Yibraniyam 12

Ni fwal nuyu a di̱Yesuwe

1Di̱ne yiko, yo ki̱tuu ni̱be di̱mwari̱mu nabwen a ken chiniye, a dakan ni wasa kwalli̱n chi̱nu ki̱kanidu we funti̱ku bwiyangitu, n ti ki̱letiyu ki̱wu ni kutengiyu, ni wul banangu a kakku chirengu ki̱ni muku ni̱rang. 2Ni fwal nuiyu a di̱Yesu n ki̱n wu keku bi̱yili̱mang chirengu a mwe a di̱ki̱ne, wu ki̱yo keku bi̱yili̱mang chirengu ki̱kadi di̱mbi̱li̱m. Di̱ne li̱mangu n ki̱n a yim yaka ya ki̱nangu, a mu ni̱ru we kukaku a ki̱tiyang bwangu a kau ki̱mi̱nbu chi dibwi. Ki̱ka̱ngu a swe a fa̱la̱ng ki̱yilang we ki̱di̱ng mati̱nang Kwamangu. 3Ti̱kur ki̱ni ki̱n wu a ma bwanu ki̱ni duum ki̱komu ni̱bu ki̱leti a ma ki̱mi̱ni̱mu, di̱ne ke a twidu chi̱n bwi we, wu ka yodu ta mar yo ni̱re chi̱n a ti̱me.

4We tukaku changu ti ki̱letiyangu, ta fi̱rbu yinangu ta lam fiya kurku ki̱tum change 5yinu ti̱tabu di̱kwa̱l kunmku ni̱rangu a yo ki̱yal chinu ko bwesi̱m ki̱m. “Bwemi, madu ti̱kali we ki̱ni ti̱welan Tewuduwentu,

6di̱ne n Tewuduwe ki̱do kana ni̱bu n ki̱n ki̱mi̱ladi̱m,

yinu ki̱wela bi̱bu a kau bwesi̱m ki̱me.”

7Ti̱mu ni̱ru we nwe riye ti̱nwedu di̱ne ti welane, n Tewuduwe ki̱ma chi mi̱nu yinang bwesi̱m ki̱m. Nang wuwule bwe n te ki̱n a welabe? 8Ka ta yabu ti̱welan ti̱tu a bwesi̱m Kwamami kwangite, n ti̱n bwesi̱m bi̱kusi̱m, n ke bwesi̱m bi̱yili̱m.

9Tebu chi̱remu a bi̱u nimu ki̱welati̱ nidu, yinu n chi̱ni ni ni chi dwiyentu. Yoye a labu chi ni yiu ti̱welan ti̱tu a Kwama siinetu ke ni swiya? 10Tebu chi̱remu a bwimu a ma nimi̱n ti̱welantu a baki̱swi bayim yinangu n chi a ku a dangu. Aya n Kwama ki̱wela nidu di̱ne ke n chi̱ni ni nwe ta̱ma̱ng, ni yiu ki̱ti̱me wauwadu yo ni swedu n ti ki̱ne. 11Ka nang ti̱ti̱le ti̱welane a li̱mbu we yo wuko ni ki̱yi̱de, aya we kutengu ki̱bedu ki̱ni yile n ti li̱mang we ni wu a ma nangangi ki̱ne.

Ki̱kure

12Di̱ne yiko, ti̱kuku fa̱li chiyu a bwaraniyu, ti̱rubi ki̱ri̱ng ti̱ti yinang. 13Ti̱ya der we wa̱ri bunti̱kiyu ke wu a rubu we ya̱m Kwamame a ledu we wa̱re di̱ne yayu chi̱n, n ti ki̱ki yikongu, bunge a ya rukku we Fi̱ki̱mu yinang naba burange ki̱ya beke.

14Ti̱funti̱bwi ti̱ma fiswe li̱mange n ti ni̱bi kwang, ti̱kabbi wauwadu di̱ne a ne ni ka ku Kwama we ka a newe ki̱ni wauwade. 15Ti̱maka yichiyu ke wuka a ledu wa̱re we, a kwaladu li̱me Kwama we, ti̱twar, kang ki̱ yinang ki̱ku a kwalan keku bi̱yili̱mange a kuneduwe tibe chi̱n, di̱ne ka a kunenge, nabwen ka kaiyadu di̱ne twiyen kange.

16Ti̱ma daan, ka nang wuwule niye a kaddu naba yariye we, ka wu a wulbi̱ tayi Kwamai yinang Yichuwa wu a mi kula ko wu a bwe wu kakke di̱ne kwele chabte wiine. 17Ki̱ni kutengu n ki̱n a no ke ka yiu delaku te ki̱nangu, aya ni̱bu a ko. N ki̱n a ya ti̱bu ki̱swi ka wo ki̱ti̱me, kasi ki̱ku n ki̱n a bau delaki̱ku ki̱ni ti̱mweniyangu.

18We kakku Kwamangu, ta tibu nang ku chi yinangu Yisrela a ku we kun Sinainangu, wu ni ka medu ka twaiye, fi ki̱rang ki̱ chadu yinang yinange, fi ki̱liye ti̱me a di̱ltene, n ti si̱kki̱n di̱duun. 19Ka kuku sumange, ka ker ki fwa yamine, a yo bi̱bu ki̱nwedi̱mu ki̱yidu ko a du ya̱mi yiko. 20Tayu a tau yo n chi a nwe n Kwama a fwa ko, “Kasi no nam a twaiyu kun Siyonanu we, ni̱bu ka fi̱badu kali ka bwadu.” 21Chi n chi a kuutu a kau chi tayi yinang, a lanti̱ Musa a yi ko, “Bwimiyu ki̱mi̱kadu di̱ne taye.”

22Aya n ti̱n ti̱be kasi ki̱ di̱n kun Siyona, n ti bi̱n Kwamanu wu ki̱ni ti̱kuriye, ka nang chikiye Wurchalima wu a diye, n ti muraku ki̱ku a furin mwemwen di̱du a ni̱bu ti̱tumbi̱ri Kwamamu kuneritu nabwen. 23Ti̱be bwa ni̱bu bunti̱ki̱me, bwesi̱m bi̱kaki̱m bi̱bu di̱nbi chitu we bwa diyemu. Ti̱be bwa di̱Kwama wu ka kaba ka nang wuwule niye mi̱nde, n ti fi fi̱ki̱m ni̱bu yilem bi̱bu ni̱bu a mar chi we mi̱ne. 24Ti̱be bwadi Yesuwe, wu n ki̱n a do bwa̱ki̱ ki̱fwiyangu we tibe Kwama n ti ni̱bi ki̱me, n ti fi a ki̱tuum bi̱bu ni̱bu a wabban nang ki̱tum Yesu bi̱bu a la bi̱u Abilamu.

25Ti̱ma daandaan, ti̱ kodu ker wu a fwa chimi̱ne ya̱me we. Nangki̱n ka ni̱bu a Yisrelamu a ko a nwebu Musa, wu n Kwama a tume a ti̱ti̱niye, a ne swidu we ti̱welantu, ka ni ko wu ki̱fwa nimi̱ne ya̱mu a bwadiye. 26We ki̱dan kangu ker Kwamanu a yingle ti̱ti̱nitu. Aya ki̱ka̱ngu a bwa̱u ko, “Mang suddu ne mang mi̱ku ka ti̱ti̱ni aya ti bwa diye.” 27Ya̱m bi̱bu a fwa ko, “Ki̱da ki̱ni̱mu” A yung ka tung chi n ki̱n a mi̱kitu, ka chakku chi n ki̱n a yo we ti̱ti̱nitu, ke ti̱tu ki̱diya kwadu a bwaditu a ya sweku. 28Yo kwer yani le yaa wu a tii ki̱ri̱nge, ni wana kwama ki̱ni li̱mbwi ni sii ki̱n ki̱ni tayi ni ni ki̱n dwiyentu. 29Nang ki̱n Kwama chire ki̱rang ki̱ku ki̱chidang.

Currently Selected:

Yibraniyam 12: Tula

Highlight

Copy

Compare