Dwakam 13

Nai yuru a chire a ne Laa

1Yinu n ku wuka nam ki̱chiredu a laa. Ki̱ni ki̱sumiyi kubu#13:1 Da̱ng 12:3. n ti duti̱ti ti̱dibiin, kanang ki̱ki̱le ki̱sunge ki̱ni di̱ki̱ri̱n mati̱ni̱n. Kanang di̱di̱le dure, ki̱ni di̱n swa̱ba ni̱n we di̱Kwama. 2Nam mang kuwe yinang mabi̱li̱m#13:2 Da̱ng Dan 7:3-7. aya ki̱ni naniyu yinang yiyu a kada di̱kire yinu ki̱ni yii yinang turum. Neti soo wuduwe a ni nam wu dukan ki̱nu n ti ki̱di̱ng mati̱nang kangu n ti mati̱ntu. 3Di̱kan dur we dutu nam wu tu, yinangu ki̱ni di̱nti̱leng#13:3 bun di̱ka̱ri̱n.. Aya di̱nti̱le wu a mwinti̱n a be. Ti̱tu a ya̱r ti̱ti̱nitu yii, a yo ni̱bu a bulan ki̱bung ki̱mi̱n ti̱nu. 4Kanang wuwule niye ki̱ sii neti soo wuduwe di̱ne dukanu n ki̱n a ni nam wunu. Yo n chi ki̱sii nam wuwe, ki̱fwadu ko, “N wure ki̱ni dukan yinang nam wu? N wure ka medu ka ma kunnu ware?”

5Ni̱bu a du nam wu ki̱ri̱kadu ki̱ swa̱ba Kwama. A du ki̱n ko a ma chi n ki̱n a kudiye we swartu wan taana chiri turabitu. 6N ki̱n a fwa ya̱mu ki̱ swa̱ba di̱n Kwamanu n ti ki̱di̱ng mati̱nang kangu n ti bi̱bu ki̱swedu ware we bwadimu. 7A du ki̱n ko a ma kunnu n ti ni̱bu bunti̱ki̱mu, a chau ki̱la we dur chi̱nu. A ni ki̱n dukanu we ka nang ki̱ki̱le ki̱fi̱ke n ti kanang bi̱bi̱le ni̱be n ti kanang wuwule yiiye n ti kuuti. 8Ni̱bu we ti̱ti̱nimi kwang ka sii nam wu, ka bwin ka bi̱bu di̱nbi chitu we taki̱da ti̱kuriye, kanang chikiye bi̱bu a bunti̱ Be Kwane wu ni̱bu a bi feredi yo ti̱ti̱nitu a tibu mwede.

9Ni ki̱ni ki̱tele a nwe. 10Wu a yo ka le di̱bi̱nti̱le, ka leti̱ di̱bi̱nti̱lu. Wu a yo ka bwadu a kulle, ka bwadu a kul. Ti̱tu ki̱bau bwanu n ti keku bi̱yili̱mang we bi̱bu ki̱bunti̱ Kwamamu.

Nam wu a chire a ti̱me

11Yinu n ku wuka nam a chire a ti̱m ki̱ni ki̱sumiyi yurau yinang ki̱sumi kwani, ki̱fwa ya̱mu yinang neti soo. 12A ma nangangu ki̱ni dukan nam wu kakke we kakku nam wukangu. A yo ti̱ti̱nitu n ti ni̱bu we ti̱ti̱nimu ko a sii nam wu kakke, kanang chikiye, wu di̱nti̱le ko a tu a benge.

13Nam wu robe a ma chi ka̱ta̱ki ti̱dui we nui ni̱biyu. Ki̱medu ki̱yo ki̱rang ki̱chiredu we twiye ki̱yii ti̱ti̱niti wa̱liwa̱li we nui ni̱biyu. 14N ki̱n a butu ni̱bu bi̱bu a bunti̱bu Kwamamu ki̱ni chi ya̱r yii ti̱tu ni̱bu a du ki̱n ko a ma a nui nam wu kakketu. N ki̱n a yi ni̱bu ko a mu di̱kan di̱yor nami̱n di̱dun yinang nam wu kakke, wu ni̱bu a ngau a dub ka di̱fuken, aya n we ki̱ni ti̱kurite. 15A du nam wu robe ko a ni di̱yor nam wu kakkenu Fi̱ki̱m ti̱kurim ke a fwa ya̱m, yinu di̱yor nami̱n di̱du a yi ko kanang wuwule niye wu ka kodu a ne sii ki̱ne, ka bwadu.

16Nam wu robe a yo ni̱bu ko a kau ki̱kwai a fa̱la̱ng ki̱yilang ka a ti kabenge, we seli̱bu n ti bwesi̱mu, naba kuli n ti di̱lusanu, ka̱be n ti wu n ke ka̱be. 17N ki̱n a ma ti̱tu ko ke wuka a yadu da a ta̱nu chiwe ka ka feku chiye ka n ke kana nii wu ki̱ni ki̱kwai nam we. 18Ti̱tu ki̱bau swaanku. Nii wu ki̱ni swaanke, ka medu ka fwa chi ki̱kwai nam wu ki̱yungde, di̱ne ki̱kwai wu a di̱n wuka nii, ki̱kwai ko n nang 666.

Currently Selected:

Dwakam 13: Tula

Highlight

Copy

Compare