པེ་ཏྲོ་དང་པོ། 4
4
ལེའུ་བཞི༌པ།
དཀོན་མཆོག་གི་དོན་དུ་གསོན་པོར་འཚོ་བའི་སྐོར།
1དེ་བས་ན་སྐྱབས་མགོན་མཱ་ཤི་ཀས་སྐུ་ལུས་ཀྱི་ཆ་ནས་སྡུག་བསྔལ་མྱངས༌པས། ཁྱོད་ཅག་གིས་ཀྱང་བློ་སྟོབས་དེ་ལྟ་བུའི་གོ་མཚོན་སྤྲ་བར་བྱ་འོས་སོ།། ཅིའི་ཕྱིར་ཞེ་ན། ལུས་སྟེང་ནས་སྡུག་བསྔལ་མྱངས་པ་རྣམས་ནི་སྡིག་པ་དང་ཁ་བྲལ་བའི་ཕྱིར༌ཡིན། 2ཁྱོད་རྣམས་ལ་སེམས་དེ་ལྟ་བུ་ལྡན་ན། དེང་ཕྱིན་མིའི་འདོད་ཆགས་ཀྱི་རྗེས་སུ་མི་འབྲང་བར། དཀོན་མཆོག་གི་ཐུགས་དགོངས་བཞིན་འཇིག་རྟེན་འདིའི་ཚེ་སྨད་ཀྱི་དུས་འདའ་དགོས་སོ།། 3ཅིའི་ཕྱིར་ཞེ་ན། སྔོན་ཆད་ཁྱོད་རྣམས་ཀྱིས་ཕྱི་ཕྱོགས་པའི་འདོད་བློ་བཞིན་དུ་ལོག་གཡེམ་དང་། འདོད༌ངན། ཆང་རག་གིས་བཟི་བ། ཟས་བག་མེད་དུ་ཟ་བ། བཟའ་བཏུང་བག་མེད་ལ་ཞུགས་པར་མ༌ཟད། སྐུ་འདྲར་བརྟེན་པའི་སྐྱུག་བྲོ་བའི་དོན་ལ་སོགས་པའི་དུས་ཡུན་ལོངས་པའི་ཕྱིར་ཡིན། 4མི་དེ་དག་གིས་ཁྱོད་རྣམས་དོན་འདིའི་ཆ་ནས་ཁོ་རྣམས་དང་མཉམ་དུ་བག་མེད་ལང་ཤོར་གྱི་ལས་ལ་མི་ཞུགས་པ་མཐོང་སྟེ། ཧ་ལས་ཤིང་ཁྱོད་ཅག་ལ་འཕྱ་དམོད་བྱེད་མོད། 5འོན་ཀྱང་། དེ་རྣམས་ཀྱིས་ངེས་པར་གསོན་པོ་དང་འདས་པོ་ཀུན་ལ་ལེགས་ཉེས་འབྱེད་མཁན་ཁོང་ཉིད་ལ་རྩིས་སྤྲོད་དགོས་སོ།། 6དེའི་ཕྱིར། འདས་པོ་རྣམས་ལའང་འཕྲིན་བཟང་བསྒྲགས་ཤིང་། དེ་ནི་མིའི་ཚུལ་བཞིན་དུ་དེ་དག་གི་ལུས་གཟུགས་ལ་ཉེས་ཆད་འཕོག་པར་འགྱུར་ཡང་། དེ་རྣམས་ཀྱི་སེམས་ཉིད་ནི་དཀོན་མཆོག་ལ་བརྟེན་ནས་འཚོ་བའི་ཕྱིར་རོ།།
7དངོས་པོ་ཐམས་ཅད་ཀྱི་མཐའ་མཇུག་སླེབས་ལ་ཉེ་བས། ཁྱོད་ཅག་གིས་གཟབ་ནན་ངང་རང་ཉིད་བསྲུང་བ་དང་། སྨོན་ལམ་འདེབས་པར་གཟབ་གཟབ་བྱ་དགོས་སོ།། 8དེ་ལས་ཀྱང་གལ་ཆེ་བ་ནི་ཕན་ཚུན་ལ་དངོས་གནས་བྱམས་དགོས་པ་དེ་ཡིན། ཅིའི་ཕྱིར་ཞེ་ན། བྱམས་པས་སྡིག་པ་མང་པོ་འགེབས་ཐུབ་པའི་ཕྱིར༌རོ།། 9ཁྱོད་རྣམས་ཀྱིས་ཕན་ཚུན་ལ་སྣེ་ལེན་བཟང་པོ་བྱེད་པ་ལས་སྡུག་ཡུས་འདོན༌པར་མི་བྱའོ།། 10མི་རེ་རེར་གནང་སྦྱིན་གང་ཞིག་ཐོབ་པ་ལྟར་ཕན་ཚུན་ལ་ཞབས་ཕྱི་བསྒྲུབས༌ཏེ། དཀོན་མཆོག་གི་ཐུགས་རྗེ་སྣ་ཚོགས་ཀྱི་གཉེར་པ་ལེགས་པོ་ཞིག་བྱ་དགོས་སོ།། 11སུ་ཞིག་ཆོས་གསུང་མཁན་ཡིན་ན། དཀོན་མཆོག་གི་བཀའ་བཞིན་དུ་གསུང་བ༌དང༌། སུ་ཞིག་ཞབས་ཕྱི་སྒྲུབ་མཁན་ཡིན་ན། དཀོན་མཆོག་གིས་གནང་བའི་མཐུ་སྟོབས་བཞིན་དུ་བསྒྲུབ༌དགོས་སོ།། དེ་ནི་དོན་ཐམས་ཅད་ལས་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་བསྟོད་བསྔགས་འཐོབ་པའི་ཕྱིར༌ཡིན། མ་གཞི་གཟི་བརྗིད་དང་མངའ་ཐང་ཐམས་ཅད་ནམ་ཡང་ཁོང་ལ་དབང་ངོ་། །ཨ༌མེན།
མཱ་ཤི་ཀ་པ་ཡིན་པའི་ཕྱིར་སྡུག་བསྔལ་མྱོང་བའི༌སྐོར།
12སྙིང་ནས་བརྩེ་བའི་སྤུན་ཟླ༌རྣམས། ཁྱོད་རྣམས་ལ་ཚོད་བགམ་པའི་ཕྱིར་མེ་ལྟ་བུའི་སྡུག་བསྔལ་དང་འཕྲད་པའི་དུས་སུ། དེ་ནི་རང་ཉིད་ལ་ཧ་ལས་པའི་དོན་ཞིག་བྱུང་བར་སྙམ་ཞིང་ཡ་མཚན་དུ་མ་འདོད་ཅིག 13སྐྱབས་མགོན་མཱ་ཤི་ཀའི་གཟི་བརྗིད་མངོན་པའི་དུས་སུ། ཁྱོད་རྣམས་ཀྱང་ཤིན་ཏུ་དགའ་ཞིང་སྤྲོ་བའི་ཕྱིར། ད་ལྟ་ཁྱོད་ཅག་གིས་སྐྱབས་མགོན་མཱ་ཤི་ཀའི་སྡུག་བསྔལ་མཉམ་དུ་འཁུར་བས་དགའ་ཞིང་སྤྲོ་བར༌གྱིས། 14ཁྱོད་རྣམས་ཀྱིས་སྐྱབས་མགོན་མཱ་ཤི་ཀའི་མཚན་གྱི་ཆེད་དུ་སྡིགས་དམོད་མྱངས་ན་བདེའོ། །ཅིའི་ཕྱིར་ཞེ་ན། དཀོན་མཆོག་གི་གཟི་བརྗིད་དང་ལྡན་པའི་ཐུགས་ཉིད་ནི་རྟག་ཏུ་ཁྱོད་རྣམས་ཀྱི་སྟེང་དུ་བཞུགས་པའི་ཕྱིར་རོ།། 15ཁྱོད་ཅག་གི་ཁྲོད་དུ་མི་གསོད་པ་དང་། རྐུ་བྱེད་པ། ལས་ངན་པ་བྱེད་པ། གཞན་དོན་ལ་ཐེ་གཏོགས་བྱེད་པ་བཅས་ཀྱི་རྐྱེན་གྱིས་སྡུག་བསྔལ་མྱོང་མཁན་ཡོད་མི་འོས་སོ།། 16འོན་ཀྱང་མཱ་ཤི་ཀ་པ་ཡིན་པའི་རྐྱེན་གྱིས་སྡུག་བསྔལ་མྱངས་ན་ངོ་གནོང༌བར་མི་བྱ་ཞིང་། མཚན་དེའི་རྐྱེན་གྱིས་དཀོན་མཆོག་ལ་བསྟོད་བསྔགས་འབུལ་དགོས་སོ།། 17ཅིའི་ཕྱིར་ཞེ་ན། ད་ལྟ་དུས་དེ་སླེབས་ཟིན་ཅིང་། ལེགས་ཉེས་ཀྱི་ཁྲིམས་ཐག་གཅོད་པ་ནི་དཀོན་མཆོག་གི་ཁྱིམ་རྒྱུད་ནས་འགོ་རྩོམ༌པའི་ཕྱིར་ཡིན། གལ་ཏེ། བདག་ཅག་ནས་འགོ་རྩོམ་པ་ཡིན་ན། དཀོན་མཆོག་གི་འཕྲིན་བཟང་ལ་མི་ཉན་པ་རྣམས་ཀྱི་མཇུག་འབྲས་ནི་ཅི་ལྟ་བུ་ཞིག་ཡིན༌ནམ། 18དེ་ལ་ཇི་སྐད༌དུ།
གཞུང་དྲང་མི་རྣམས་ཐར་བ་ཙམ་ཡིན༌ན།།
དད་པ་མེད་པའི་མི་དང་སྡིག་ཅན༌ལ།།
ལངས་ནས་སྡོད་ས་ཙམ་ཡང་གང་དུ་ཡོད།།
ཅེས༌གསུངས་པའོ།།
19དེའི༌ཕྱིར། དཀོན་མཆོག་གི་ཐུགས་དགོངས་བཞིན་སྡུག་བསྔལ་མྱོང་བའི་མི་རྣམས་ཀྱིས་བློ་སེམས་རྩེ་གཅིག་གིས་ལས་བཟང་པོ་བྱེད་དགོས་ཤིང༌། རང་གི་རྣམ་ཤེས་ནི་ཡིད་རྟོན་རུང་བའི་མཛད་པོ་དཀོན་མཆོག་ལ་བཅོལ་དགོས༌སོ།།
Currently Selected:
པེ་ཏྲོ་དང་པོ། 4: NTB
Highlight
Share
Copy
Want to have your highlights saved across all your devices? Sign up or sign in
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.