Dwakam 22
22
Laa mwe ti̱kuriye
1Yinu naba di̱tumbi̱re a yungi laa wu a mwe ti̱kuriye ki̱yiladu yinang kali yili, ki̱chiredu we ki̱di̱ng mati̱nang Kwamangu n ti Be Kwane, 2we tibe wuduwe nelo. We ki̱ti̱ku kanang wuwule laa, tiyang ti̱kuriyang we ki̱ku ki̱tu ti̱kulantu ki̱da kub chiri yurau we swa̱ra̱ngu. Lwangi̱n tiyangitu ki̱be kuuti mi̱n bumbi riyetu. 3A ne ti̱kan chi ti̱tu n Kwama a ma ki̱mi̱n yiitu we, ki̱di̱ng mati̱nang Kwamangu n ti ki̱ku a Be Kwanengu ka swedu we bi̱nu, ni̱bu nanga ki̱mu kani̱n sii ki̱nu. 4N chi ka ku kabu ko, yinu di̱n ki̱nu kanodu we kabi̱ni chiyu. 5A neti̱ wuka kum we, a ne bakku ki̱yiyen we, ka kuko, di̱ne n Tewuduwe Kwama ka ni chi yiiki̱ku. N chi ka chau mati̱ntu ki̱diya kwadu. 6Yinu naba di̱tumbi̱ri Kwama a yi mi̱n ko, “Ya̱m bi̱bu ka bi̱yili̱m, ka fwedu. N Kwama, wu ki̱ma nangang kangu a fi̱ki̱m we fa̱kube, a tume naba di̱tumbi̱re, ke a yung naba nanga ko chi a mwintuwe yaka fwedu a ne tiketu.”
N Yesu ka ki̱ladi datu
7“Da̱ng, mi̱n ki̱ladi daatu! Naba delake ni wu a tau ti̱kwa̱li ti̱tu a chi a yaka fwede we taki̱da.”
8M mi̱n n Yowana, m mi̱n wu mang nwe, mang ku ti̱chitu we. Yo mang nwe mang kuti̱ne, n sung kus we nani kiyu mi̱n si naba di̱tumbi̱ri a tau ki̱yungi chite. 9Aya n ki̱n a yi mi̱n ko, “Maduwe yiko, m mi̱n naba nangange yinang mun n ti bi̱kamu kebu mumu fa̱kubu n ti kanang wuwule niye wu a tau ti̱kwa̱li yiitu a taki̱da wutu. Sii kana Kwama!”
10Yinu a yimi̱n ko, “Laiyu ti̱kwa̱li yiitu a chi yaka fweditu we, di̱ne ki̱swi mwatawe. 11N ki̱n wu ki̱ma chi a lebe, n ti wu ki̱mwe ti̱kwaniye, n ti wu ki̱tum bi̱yili̱me, a chakakku. N ki̱n wu ki̱ma fiswe yinang Kwama a chakakku a nang madu.”
12“Da̱ng, mi̱n bedi datu, mang bedu ki̱ni ki̱ti̱me, be mang nikadu, mang swe kawuremi̱n ti̱nu we chi n ki̱n a maatu. 13M mi̱n nang Alfa n ti Omeka. Kanang chikiye, m mi̱n nang wukakke n ti wu ka ta̱lle, Mweku n ti Swangku.” 14Ni̱bu delaki̱m bi̱bu ki̱bunti̱ yili̱n Kwamati̱mu. Di̱ne n chi ka ledu we kwa̱tu bi̱nitu, ka chadu we ti̱kulan tiyang ti̱kuriyangitu. 15Ni̱bu bi̱bwilamu kanodu a kuteng bi̱nang kanang chikiye ribi̱bu n ti ki̱kulbi̱bu, bi̱bu ki̱chi̱be ni̱bi̱mu n ti bi̱bu ki̱sii di̱yor n ti bi̱bu a mi̱lan chakku kakku ki̱ni ti̱kwanimu.
16“M mi̱n n Yesu, n tum naba di̱tumbi̱ri mi, ko ke a fwa ni̱bu mi̱n ya̱m bi̱bu we kambi Kwamatu. M mi̱n nang buke ki̱kuti̱li̱me Dauda wu yinang ki̱ yinang.”
17N Kwama Fi̱ki̱m n ti ni̱bu ki̱mu yinang naye na kwiye we di̱ki̱nemu a yi ko, “Be!” Ti̱nti̱ne n ki̱n wu ki̱nwede a fwa ti̱n ko, “Be!” Kanang wuwule niye wu ki̱bau mwe ti̱kuriye, a be, ti̱nti̱ne, n ki̱n wu a ke kayidde, a yiu mwe ti̱kuriye li̱mang. 18M mi̱n n Yesu, mi̱n wu ki̱tele we ni ki̱nwe ti̱kwa̱li yii chi yaka fwede. Ka wuka ni a su chi we ya̱m bi̱be, n Kwama ka su ki̱mi̱n bwini chi yinangu we taki̱da wuwangu.
19Aya ka wuka ni a chaku di̱kan di̱kwa̱l yiin we chi yaka fwede, n Kwama ka chaku ki̱ti̱me ko wu a tiyang ti̱kuriyange n ti wu a bi̱n Kwamane, yinangu a swe we taki̱da wuwangu. 20N ki̱n wu a fwa ya̱m bi̱be, a yi ko, “Ki̱kumang mi̱n bedi daatu!”
Naba mwalke a ke ko, Amin. Be Yesu Tewuduwe!
21Li̱me Tewuduwe Yesu a swe ware n ti ni̱bu Kwamamu. Amin.
Currently Selected:
Dwakam 22: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
