Tyai Á̱zanson 10

A̱ta̱m Tswa A̱gwaza Ba̱ng ma̱ A̱da̱dei Ta̱ka̱da nang á̱ Kut di̱n Shan a̱ni

1N si̱ bu ndi a̱nga̱ri̱m a̱ta̱m tswa A̱gwaza a̱ghyang neet Ma A̱gwaza tswazwa, nang á̱ni̱nian tyong gu á̱ keang; ma̱gaji malei si̱ tyong a̱ keang a̱pyia̱ nggu ka! A̱wot a̱ghyi nggu ba si̱ sai nang mam a̱ni, a̱ti̱tak nggu ba si̱ li nang a̱yaalam ndong a̱ni! 2A̱ si̱ ba̱ng a̱da̱dei ta̱ka̱da mbwak nang á̱ kut di̱n shan á̱ si̱ bu khwuk a̱ni. A̱ si̱ sak tak bwak yak nggu hu di̱ kyai a̱sa̱khwot; a̱wot tak bwak myian nggu hu da̱ a̱gwut. 3A̱wot a̱ si̱ tyia̱ kun mi̱ chet nang zaki a̱ni. Nang gu tyia̱ kun hu a̱ni, a̱yaagbai nza a̱natat si̱ kin shim ba̱ si̱ lwi mi̱ chet!

4Jen nang a̱yaagbai nza a̱natat ba ndwi mi̱ chet a̱ni, nang n chat ndyuut ta̱m mba ji; a̱wot n si̱ kin fa̱k a̱nwuat neet Ma A̱gwaza tswazwa nyia̱, “Yok tyai a̱lyiat nang a̱yaagbai nza ba lyiat a̱ni bah! A̱wot a yok lyuut na bah!”

5A̱jawa a̱ta̱m tswa A̱gwaza wu nang n di gu yong di̱ kyai a̱sa̱khwot hu ma̱ng a̱gut wu a̱ni, a̱ si̱ ta̱ngam bwak yak nggu hu tswazwa. 6A̱ si̱ kyiak shyishyi da̱ a̱lyoot a̱tyu a̱ byia̱ swuan sang sangba̱p ji a̱ni; a̱tyu a̱ mat Ma A̱gwaza tswazwa ka ma̱ng kuzang kyang ku nshya̱ ma̱ nka a̱ni; nggu wa bu mat swanta hu ma̱ng kuzang kyang ku nshya̱ ma̱ nhu a̱ni; nggu wa bu mat kyai a̱sa̱khwot ma̱ng kuzang kyang ku nshya̱ ma̱ nhu a̱ni. A̱ si̱ nyia̱, “Á̱ bu na byian jen bah! 7Jen nang a̱ta̱m tswa A̱gwaza a̱natat wu ntyiap a̱gwa nggu ka a̱ni, kyang hu nang A̱gwaza la̱p a̱ sak di̱ niat a̱ni, na bai da̱ a̱nu ka! Ku na bai cha̱chaat ma̱nang gu ku mi̱ ntak ma̱ng á̱khwo nggu ba, ba̱ yet a̱yaata̱m a̱kwonu nggu ba a̱ni!”

8A̱jawa nang a̱nwuat ka̱ neet Ma A̱gwaza tswazwa a̱ni, si̱ bu nkaat ma̱ng a̱nung nyia̱, “Nat a san ta̱ka̱da nang á̱ kut di̱n shan ku shya̱ da̱ khwuk a̱ni, mbwak a̱ta̱m tswa A̱gwaza a̱ yong di̱n kyai a̱sa̱khwot hu ma̱ng a̱gut wu a̱ni.”

9Mat a̱nia, n si̱ nat da̱ a̱vwuo a̱ta̱m tswa A̱gwaza wu. N si̱ ndyip gu nyia̱ gu nwuak nung a̱da̱dei ta̱ka̱da wu nang á̱ kut di̱n shan a̱ni. A̱ si̱ nyia̱ ma̱ng a̱nung, “Ngga! San a yaa! Ku na swan nya̱nyiat a̱bwonu ang ka nang tong a̱ni. A̱wot ma a̱fa ang ka, ku na swan sa̱sat!”#10:9 Izi 2:8‒3:3; Za̱b 103; Iri̱ 15:16.

10N si̱ nsan a̱da̱dei ta̱ka̱da nang á̱ kut di̱n shan a̱ni mbwak a̱ta̱m tswa A̱gwaza, n si̱ ngya! Ku si̱ swan nya̱nyiat a̱bwonu nung ka nang tong a̱ni. A̱wot nang n nnwuan a̱ni, ku si̱ swan nung sa̱sat ma a̱fa ka.

11A̱jawa á̱ si̱ bu nyia̱ ma̱ng a̱nung, “Ku yet ta hwa, a bu shei kyang ku chobai á̱zanson tazwa nnwap, bibyin, lilyem, ma̱ng á̱gwam ma̱ a̱di̱di̱t a̱ni!”

Currently Selected:

Tyai Á̱zanson 10: TyapNT

Highlight

Compare

Copy