Yibraniyam 3

N Yesu a la Musa

1Di̱ne yiko Kebu mi̱m ni̱bu ki̱bunti̱ Kwamam, bi̱bu a bwa̱u we ni̱tu chitu ka ya bwadimu, ti̱ma ti̱kuran we Yesu wu nang yung chi̱n ko fandu Kwama n ti tikaketi Fanseti. 2N ki̱n a bunti̱ Kwama wu a sutu ki̱ne ki̱ni ni̱ri diin, yinangu m Musa a ma nangangu ki̱ni ni̱ri diinangu. 3Aya yinangu n Yesu a la Musangu a su ki̱nati̱ng, a lakanbu n ti ni wu a mu lo wu yile, a la lo ki̱ni yaki̱delakangu.

4Di̱ne ka nang wuwule lo ki̱ni naba muke, aya n Kwama nang wu a mu chitu ki̱ni kwange. 5M Musa a ma nangangu ki̱ni ni̱ri diin we lo Kwama aya yinang bwe nanga. Yinu n ki̱n a ying ti̱n chitu ni̱bu ka fwadu we bwa kaketu. 6Aya n Masiya ki̱ni ni̱ri diin yinang bwe we ni̱bu Kwamamu. Yinu n chini nang ni̱bu ki̱mu ka ni tau yo ni̱re ni ri̱kanne.

Fukaku we ni̱bu Kwamamu

7Nang chi a yo Fi̱ki̱m Kwamamu a yi ko,

“Diwu ka ti̱nwe ker Kwamane,

8kedu ti̱mudu ni̱ru we ki̱ngki̱ng,

yinangu ta wi ta ma kulangkulange,

yinang di wu ni̱bu a swe

mi̱n a di̱silanchagi̱ne.

9We bwa ko tukebu chimu

a swe mi̱n a ku bwanu mi,

kasi ki̱ku n chi a ku

chitu mang tau mi̱n maditu

we swa̱ti̱tu wan taanantu.

10Nang chi a yo mang ma ki̱fwini

ki̱ni di̱kalan di̱ki̱nitu,

n fwa mi,

‘N chi ki̱koyi kwadu we ni̱tu chitu.

N chi a kebu ka ma

chitu mang fwa chimi̱nitu.’

11Di̱ne yiko m ma ki̱fwini

we ni̱r mi̱nu n twa̱n chi mi,

‘n chi a ne ka yaan bwa ma do n chi

ka fi̱kande we.’ ”

12Di̱ne yiko kebu mi̱m, a mwintuwe ti̱kedu ni̱tu chi̱ntu a ridu we ki̱ni bwila n ti kwalan keku bi̱yili̱mange, chi ka yodu ta du Kwama wu kure. 13Aya ti̱ kum yichiyu mi̱n ni̱tu diti ki̱da̱ng, ti̱ma nangangu ki̱ni ki̱swi ta ya ki̱ka̱nge, ke wuka a madu ni̱ri ki̱ngki̱ngi̱nuwe di̱ne di̱buti̱r ki̱leti. 14Ka ni lam di swan kute ki̱ni yile chire ki̱ri̱nge, ni ke bi̱yili̱mu we Kwama yinangu niyang mwe niyang yiu ki̱nange, yani chau li̱me ware n ti Masiya.

15Aya ti̱ tabi̱du ki̱kure wu we:

“Ka ti nwe ya̱m ki̱mu diye,

ti mi̱rsi̱du ni̱ru we ki̱ngki̱ng,

yinangu Yisrela a ma Kulangkulangengu.”

16Kano ni̱bu bi̱bu m bi̱wure bi̱bu a ma kulangkulange n ti Kwama, kasi ki̱ku n chi a nwe ker ki̱ni̱mu, n ke ni̱bu Yisrelamu m Musa a chake chi a Masarma? 17M bi̱wure n Kwama a ma ki̱fwini ki̱ni chi swa̱ti̱tu wan taanamu? N chi ke bi̱bu a ma ki̱leti, bi̱bu chi a yaran a bwaran a nabwe di̱si̱lanchangi̱ne ma?

18M bi̱wure bi̱bu n Kwama a twa̱n chi we dur chi̱nu ko a ne lam bwa n chi ka fi̱kande mu? N chi nang bi̱bu a ko bunti̱ki̱mu kangi̱mu. 19Di̱ne yiko ni ku a dubu chi ko a le fi̱kaki̱ku di̱ne kwalan keku bi̱yili̱mang chiyange.

Currently Selected:

Yibraniyam 3: Tula

Highlight

Copy

Compare