Dwakam 12

Wuka naye n ti neti Soo wuduwe

1Ti̱kan chi ti̱dui n ti chi ka̱ta̱ki a chire we twiye. N ku wuka Naye#12:1Naye we ya̱m bi̱bu ki̱yung ni̱bu Yisrelamu, kuko nang yile Kwama ki̱ywa̱ta ni̱bu bi̱be. Ni swe ki̱switiyi kub chiri yurabiyu ki̱ni di̱mwar ya̱m bi̱li̱m miyari̱mi̱ni kub chiri burabi̱nu. Swangu n nang ti̱ti̱nitu. Mwe 37:9. wu a yinge yikiyu ki̱ni kuko yinang kuli̱n di̱dori̱ne, a fau nani kiyu a swang. We dur Ki̱nu, n ki̱n a mu di̱ki̱ri̱n di̱du ki̱ni ki̱switiyi kub chiri yurabi̱n. 2Naye wu ki̱ni lur di̱bwilan, n ki̱n ki̱ki wi di̱ne yaka bi̱dde, n Ki̱n ki̱ma ki̱tine di̱ne yaka bi̱u riye.

3Yinu n ki̱la n kuti̱ ti̱kan chi ti̱dui n ti chi ka̱ta̱ki a chire we twiye, n ku neeti soo#12:3 Soo we wa̱re wu n nang Setan, duti̱ti ti̱dibiinitu n nang yinangu nabwe dukan ki̱nu a ti̱rami̱nangu, ki̱sumiyu ki̱yung mati̱mi kubu, beti̱ taratiyu n nang Mati̱ntu. wuduwe yiwur a chire ki̱ni dututi ti̱dibin n ti ki̱sumiyi kub we kanang di̱di̱le dure, ki̱ni tara Mati̱ne we kanang di̱di̱le dure ti̱n. 4Dukan Yangi̱nu a lam twiye a mwate ti̱me wiin wa yitta we ki̱switiyu a fwale a ti̱m. Yinu soo a ti we kakku Nayewu ko ke ki̱wu bwe#12:4 Masiya.naye wu ka bi̱dde.

5Naye a mwinti̱n a bi̱u bwe wubare wu ka ma mati̱n kuu ti̱ti̱niye ki̱ni ki̱twalang makka,#12:5 Kanang chikiye nabwe dukane. aya ni̱bu ti̱tumbi̱rim Kwamamu a da̱u bwe wu a yikan bwana di̱Kwama n ti ki̱di̱ng mati̱nang kangu. 6Naye a wul nabwe di̱chilanchangine, finu n Kwama a do ki̱mi̱ne, fi ka yaan toku ka lami̱nti ditiyu kunengi kiin ki̱ni kuliti turau ki̱ni wan turukune (1,260).

7Yinu kun a fwe we bwadi. M Makel n ti ni̱bu bi̱tumbi̱ri ki̱mu ki̱makadu n ti neeti soo wuduwe. Soo wu n ti ni̱bu bi̱tumbi̱ri̱m ki̱mu a le kunnu yikul n ti bi̱ki̱m bi̱tumbi̱ri̱m ki̱mu. 8Aya ni̱bu a la neeti soo ki̱ni dukanu, yinu a kakati̱ ni̱bu ti̱tumbi̱rim ki̱mu. A kuteng kun di̱dangu n chi a du bwadiye a newe a ki̱ke chi.

9A tunge neeti so wuduwe a ti̱ti̱ni, kanang chikiye so wu n we ferediye. Wu ni̱bu ki̱yalu ko wubwilla ki̱yalti̱nu ko Setane. Wu a butu ti̱ti̱niti kwange. A tunge ki̱n a ti̱m n ti ni̱bu ti̱tumbi̱ri ki̱mi kwang. 10Yinu n nwe di̱kan ker di̱dun we di a twiye ko,

Ki̱ka̱ngu yuku Kwamanuwangu

n ti dukan ki̱nu n ti mati̱n kitu

n ti dukan Masiya a lwe.

Nangki̱n, a tung ni ki̱mai keme kebu ni̱me a ti̱m

n ki̱n wu ki̱mai keme kebu ni̱me

we di̱Kwama kum n ti kukonge.

11N chi a chau ki̱la we di̱ki̱ne

Ki̱ni ki̱tuum Be Kwanemu

ti̱nti̱n di̱ne bi̱yili̱mu n chi a mwamu.

Nangki̱n n chi a mi̱labu ti̱kuri chitu yinang

a yo n chi ki̱wul tayi yinangu ka bwadangu.

12Di̱ne yiko ti̱ma furi mwen n ti̱n bi̱bu a diimu

n ti bi̱bu a swe we diimu ki̱ni kwang!

aya a no chi̱n ti̱ti̱ni n ti mweti yiduiyu!

N Setan a be bwa di̱chi̱ne,

ki̱ni ki̱fwini

di̱ne a yim ki̱swi ko a dubi bayim.

13Yo neeti so wuduwe a swaan ko ni̱bu a tunge ki̱n a ti̱me, a ma nang a bituwe naye wu a bi̱u bwe wubare. 14Aya a ni naye wu la̱biyi yurau yinang yiyu a ki̱sung kuduwangi, ko ke a kun a wul nabwe di̱chilanchangi̱nu ni̱bu a do ka toon ki̱nu swa̱ti̱ti ti̱ta ki̱ni di̱mwatare.

15Soo wu a toye, a fwale mwe we yiiko yinang wu a laa, ko ke a da̱u naye wu a yikani ki̱n, 16Aya ti̱mu a maka naye. Ti̱mu a wuden a no mwe so a fwale.

17Yinu so a ma ki̱fwini ki̱ni naye yinang yinang, a kune ka ma di̱kulanu n ti ki̱kuwang nayengu, kanang chikiye bi̱bu ki̱bunti̱ yili̱n Kwamatu, bi̱bu a yo ni̱ri diin we ya̱mu n Yesu a fwamu. 18Yinu soo wu a ti a ki̱ti̱ku laang.

Currently Selected:

Dwakam 12: Tula

Highlight

Copy

Compare