2 A̱korontiyawa 9

Á̱ Ta̱m ma̱ng Za̱nang Kurum da̱ a̱vwuo Á̱niet Khwi mi̱ Urusha̱lima

1A̱tsak a̱lyiat, ku yet ta hwa n bu ndyuut nyin wusika jhyang tazwa za̱nang kurum beang á̱niet khwi#9:1 Lyuut cha̱chaat: “Á̱za̱za̱rak á̱niet A̱gwaza.” mi̱ Urusha̱lima bah. 2Mat n dyen si̱sak ji nang nyi mbyia̱ di̱dang ba̱t nyi beang a̱ni. A̱wot n ka̱n tam da̱ nyin da̱ a̱vwuo susot á̱niet khwi ba̱ shya̱ fam a̱byin Ma̱kidoniya a̱ni. N si̱ shei mba nang nyin á̱niet fam a̱byin A̱ka̱ya mi̱n nwuo chat beang hu ma̱ng za̱nang kurum ji neet ma̱ a̱lyia̱ ka̱ swak a̱ni. A̱tsak a̱lyiat, di̱dang beang nyin hu si̱ fuut susot á̱niet khwi ma̱ a̱di̱di̱t mi̱ fam a̱byin Ma̱kidoniya hu, ba̱ si̱ ma nwuo chat beang ma̱ng za̱nang kurum ji.

3A̱mgba̱m ma̱ng a̱nia, n ta̱m ma̱ng Titut ma̱ng á̱kpa̱ndang ta̱m nggu a̱feang, ba̱ li nang nyi tung kurum hu tyak. N wa ka̱n tak ma̱ng a̱mba nang nyi nshya̱ ma̱ng la̱p vam nyi nwuak za̱nang kurum ji. Mat, n chat tam nung hu nang n tam da̱ nyin a̱ni, ku yet a̱buk kyang bah. 4Kalak ka̱ á̱niet khwi Ma̱kidoniya á̱ghyang bai ma̱ng a̱nung, a̱wot ba̱ si̱ shya̱ nang nyi ka̱n tung kurum hu bah, zi̱ na fa̱k nsum. Mat n wa ka̱n tak ma̱ng a̱mba nang nyi wa ka̱n tyak tung kurum hu. A̱wot n si̱ mi̱n tak tangka̱i nsum nang nyi na fa̱k tazwa nwai tyak tung kurum hu a̱ni bah.

5Huhwa mbyia̱, n di ku myim n ta̱m ma̱ng á̱kpa̱ndang ta̱m bani, ba̱ khwat a̱son nung á̱ bai da̱ a̱vwuo nyin, ba̱ ka li nang nyi tyak tung kurum hu nang nyi nyia̱ a̱li̱ka̱uli na nwuak a̱ni. A̱mgba̱m ma̱ng a̱nia, n chat nyi nwuak kurum hu nang fwuo nyin hwa kyiak a̱ni, ku yok yet nyin khwo hwa bah.

6Nyi yok bwung a̱man tyap kani bah; a̱tyu khap a̱ chyui zwá yak ji mi̱ shi̱shi̱p a̱ni, a̱ na chak yak ma̱ a̱da̱dei. A̱wot a̱tyu khap a̱ ma chyui zwá yak ji gba̱mgbam a̱ni, a̱ na bwuo yak gba̱mgbam. 7Si̱ konyan ma̱ nyin a̱ nwuak di̱ si̱sak ji nang fwuo nggu nkyiak a̱ni. A̱wot nyi yok nwuak kurum ma̱ng a̱gi̱n, ku nyi nwuak di̱ khwo bah. Mat á̱ lyuut nyia̱,

“A̱gwaza ni̱ fa̱k nyinyang

a̱tyu a̱ nwuak ma̱ng fwuo nyiung a̱ni.”#9:7 Kid 22:8.

8A̱wot A̱gwaza byia̱ shok a̱ ka̱u nyin kuzang kyang nang nyi chat a̱ni gba̱mgbam ma̱ng fwuo nyiung; da̱nian kuzang jen, nyi ka byia̱ kuzang kyang nang nyi chat a̱ni, a̱wot nyi byia̱ nhu gba̱mgbam, nyi ka̱u á̱ghyang á̱niet ba̱ sang a̱ni. 9Ma̱nang á̱ ndyuut ma̱ A̱lyiat A̱gwaza na a̱ni, nyia̱,

“Ba̱ ka̱u á̱kunak na kurum

ma̱ a̱sa̱t ma̱ng fwuo nyiung.

Á̱ na jhyung a̱tan nta̱m mba wu

ba̱ng si̱ nat sang sangba̱p.”#9:9 Za̱b 112:9.

10Mat A̱gwaza wu wa nwuat a̱tyu khap wu zwá yak ji gu chyui. A̱wot a̱ bu nwuak nggu kyayak nang gu na ya a̱ni. Ma a̱nia wa, A̱gwaza bu na nwuak, a̱wot a̱ mbeang nyin bwuo yak gba̱mgbam. Da̱nian nyi ka mbeang á̱ghyang á̱niet ba̱ sang a̱ni gba̱mgbam ma̱ng fwuo nyiung.

11A̱tsak a̱lyiat, A̱gwaza na tyia̱ nyi yet á̱niet nzwá di̱ kuzang vak. Mat nyi ka ka̱u nkyang nang nyi byia̱ a̱ni ma̱ng fwuo nyiung. A̱wot jen nang zi̱ na nnat ma̱ng za̱nang kurum nyin ji da̱ a̱vwuo á̱niet ba̱ sang kyang a̱ni, ku na tyia̱ á̱niet a̱bya ba̱ gwai A̱gwaza ba̱t. 12Mat a̱nia, á̱ na shya̱ nkyang nfeang na̱ yet a̱tan a̱ni mi̱ ta̱m ka̱u za̱nang kurum huni; á̱niet khwi ba̱ shya̱ mi̱ Urusha̱lima a̱ni, ba̱ na shya̱ kyayak, a̱wot ba̱ bu byia̱ fwuo sai ba̱ gwai A̱gwaza.

13Mat ta̱m ka̱u za̱nang kurum hu nang nyi nyia̱ a̱ni, á̱niet khwi mi̱ Urusha̱lima na nwuak A̱gwaza shi. Ma̱nang nyi mbeang mbaa ma̱ng á̱niet khwi á̱ghyang ma̱ng fwuo nyiung a̱ni, ma a̱nia wa ku na ntak nang nyi nkhwi A̱sham Nkhang Yesu Kristi ka. 14A̱wot ba̱ na naai A̱gwaza da̱nian nyin ma̱ng a̱tsatsak chat, mat a̱gba̱ndang shok nang A̱gwaza nyia̱ nyin ndyo a̱ni. 15Zi̱ gwai A̱gwaza wu da̱nian za̱nang nggu#9:15 Ku: “Za̱nang kurum ji nang ba̱ na nang a̱ni.” jini, ji̱ yet kyang a̱ga̱de hwa da̱nang a̱tyubishyi si̱ mi̱n dyiat a̱ni bah!

Currently Selected:

2 A̱korontiyawa 9: TyapNT

Highlight

Copy