Dwakam 9

Sumiya dubiyu

1Naba di̱tumbi̱re wu nure a ku wu ko sum, n ku wuka naba di̱tumbi̱re yinang ki̱swi a swiye a ti̱m we dii. A ni ki̱n dukanu ka wudu#9:1 Mangsoli ki̱yungdu ni̱bu a ni ki̱n dukan ka ma nangang ki̱ku. ki̱bele wu a bwang ki̱swa̱ma̱nge.#9:1 bwang ki̱swa̱ma̱nge: wuka fi we ni̱r di̱ti̱nu fi a kwaban ki̱fi̱ti yibwilaye ka lami̱nti Di kabake. 2Naba di̱tumbi̱re wu a wudu kwa̱ru, di̱kan ywa̱n a chire yinang ka lo nii ki̱tau ki̱rangange. Ywa̱n di̱du a mwinti̱n a yinge twiye ki̱li.

3Ki̱kwiti a chire we ywa̱n di̱du, a le ti̱ti̱nitu, a ni chi dukanu teki̱nu yinang ki̱nai. 4A yi ko a twaiyu fili̱nu n ti swa̱ki̱ku we n ti tiyang n ti ka ti̱ti̱le ti̱tu ki̱kiyedu a ti̱mite. Ko a ya kana ni̱bu a ne kale dukane Kwama we tikabe chimu. 5A yibu chi ko a chi̱u ni̱bu bi̱bu, aya a ni chi riye wu a swari tunuwe. Burang teku kwa̱l ki̱kwitin di̱du a lakanbu n ti yo ki̱na a teniye. 6We swa̱r ti̱ti tunutu, ni̱bu ka kedu ko chi bwadu aya a ne yadu, yinu ni̱bu ka bau bwa kwa̱rikwa̱ri aya bwa a ne bedu.

7Ki̱kwitiyu yinang kwereti yiyu ni̱bu a do ki̱yaan kunni. Ki̱ni ti̱kan chi yinang tarati si̱nariya yiyu a matti̱ni we dutu chitu. Kabi̱ni chiyu a chirka mi̱n n ti ni̱bu. 8Rii chitu yinang ti̱ta dutu nati̱bi (ka nang chikiye ki̱ni swa̱n), nuum chimu yinang bi̱ba a turumi̱m. 9A yinge kwini chiyu ki̱ni ti̱kan chi yinang lukei ka̱mbi̱ri, labi chiyu ki̱ngau diru yinang ki̱rang kwereti yiyu ki̱ni ka̱rma di̱bi̱li̱n, a chir ki̱wulu ki̱ya kunni̱n.

10N chi ki̱ni yartu kite nii yinang ki̱na, n chi ki̱ni dukan ka nwe ni̱bu mi̱nu ka lam swarti tunu. 11N chi ki̱ni Mai ki̱ma mati̱ne. Mai chi nang naba di̱tumbi̱ri ni̱bu a ni ki̱n dukan bwang ki̱swa̱ma̱nge. Di̱n ki̱nu ki̱ni yii Yafudame “Abadon” Ki̱ni yii Yelenamu “Afoliyon” ka nang chikiye, “Naba ki̱yaye.”

12Riye wu kake a su, a kuteng ki̱ku tikanti turabitu ki̱bedu.

13Naba di̱tumbi̱re wu nukune a ku sum ko, n nwe ker a chire we fwiti̱neti yanayu we se Kwama si̱nariya wu a kakku Kwamange. 14Keru a yi naba di̱tumbi̱re wu nukune ko, “Mare ni̱bu di̱tumbi̱ri fakwaremi baana ni̱bu a kwab a nabwe la Yufi̱ritise!”

15Yinu a mare ni̱bu ti̱tumbi̱ri fakwarem bi̱bu n chi baanamu, di̱ne ki̱swi wu, di̱ne di wumu, di̱ne swang ki̱ku di̱ne swa̱r di̱du di̱ne ke a chi̱u wu wiin wa yitta we kuu ni̱be kwang. 16Yinu n nwe ni̱bu a fwami nabwe ni̱bu kunni̱me, n chi kuniriti kub ki̱da kuniriti kub ki̱da yurau.

17We dwakam bi̱yilemu, n ku kwereti n ti ni̱bu ki̱fi̱li̱m, a do lukei ka̱mbi̱ri yiyu ki̱ni di̱mwali wur yinang ki̱rangi, di̱kanu di̱mwali bungbung, di̱kanu yinang fattu. Kanang wuwule kwere ki̱ni duru yinang turum, ki̱rang n ti ywa̱n n ti ki̱rang ki̱ki balbalang ki̱chiredu we yiini chiyu. 18A chi̱u ti̱me wiin wa yitta we ku ni̱be ki̱ni riye, ka nang chikiye, ki̱rang n ti ywa̱n n ti balbale ki̱rang ki̱kwanange ki̱ku ki̱chiredu we yini kwereti yiyangu. 19Nangki̱n dukan kweretinu a yiini chi n ti yar chitu. Yar chitu yinang soti yiyu ki̱ni duti. Ki̱ma nangangi ki̱n ki̱nwe ni̱bu mi̱n burang.

20Bi̱kamu kuu ni̱be bi̱bu a bwabu we riye wumu, bi̱bu a wobu ki̱ti̱m a dubu chitu n chi a ma ki̱ni fa̱li chitu, ka nang chikiye a dubu siiku ki̱fi̱bti yi bwilayu, a dutubu siiku di̱yoru, ni̱bu a mubbi si̱nariya ka asurfa ka takulla ka kale ka tiniye kwali̱n chi̱nu a kubudi, a nwebu a yati̱bu fimu. 21N chi a wo ti̱bu ki̱ti̱m we chibeku ni̱bangu n chi ki̱madangu ka yimari chiye ka sulaiye ka kute.

Currently Selected:

Dwakam 9: Tula

Highlight

Copy

Compare