Filibiyam 1

Di̱siir Bulusi̱n

1Lwangi̱n di̱du a chire a di̱Bulus n ti Timoti, ni̱bu nangam Masiya Yesu, di̱ne ni̱bu bunti̱ki̱ Masiya Yesu a Filibimu, n ti seli̱bu ni̱bu bunti̱ki̱mu n ti bi̱bu ki̱maka chi nangangi̱mu.

2Li̱me n ti li̱mang Kwama Te chirengu n ti Tewuduwe Yesu Masiyangu a swe ware n ti chi̱n.

M Bulus a twa̱ba̱ ni̱bu bunti̱ki̱mu a Filibiyam mi̱n buni

3Mi̱n wana Kwama we ka nang ki̱ki̱le ki̱dangu mi̱n kur chi̱nengu. 4Ka nang ki̱ki̱le ki̱dangu mi̱n twa̱ba̱ chimi̱n bunitange, mi̱n twa̱badi kwadu ki̱ni furi mwen, 5mi̱n ni di̱wan di̱ne ta makai niwu mang ma di̱mwar ya̱m bi̱li̱mi̱nu ware, a mwetuwe di fange lanta ki̱ka̱ng. 6Bi̱yili̱m n yim n Kwama wu a mwe nanga Ki̱yilang ki̱ku we dutu chinte, a ne du chi̱nu, se ka swanu, a di m Masiya Yesu ka ki̱lade. 7A dakami kangu mi̱n kura chi̱nu yinangu, di̱ne n ti̱n we ni̱r mi̱nu. We ti̱kunkayu we li̱me Kwama we ki̱dangu mi̱n a di̱bi̱nti̱langu, we ki̱dangu mi̱n so ya̱m bi̱li̱m yinu mi̱n yungti̱ kasi bi̱yili̱m we ya̱m bi̱li̱mitu.

8N Kwama nang wu a timituwe, a yim kangu mang mi̱la chi̱nangu. M mi̱la chi̱n yinangu m Masiya Yesu a mi̱la chi̱nangu. 9Mi̱n twa̱ba̱ bunitu mi ke ti̱chakakku ki̱ni mi̱laku yichiyangu nabwen. Ti̱nti̱ne mi ke ti̱yim Kwama ti̱swaan ti̱ni kwang, 10yinu ta medu ta sutu chi a datu, ke ti̱kau ni̱bi wa̱la̱k bi̱bu a ne di̱tuur wem ka lami̱nti̱ yo Masiya ka ki̱lade. 11Yinu we da chi̱n ti̱ yung da wuyile wu ni yadu a di̱Yesu Masiya, di̱ne ke di̱n Kwamanu a ya dwiyen n ti ri̱kaku.

Sweku di̱ne Masiyan

12Kebu mi̱m, mi̱n baddu ta yindu tiko chitu a fwe n ti mi̱nitu, a yo ya̱m bi̱li̱mu ka chakakku, 13kasi no nang ni̱bu ki̱rangmu ki̱to lo maiyemu n ti bi̱kamu ni̱bi kwang a yim ko n le di̱bi̱nti̱lu di̱ne Masiya. 14Di̱ne ni̱bu a kwai a di̱bi̱nti̱le, a kau wa̱re wu n Tewuduwe a yo kebu ni̱bu bunti̱ki̱mu nabwen a ya ruku ki̱ma di̱mwar ya̱m Kwamamu a ne tayi we.

15Bi̱yili̱m bi̱kamu ni̱bu bunti̱ki̱m ki̱ma di̱mwaru ki̱yoti̱ muli̱nu we n ti kati̱n, aya bi̱kamu ki̱ma di̱mwar Masiya ki̱ni ni̱ri diin. 16Ni̱bu bi̱bu ki̱ma di̱mwari̱mu, ki̱madu di̱ne n chi a mi̱laye, a yim ko ni̱bu a kwai we di̱bi̱nti̱lu di̱ne mi̱n so ya̱m bi̱li̱me. 17Bi̱kamu ki̱ma di̱mwar Masiya ki̱yoti̱ da bwiye we, a ne bi̱yili̱m we. N chi ki̱baddu mang leti̱ wuka riye we di̱bi̱nti̱lu.

18Aya kasi a no yire, ka ti̱kuran ti̱kwaniye ka ti̱kuran ti̱yiliye, ya̱mu nang bi̱bu: di̱mwar Masiya a kwiyabu. Ti̱tu a yo mi̱n nwe ta̱ma̱ng. Ki̱kumang, nwe ta̱me miki̱ chakakku. 19N yim twa̱ba̱ bune chi̱n di̱ne mi̱nangu, yinu ti̱nti̱ne Fi̱ki̱m Yesu Masiyamu ki̱makayu, ti̱tu nang chi ka yo chirku mangitu.#1:19 chirku mangitu: We yii Yelename ki̱yung Yuku.

20M bau ki̱ni ki̱ke, n yoti̱ ni̱ru we mi ne mang ma chi ka yoyu a dibwi we nangang Tewuduwe, aya n fwa ya̱m Masiyamu a ne tayi we, we chitu mang maditi kwang, m Masiya ka ya ri̱kaku we di̱ mi̱ne ki̱ka̱ngu n ti ka wuwule ki̱swiye, kasi mi̱ni ki̱ni ti̱kuri, kasi no a kutengu mang bwadang. 21We di̱ mi̱ne, ka n kau ki̱ni ti̱kuriye m mi̱n n wu Masiya, ka m bwange ka lami chi. 22Aya ka mang chakakku ki̱ni ti̱kuritu mang ma Masiya mi̱n nangang ki̱yilange, n kwala ti̱tu mang swaditu. 23Ti̱me chi yurabe a le ni̱r mi̱nu. Mi̱n baddu mang ki̱la bwa di̱Masiya mang swedu ware. Ti̱kitu a mwan a la chi, 24aya we di̱chi̱ne a la chi ka m mi̱n we ki̱ni ti̱kuriye.

25Yo kwer mang swaaniye, n yim mang swedu ware n ti chi̱ni kwang, ke ti̱chakakku ki̱ni furi mwenu we keku bi̱yili̱mang changu, 26ka yiko, ka n ki̱la chi mi̱nte di̱siiru wenge, ta ngau kwiye, we chi Yesu Masiya a ma a di̱minetu.

27We chitu ta maditi kwang, ti̱ma fiswe wu ka yung da wa ya̱m bi̱li̱m Masiyame, di̱ne kasi no m be n ku chi̱n, kasi no mang bebu, mang nwe ya̱mu we dur chi̱nu. Yinu mang yindu mi ti̱ti ware ki̱ri̱ng, ti̱ni bobu, ti̱kuran chi̱ntu a fiwiine di̱ne keku bi̱yili̱mangu we ya̱m bi̱li̱mu. 28Ti̱nwedu tayi fakwarbu chimu we ko bayim, ti̱tu ka kau chi mi̱n di̱mwal di̱du n chi ka swaanu ko ya chi twiyadu, aya we di̱ chi̱ne, ta ya yuku a fa̱la̱ng Kwamang n ki̱fwan.

29Di̱ne li̱me a ma chimi̱ne n ke kana di̱ne ta kedu ki̱ni Masiya, aya ti̱nti̱n ta nwe riye di̱ne ki̱ne, 30yo ti̱n ti̱ nwe riye yinangu ta ku mi̱n nwe dangu, yinu ta nwe ti̱n we mi̱n nwe riye chiku.

Currently Selected:

Filibiyam 1: Tula

Highlight

Copy

Compare