1 Timoti 4

Á̱niet Tyiet A̱ka̱laa

1A̱za̱za̱rak Ntswa A̱gwaza shei ma̱ng a̱nzi̱t kpa̱sai nyia̱, di̱ ngaan njen wuni, á̱ghyang á̱niet na bwuok lilyim di̱ nwuak fwuo di̱ Kristi. Ba̱ na myiai a̱fufwuo á̱ fwuong tswá bwoi a̱ka̱laa, ji̱ laai mba. Ba̱ bu khwi a̱ka̱tuk tyiet wu a̱ neet da̱ a̱vwuo á̱ka̱tuk ntswá a̱ni. 2Tyiet huni neet da̱ a̱vwuo á̱bubuk á̱niet ba̱ bu yet á̱niet bwoi a̱ka̱laa a̱ni; á̱niet nang nfwuo mba na ka̱n tyia̱ gba̱pdok, na̱ bu si̱ mi̱n kpaat ba bah, nang á̱ ni̱ fwui na ma̱ng long ntswam a̱ni.

3Ntangka̱i á̱niet nani vwuong á̱niet ba nyia̱ nyeang ma̱ng ya nkyayak njhyang nang A̱gwaza mat da̱nian á̱tsotswat á̱niet ba̱ nwuak a̱chuchuk, a̱wot ba̱ si̱ bu lyen a̱tsatsak wu ba̱ san ma̱ng a̱gwai a̱ni. 4Mat kuzang kyang nang A̱gwaza mat, ku yet a̱sham. Á̱ mbyia̱ kyang nang á̱ na lak a̱ni bah. A̱wot a̱mgba̱m kuzang kyang á̱ na san hu mami naai ma̱ng a̱gwai. 5Mat zi̱ lyen á̱ jaat hu ma̱ng a̱lyiat A̱gwaza na ma̱ng naai hu.

A̱tan A̱tyu Nta̱m Yesu Kristi

6Ka a tyiet á̱niet khwi Yesu ba ntangka̱i nkyang nani, a na yet a̱tan a̱tyu nta̱m Yesu Kristi, nang a̱tyu a̱ mban mami a̱lyiat nwuak a̱chuchuk na a̱ni, ma̱ng a̱tan tyiet nang a khwi ba̱ng ba̱ tat a̱fwun a̱ni.

7A̱wot tyong zan ma̱ng tsaai a̱tai tashikum ma̱ng a̱tai nkhang da̱ a̱ yet kyang a̱ni bah. Da̱ a̱kwonu a̱kya, nyep a̱pyia̱ ang di̱ khwi A̱gwaza hu. 8Nyep vam a̱tyubishyi ni̱ beang ma̱ a̱da̱dei. A̱wot khwi A̱gwaza hu yet di̱ kuzang nvak, mat huhwa yet za̱kwa ji nwuat kpangti̱n ma̱nini ma̱ng swuan sang sangba̱p ji chobai a̱ni.

9A̱lyiat nani yet a̱tsak a̱lyiat wa. A̱wot na̱ myim á̱ khwi naa ma̱ cha̱chaat. 10Huhwa mbyia̱ nang zi̱ nhyai nta̱m na ma̱ng swuo a̱bung ba̱t, mat zi̱ ntyia̱ nfwuo nzi̱t na da̱ A̱gwaza nswuan, a̱tyu a̱ yet A̱tyusan á̱nietbishyi ba a̱mgba̱m a̱ni, á̱niet khwi bibya na swak.

11Tyiet ba nkyang nani, a bu yong gi̱ngi̱ng ba̱ myiam naa. 12Yok ghwon a̱yin gu jhyuai ang mat a yet fi̱ng bah. A̱wot yok a yet kidee nang á̱niet khwi ba na myiam da̱ nwan a̱ni; da̱ a̱lyiat ang na, swat ang hu, chat á̱niet ang hu, nwuak a̱chuchuk ang hu, ma̱ng yet a̱za̱za̱rak.

13Nwuak a̱pyia̱ ang kuzang jen a fang A̱lyiat A̱gwaza na kpa̱sai ma̱ a̱tung sot á̱niet khwi ji. A̱wot a ya a̱son ma̱ng shei ma̱ng tyiet a̱lyiat A̱gwaza na nfwuong jen nang n na mbai a̱ni.

14Yok bwung za̱nang chet A̱za̱za̱rak Ntswa ji, ji̱ shya̱ ma̱ nwan nang á̱ ku nang ang, mat ta̱m ji nang á̱ shei á̱zanson tazwa ang a̱ni bah. Si̱ huni ku bai di̱n jen nang a̱yaakwak a̱son á̱niet khwi ba ku nsaai ang mbwak, á̱ si̱ ntyia̱ ang mi̱ ta̱m hu a̱ni. 15Nyia̱ nta̱m ma̱ng nkyang nani nchi̱ri̱ng. A̱wot a bu nwuak a̱pyia̱ ang ba̱t da̱ na, da̱nian a̱mgba̱m á̱niet ba ba̱ ka li ya a̱son ang hu. 16Chok a̱pyia̱ ang shansham ma̱ng tyiet ang hu. Gbang a̱lyia̱ a nyia̱ nkyang nani, da̱nian ka̱ a nyia̱ na a na san a̱pyia̱ ang, a̱wot a bu san á̱niet ba̱ fwuong a̱lyiat ang na a̱ni.

Currently Selected:

1 Timoti 4: TyapNT

Highlight

Compare

Copy