Romam 13

Ni ni seli̱bu dwiyen

1N ka wure a mwintuwe ka ni yikiyu we bi̱seli̱m kwabnatimu. A ne ti̱kan dwiyen we ta kekitu n Kwama a yonge. Dwiyentu n Kwama nang nii a rube. 2Di̱ne yiko, ka nang wuwule niye wu a mabu kwa̱mbi̱r we kasi no ti̱ti̱le mati̱ne, a kebu ki̱ni chi Kwama a rube. Ni̱bu ki̱madi yikomu, ki̱yal dur chi̱nu mi̱ne riye.

3Mati̱mu a kabu chi tayi we bi̱bu ki̱tum yilemu kana bi̱bu ki̱tum chi a lebiti̱mu. Ka mun baddu ne mwang wul tayi tikake nii wu ki̱mati̱ne, ma chi a leetu, n ki̱n ka weri̱nu. 4N Kwama yo ki̱n ka ma mi̱n nangang. Aya ka n ma chi a lebe, wul ki̱n di̱ne ka welanu we ti̱kitu. N Kwama a ni ki̱n dwiyen ti̱tu di̱ne ke a nang madi yiko, ka nang chikiye a nang wela bi̱bu ki̱ma ti̱ta lebiti̱mu. 5Di̱ne yiko, a mwintuwe ni ma mati̱m ti̱ti̱nimu mi̱n kwa̱mbi̱r. Ni madu, n ke kana di̱ne ke ki̱fwini Kwama a yaruwe dur chi̱renu, aya ke n chi̱ni ni swe ki̱ni ki̱wulang chi̱renu a kunnu we.

6Nang chi a yo ta fe sangkale, di̱ne ni̱bu dwiyeni̱mu a kambi Kwamai bi̱bu ki̱ ni ki̱swi chi kwang di̱ne nangang ki̱ku. 7Fe di̱si̱nu ka ni ki̱bumi̱nti̱ di̱si̱ne, ka no mwang febu sangkale, fe ki̱ka̱ngu, ka ka̱mbi̱r kuli̱ne, fe ki̱ni kwang. Ti̱nwe tayi wu a lwe ni nwe tayi kiye. Ni ki̱n dwiyentu wu a lwe ka yiu dwiyene.

Mi̱laku a ri chitu Kwama ki̱badditu kwang

8Kedu ni a bumi̱nti̱nu chi we. Chi a kau mi̱n di̱si̱nitu nang mi̱laki̱ku. Di̱ne ni ki̱mi̱la keko a rii yili̱ntu. 9We tatti̱ki̱dai yika̱riyu, yili̱ntu we yinang ti̱tu: “Madu ti̱kuli we, chidu ni we, madu kutu we, kubedu chi we n ti ti̱kantu yili̱n ti̱tu wetu, a dalan we di̱kwa̱li dini̱n di̱du. Mi̱la kemo yinang dur mun.” 10Ka n mi̱la niye, ne mwang nwe ki̱mi̱n burang. Chi yilangu ki̱baddi kwange nang mi̱laki̱ku.

11Ti̱yim ki̱duum ki̱dangi̱mu n chi̱ni we muremu. N kawure a do yayu ko a swengi ki̱ni doku bwiyang, di̱ne ki̱swi n ke wu niin daan dume. Ki̱dang yukangu a mwatawe, a newe yinang yoko no niyang mwe niyang yiu Kwama. 12Kum a tau wa̱re, ti̱ma a mwatan ka kwiyadu. Ni chaku ti̱bwitan chi̱retu ni yo bwa, ni ya yayu wu a ni̱bu bi̱ba ke bi̱yili̱m a di̱Yesuwe.

13Ni ya yayu ki̱ni ni̱ri si̱k yinang yo ti̱ma kwiyane. Ni burti̱du we yinangu ni̱bu nori̱mu ki̱bwitadangu. Ni kedu yaritu we n ti nwe ta̱me wu kuse wa da wu ka̱riye n ti di̱kulan n ti kaiku ni̱rang ki̱ni chi ni ki̱yade. 14Bunge mwan kum bwi mwiyu a di̱Tewuduwe Yesu Masiya, yinu kedu kuradu tiyangu mwan ni yimwiyu we da wu ki̱leti bwiye.

Currently Selected:

Romam 13: Tula

Highlight

Copy

Compare