир. мукдарда сувук мүр, чәръек пут#30:23 Чәръек пут – еврейче ики йүз элли шекел. Бу такм. 3 кг деңдир. мукдарда якымлы ыслы далчын ве ене-де чәръек пут мукдарда хошбой ыслы гамыш, 24ярым пут мукдарда хинди далчыныны ал. Буларың хеммеси мукаддес өйүң ресми өлчеги билен өлченсин ве дөрт күйзе#30:24 Дөрт күйзе – еврейче бир хин. Бу такм. 4 литре деңдир. зейтун ягыны ал. 25Уссатлык билен гарып, булардан месх ягыны яса. Бу мукаддес месх ягыдыр. 26-28Маңа йүз тутулян чадыра, Әхт сандыгына, хантагта ве онуң әхли энҗамларына, чырадана ве онуң әхли энҗамларына, түтетги сыпасына, якма гурбанлык сыпасына ве онуң әхли энҗамларына, легене ве онуң сүтүнине шу ягы сепеле. 29Олары мукаддес эт, шонда олар иң мукаддес затлар болар. Олара галташан хем мукаддес болар. 30Харуны ве онуң огулларыны руханыларым болуп хызмат этмеклери үчин, башларына яг гуюп, Маңа багыш эт. 31Ысрайыллара айт: Бу сизиң үстүңиз билен несилме-несил гечйән Мениң мукаддес месх ягымдыр. 32Бу месх ягыны адаты бедениңизе гуймак үчин уланмалы дәлдир, башга хер хили затлар билен гарышдырмалы дәлдир. Бу мукаддесдир ве сизиң үчин хем мукаддес болмалыдыр. 33Руханыдан башга кимде-ким шонуң ялы атыр ясаса ве бириниң үстүне гуйса, өз халкының арасындан ковлуп чыкарылар».

Түтетги

34Реб Муса шейле дийди: «Хошбой ыслы затлары: бальзамы, ониканы, галбанумы ве якымлы ыслы түтетгини ал. (Буларың хеммеси дең мөчберде болсун.) 35Атыр ясайҗы гарып, олардан хошбой ыслы түтетги яса. Оңа дуз хем гош, ол сап ве мукаддес болсун. 36Онуң бир бөлегини күлкеләп, сизиң билен душушян ерим болан Әхт сандыгының өңүндәки Маңа йүз тутулян чадырда гой. Бу сизиң үчин иң мукаддес болар. 37Шу усул билен өзүңиз үчин түтетги тайярламаң. Муны Мен-Реббе багыш эдилен хасаплаң. 38Ким муны атыр хөкмүнде уланса, өз халкының арасындан ковлуп чыкарылар».

Currently Selected:

Мүсүрден чыкыш 30: TukCyr16

Highlight

Copy

Compare