Yibraniyam 11
11
Keku bi̱yili̱mang
1Keku bi̱yili̱mangu nang yo ni̱re niyang tituwe ki̱ri̱ngching we chitu a mwintuwe a ne kwiyadu ka fweditu. Nangti̱ chitu niyang yo ni̱ru we aya niyang kuunbuwetu. 2Di̱ne keku bi̱yili̱mang chingu, n Kwama a ke ki̱ni seli̱bu feredimu. 3Di̱ne keku bi̱yili̱mange, ni swaan ko n Kwama a yo ti̱ti̱nitu ki̱ni di̱kwa̱l yiin ki̱n. Chi ni kuditu a chire a chi niyang kube, 4Di̱ne keku bi̱yili̱mange n Abila a ma niku ki̱tuumang ki̱ku a la wu Kayinu we. Di̱ne yiko n Kwama a yiu niku kangu a mar ki̱n a ni wu ki̱ tum yile, di̱ne n Kwama a nwe ta̱ma̱ng niki̱ kangu. N Abila a bwa, aya lanta di ni miya chi we keku bi̱yili̱mang kangu.
5N Kwama a da̱u Yenok ki̱ni ti̱kuri di̱ne keku bi̱yili̱mang kangu. A ne ni a yim fi n ki̱n wemi̱ne we. Di̱ne n Kwama a tu a da̱u ki̱n. Yo a tibu da̱u ki̱ne, di̱mwaru we ko n ki̱n a le ni̱r Kwamanu. 6Ka a ne keku bi̱yili̱mangu wenge, ka kaddu ki̱ni bwar n Kwama ka nwe ta̱ma̱ng chirengu, di̱ne a mwintuwe ni ka yadu ki̱dwan n ti Kwama, a ke bi̱yili̱mu ko Kwama n we, ki̱nika ki̱ti̱nti we bi̱bu bobu ki̱bau ki̱ni̱mu.
7Di̱ne keku bi̱yili̱mange, a kutengu n Kwama a ngau Nufu mi̱n ki̱kure we chitu n ki̱n a kubitu didinangu, a bunti̱ ya̱mu a do kwa̱mbi̱re mwe ke a yu loko. We keku bi̱yili̱mang kangu n Nuhu a mwata ti̱ti̱nitu mi̱ni ki̱ni kwang, N Kwama a yiu Nuhu a kau ni wuyile di̱ne keku bi̱yili̱mang.
8Di̱ne keku bi̱yili̱mange, n Yibrayim a ma kwa̱mbi̱r a bunti̱ wa̱re a yika ti̱mu a bwa̱u ki̱mi̱n n ki̱n ka chau kula komu. N ki̱n a tau wa̱re a yikan kasi ki̱ku a yimbu bwa n ki̱n kiyadengu. 9Di̱ne keku bi̱yili̱mange, n Yibrayim a swe yinang rungko we ti̱mu n Kwama a bwa̱u ka ni ki̱ni̱mu. Ki̱ swedu a ti̱kubi yinang Yichaku n ti Yakubu, bi̱bu n Kwama a bwa̱u ka ni ti̱n chi yinangu a bwa̱u Yibrahim mi̱nangu. 10Aya n ki̱n ki̱da̱ng bi̱ndi̱du ki̱ni tamiyu n Kwama nan naba mukke.
11We keku bi̱yili̱mangu Yibrayim kasi ki̱ku n ki̱n ki̱twanengu, n Saratu ki̱twa̱ne a ka̱ra̱na̱ng a bi̱bu chiyangu. N ki̱n a ke bi̱yili̱mu n Kwama ka ri bwa̱ki̱ kangu di̱ne n ki̱n nii wu yile. 12Aya we nii wu wiine wu a ka̱rani kuwe, a chire ti̱kubi̱ritu nabwen tiyang ki̱switi ya twiyen ti yane wa laa.
13Ni̱bu bi̱bu ki̱ni kwang a bwa ki̱ni keku bi̱yili̱mang, a yibbu chi n Kwama a bwa̱u ka niditu, aya n chi a ku ti̱chitu wu a kakku kutang, n chi a nwe ta̱ma̱ng yinangu a kuwangu, a ni di̱mwari kwa̱kwa̱ri ko n chi rungko, n ke bi̱bu a ti̱ti̱niim. 14Ni̱bu bi̱bu ki̱ma duum di̱mwari̱m bi̱bu ki̱yundi kwa̱rikwa̱ri ko chi bau ti̱m chim. 15Ka no n chi ki̱fwa ti̱m bi̱bu a chireweme, a no yadu n chi a ya da a ki̱lan. 16Aya n chi a yo ni̱ru ki̱babba ti̱m bi̱yili̱m bi̱bu a bwadiye, nang chi a yo a kabbu chi dibwi we di̱Kwama yanangu n chi ka yalu ko n Kwama chiyangu, we bi̱yili̱mu n ki̱n a do fi di̱ne chiye.
17Di̱ne keku bi̱yili̱mangu, yo n Kwama a swe Yibrayime, n ki̱n a ke ka ma niku ki̱tuumang ki̱ni bweko n Yichaku. N ki̱n a ke ka ni bwe ko n wiine. 18Kasi ki̱ku n Kwama a bwa̱u n ti ki̱n ko,
“N Yichaku nang wu
ni̱bu ka chakakku
kani̱n yali̱n di̱n muni ki̱ne.”
19N Yibrayim a kur ko, “N Kwama ka medu ka kukku kwa̱miyu. Ka ni da̱ng ri̱i̱nge, n Yibrayim a yiuwe Yichaku a bi̱bwari̱m.”
20Di̱ne keku bi̱yili̱mange n Yichaku a yo Yakubu n ti Yichuwa mi̱n delaku we a chi ka beditu.
21Di̱ne keku bi̱yili̱mange n Yakubu yo yaka bwade, a yo bwesi̱m Yusufu buraubi̱mu mi̱n delaku. N ki̱n a sii Kwama we ki̱dangu a wi bwikiyu a ki̱twalang.
22Di̱ne keku bi̱yili̱mangu ki̱dangu n Yusufu yaka bwadangu, a fwa ya̱m we chirku Yisrelamu we Masaru. N ki̱n a yi chi ko a yikani ki̱ni ti̱kuttu kitu ka n chi yaki̱ du ti̱m Masari̱me.
23Di̱ne keku bi̱yili̱mange, ni̱bu a lai Musa swarti ti̱ta a kutengu ni̱bu a bi̱n ki̱nangu. N chi a ma ying di̱ne ki̱yili̱n duum bweme. N chi a wultimbu tayi yilang mai yangu.
24Yo n musa a duyene di̱ne keku bi̱yili̱mange, a ko ni̱bu ka yi ki̱nu ko bwe fwa̱n Mai Firauna. 25N ki̱n a ke ka nwe riye n ti ni̱bu bunti̱ki̱ Kwamamu n ti ki̱ku ka nwe ta̱ma̱ng ki̱letiye a ba ki̱swi bayi̱me. 26We di̱ki̱ne a dang a le ki̱mi̱n ka nwe riye di̱ne Masiya n ti kiku ka nwedu di̱ne kuli Masar ritungu. Nangki̱n n ki̱n a fi̱rti̱ nu we li̱me wu ki̱bedu a kake.
27Di̱ne keku bi̱yili̱mange, m Musa a du Masar a nwebu tayi ki̱fwini mai. N ki̱n a mu ni̱ri ki̱ri̱ng a fi̱rti̱ nu we wu niyang kubu ki̱ne. 28Di̱ne keku bi̱yili̱mange, m Musa a ru Yiye Yabake. N ki̱n a wau ki̱tuumu we a kwa̱ti̱tu ke naba ditimbre chi̱ke a twaiyu bwesi̱m bi̱kaki̱m Yisrelame we.
29Di̱ne keku bi̱yili̱mange, n chi a bunti̱ Laa Rude#11:29 Yikayi tatikida ki̱yalu ko laa wu Wure. ki̱yaduwe yinang ti̱m bi̱kusi̱m. Aya yo ni̱bu Masari̱mu a kun ki̱nabi̱ chide, mwe a la a woti̱ chi.
30Di̱ne keku bi̱yili̱mange, yaa kwale Yeriko a yar yo ni̱bu Yisrelamu a kanang ki̱ da yidibine. 31Di̱ne keku bi̱yili̱mange, n Rahab di̱banu a swi we bwa wu a ni̱bu a kebu bi̱yili̱me, di̱ne n ki̱n a yiu ni̱bu Yisrela a ya ki̱ dele bi̱ni̱mu.
32Mang chakakku manni̱n fwadumi wureni? We dur Kidiyoni̱nu n ti Barak n ti Samsi̱n n ti Yefta n ti Dauda n ti Samayila n ti fa̱kubi̱bu. 33Di̱ne keku bi̱yili̱mange ni̱bu bi̱bu a chau ki̱la we ti̱ti̱nitu a tum yile, n chi a yiu ti̱n chi n Kwama a bwa̱be. N chi a yinge turumtiyu mi̱n yii. 34N chi a chi̱u ben ki̱rangnu, n chi a swi we yiki̱ne kulle, a yo bubbuke chi a kau chimi̱n dukan. N chi a tii ki̱ri̱ng we kunu, a yai ni̱bu kuni̱mu a ti̱ti̱nimu.
35Nati̱bu a yiu kwa̱mi chiyu ni̱bu a kukkutuwe ki̱ni ti̱kuriyu. Ni̱bu a ni bi̱kamu riye, n chi a ke riye wu di̱ne n chi a yo ni̱ru ki̱bau ti̱kuri ki̱diya kwadi n ti kiku ka swedu a fura ti̱ti̱niyangu. 36Ni̱bu a fita bi̱kamu, a twallan bi̱kamu, a kwaba bi̱kamu ki̱ni maklan, bi̱kamu a le di̱bi̱nti̱l. 37Ni̱bu a kwela bi̱kamu ki̱ni kali, aya bi̱kamu a mwatani rwa̱rwa̱du, a chi̱u bi̱kamu ki̱ni kulli. Bi̱kam bi̱bu a tau Kwama chi ki̱mu ki̱bwa̱lu ki̱ni ti̱bali̱n kwanti n ti ti̱tu a siiti. N chi a nwe riye ki̱ni fa̱liyu kwako a ne chiwe. 38Ti̱ti̱nitu a le chi mi̱nbu. Ni̱bu Kwama bi̱bu a le ti̱kibitu a fi̱la kunitu ki bwaluwe. N chi ki̱dadu a kunni n ti bwar ti̱tu a ti̱mi.
39Ni̱bu bi̱bu ki̱ni kwang n Kwama a ma di̱mwar keku bi̱yili̱mang chiyangu ko a le. Aya ki̱ni yiko, a ne ni a yiu chi n Kwama bwa̱bite we. 40N Kwama a do chitu a leletu nabwen di̱ne chi̱ni aya we ti̱kuran kiitu n chi a ne ka ya chitu a bwa̱ubi kwangintu ka n ke ka yadu ware n ti chiniye.
Currently Selected:
Yibraniyam 11: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
