Afisam 4
4
Kunkaku a di̱n Yesun
1Di̱ne yiko, m mi̱n wu mang le di̱bi̱nti̱lu di̱ne bunti̱ki̱ Tewuduwe, mi̱n wana chi̱nu, ti̱ma fiswe wu a daka naba bunti̱ke, di̱ne n Kwama a yal chi̱ne. 2Kanang wuwule diye, ti̱kau ni̱bu ki̱ni ni̱ri bubbuki̱m, bi̱bu a kukkubi̱ dutu chiiti̱mu. N kawure a ma fatemi̱n bwanu, kasi no ni̱r fatenu a lebu ti̱kekan di̱ne mi̱lake. 3Ti̱funti̱ bwi ti̱kabbi wiin we kunkaki̱ku yo Fi̱ki̱m Kwamamu a yo ta kabbi wiine, ti̱bwa̱u yichiyu a fiwiine ti̱naang ma fiswe li̱mange.
4N chi̱ni ki̱ni kwang ni kau kwa̱li diin yinang bwi wiin, ki̱ni Fi̱ki̱m bi̱biini̱m. Yinangu a sutu chi̱ni ki̱ni kwangangu, ni yo ni̱ru ni chau ta̱ma̱ng di̱yal ki̱nu. 5Tewuduwe wiin, keku bi̱yili̱mangi kiin, yinu batisma chire wiin ti̱n. 6Ti̱nti̱ne Kwama wiin, n nang Te ki̱ni kwang, wu ki̱ma mati̱n chi̱reti kwange, nang wu ki̱ma nangangu we bwi chireyu n ti bwiti chireyi kwang. 7Aya n ki̱n a ni ka nang wuwule chire wuko yili̱n ki̱ti̱me, ki̱ti̱me wu n Masiya ki̱nidu yinangu n ki̱n a ku a daangu. 8Nang chi a yo ya̱m Kwamamu a fwa ko,
“Yo n ki̱n a yika kutane,
a yikan ki̱ni ki̱tu ka̱biye nabwen,
yinu a nika ni̱bu ki̱mu ki̱ti̱nti.”
9Ya̱m Kwamam bi̱bu a fwa ko, “A fi̱l diim bi̱bu” ki̱yung wureni? Ti̱tu ki̱yungdu m Masiya a bete ti̱ti̱ni ti̱tu a ne dwiyen wetu. 10N ki̱n wu a suwe ti̱ti̱ni ti̱te, nang wu wiine wu kutan bwana fi̱le a sutu ti̱kantu ti̱ti̱ni dii kwange, ko ke ki̱yung dwiyen kitu we tanti̱lange ti̱ti̱niye kwang.
11N ki̱n nang wu a nika ni̱bu bunti̱ki̱mu ki̱ti̱ntiye. Kanang chikiye, fandubi̱bu, n ti Fa̱kubu Kwamamu, n ti ni̱bu mwaramu, n ti fansetiyu n ti ni̱bu yungki̱mu. 12Nangang kawurengu n nang chi ka do ni̱bu bunti̱ki̱mu ke a ma nangang Kwamangu, ke bi̱bu ki̱bunti̱n Masiya Yesunmu, a dwiyen we fi̱ki̱mu. 13A mwintuwe kunkaki̱ ki̱ku ka chakakku we keku bi̱yili̱mang chirengu n ti yingku Bwe Kwamangu yinu ni kau bi̱bu ki̱ni ki̱kwim, ni dwiyedu we Tewuduwe. Yinu ni kadu yinang Masiya we yile.
14N chi̱ni neni ki̱ladu ni kaddi bubbuku we fi̱ki̱mu yinang bwesi̱mu a ruburubem, bi̱bu ki̱sute keku bi̱yili̱mang chiyangu yinang yayu ki̱fi̱bemu, a ne ni du bi̱bu a me fwaku ti̱kwani yinangu ki̱fwa bi̱yili̱mange ka chakakku. 15N ti ki̱ku ka kaddi yikongu, ni tidu we fwaku bi̱yili̱mangu di̱ne mi̱laki̱, niyang funti̱bwi ni ya suteku kwakwadang, ni kau yinang Masiya wu n ki̱n nang duru we ni̱bu bunti̱ki̱me.
16N ki̱n a ya bwiyu ki̱ni kwang a di̱katuwe a fiwiine yi medmed. Yo fantiyu ki̱man nangi̱ntu a daka kawurete, ki̱maka yikayu fanti we bwiyu ki̱dwiyedu. Ti̱tu ki̱ni bwiyu li̱mang, ki̱dwiyedu ki̱laan fiko, ki̱ni mi̱laku.
Da wu fwi a di̱Masiya
17Di̱ne yiko mi̱n wu chimi̱n ki̱teliyu a di̱n Tewuduwe, aya mi̱n fwa chimi̱nu, a dakabi̱ ta chakakku ki̱ni da wu a kuuti, wu a ri ki̱ni ti̱kuran ti̱tu ditiye. 18Ti̱kuran chitu a tibebu, di̱ne n chi a mwatanbuwe chi a leetu n ti ti̱tu a lebitu, n chi a yabu we yiiku Kwamangu, di̱ne kwalan swaangke a di̱chiye, n ti ni̱tu chiti ki̱ngki̱ngitu. 19Kangu a fwerabangu, n chi a ni dutu chitu ki̱ya yayu wu a ti̱kuliye n ti duum dati yikusiyi kwang.
20Aya ti̱tu n ke chi a no ta miyan a yingku Masiyange. 21We bi̱yili̱mu ti̱ nwe ya̱m Yesumu, ti̱ya miyaku we bi̱yili̱mu a di̱ki̱nemu yinangu ni ya yayu wu a dakanengu. 22Ti̱du da bwiye n ti wa̱ri yika̱ri chiyu, yiyu a fwi swi a ri ki̱ni kana ti̱kwani n ti kubekiyu. 23N ti ki̱ki yikongu, ti̱du fi̱ki̱m Kwamamu a sute ti̱kuran chi̱ntu ke ti̱ya yayu wu fwiye. 24Ti̱da̱u ni̱r di̱fwin, di̱du yinang Kwamanu di̱du a yile n ti wauwade Kwamanu.
25Di̱ne ka nang wuwule niye a du ti̱kwanitu a fwa bi̱yili̱m n ti keko, di̱ne n chi̱ni kwang a bwi wiin. 26Ti̱madu ki̱lewe ki̱ni ki̱fwini di̱ne kaiyan ni̱re, ti̱dudu di a leduwe n ti̱n we ki̱ni ki̱fwini. 27Ti̱nidu Setan da we ko bayim ki̱dangu ti̱ma ki̱fwiniyangu. 28Nii ki̱ma kuute a lwaduwe, aya n kawure a funti̱bwi a ma nangangu ki̱ni fa̱li ki, wu ka ya chitu nabwene, a makati̱ bi̱bu a yabi̱mu.
29Ti̱fwadu ya̱mi yi bwilayu we, ti̱tudu ni we, chitu ta fwaditi kwang a sudu bi̱bu ka kadu ki̱ni makaki̱mu we, di̱ne ke ya̱m chimu a kau bi̱bu ka maka ni̱bi̱m.
30Aya ti̱yo Fi̱ki̱m Kwamamu mi̱nu kaiyan ni̱re we dati chiyu a lebiyu. Ti̱tabbi̱du we, n ki̱n nang wu ki̱yungdu n ti̱n n bi̱u ki̱ne. Kanang chikiye ki̱ni da ta ya yuku we di swan kute. 31Ti̱chaku muti̱ne ni̱re n ti chi kaiyan ni̱re n ti ki̱fwini n ti swa̱ba ku n ti rabi̱ki̱ya̱ma̱ngu ti̱turan n ti kanang wuwule ki̱duum bwilame n ti kasi no di̱di̱le muli̱n.
32N ti ki̱ki yikongu, ti̱nwe ki̱bune yichiye, ti̱du ni̱bu mi̱n ki̱leti chiyu yinangu n Kwama a du nimi̱n a di̱Masiyangu.
Currently Selected:
Afisam 4: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
Afisam 4
4
Kunkaku a di̱n Yesun
1Di̱ne yiko, m mi̱n wu mang le di̱bi̱nti̱lu di̱ne bunti̱ki̱ Tewuduwe, mi̱n wana chi̱nu, ti̱ma fiswe wu a daka naba bunti̱ke, di̱ne n Kwama a yal chi̱ne. 2Kanang wuwule diye, ti̱kau ni̱bu ki̱ni ni̱ri bubbuki̱m, bi̱bu a kukkubi̱ dutu chiiti̱mu. N kawure a ma fatemi̱n bwanu, kasi no ni̱r fatenu a lebu ti̱kekan di̱ne mi̱lake. 3Ti̱funti̱ bwi ti̱kabbi wiin we kunkaki̱ku yo Fi̱ki̱m Kwamamu a yo ta kabbi wiine, ti̱bwa̱u yichiyu a fiwiine ti̱naang ma fiswe li̱mange.
4N chi̱ni ki̱ni kwang ni kau kwa̱li diin yinang bwi wiin, ki̱ni Fi̱ki̱m bi̱biini̱m. Yinangu a sutu chi̱ni ki̱ni kwangangu, ni yo ni̱ru ni chau ta̱ma̱ng di̱yal ki̱nu. 5Tewuduwe wiin, keku bi̱yili̱mangi kiin, yinu batisma chire wiin ti̱n. 6Ti̱nti̱ne Kwama wiin, n nang Te ki̱ni kwang, wu ki̱ma mati̱n chi̱reti kwange, nang wu ki̱ma nangangu we bwi chireyu n ti bwiti chireyi kwang. 7Aya n ki̱n a ni ka nang wuwule chire wuko yili̱n ki̱ti̱me, ki̱ti̱me wu n Masiya ki̱nidu yinangu n ki̱n a ku a daangu. 8Nang chi a yo ya̱m Kwamamu a fwa ko,
“Yo n ki̱n a yika kutane,
a yikan ki̱ni ki̱tu ka̱biye nabwen,
yinu a nika ni̱bu ki̱mu ki̱ti̱nti.”
9Ya̱m Kwamam bi̱bu a fwa ko, “A fi̱l diim bi̱bu” ki̱yung wureni? Ti̱tu ki̱yungdu m Masiya a bete ti̱ti̱ni ti̱tu a ne dwiyen wetu. 10N ki̱n wu a suwe ti̱ti̱ni ti̱te, nang wu wiine wu kutan bwana fi̱le a sutu ti̱kantu ti̱ti̱ni dii kwange, ko ke ki̱yung dwiyen kitu we tanti̱lange ti̱ti̱niye kwang.
11N ki̱n nang wu a nika ni̱bu bunti̱ki̱mu ki̱ti̱ntiye. Kanang chikiye, fandubi̱bu, n ti Fa̱kubu Kwamamu, n ti ni̱bu mwaramu, n ti fansetiyu n ti ni̱bu yungki̱mu. 12Nangang kawurengu n nang chi ka do ni̱bu bunti̱ki̱mu ke a ma nangang Kwamangu, ke bi̱bu ki̱bunti̱n Masiya Yesunmu, a dwiyen we fi̱ki̱mu. 13A mwintuwe kunkaki̱ ki̱ku ka chakakku we keku bi̱yili̱mang chirengu n ti yingku Bwe Kwamangu yinu ni kau bi̱bu ki̱ni ki̱kwim, ni dwiyedu we Tewuduwe. Yinu ni kadu yinang Masiya we yile.
14N chi̱ni neni ki̱ladu ni kaddi bubbuku we fi̱ki̱mu yinang bwesi̱mu a ruburubem, bi̱bu ki̱sute keku bi̱yili̱mang chiyangu yinang yayu ki̱fi̱bemu, a ne ni du bi̱bu a me fwaku ti̱kwani yinangu ki̱fwa bi̱yili̱mange ka chakakku. 15N ti ki̱ku ka kaddi yikongu, ni tidu we fwaku bi̱yili̱mangu di̱ne mi̱laki̱, niyang funti̱bwi ni ya suteku kwakwadang, ni kau yinang Masiya wu n ki̱n nang duru we ni̱bu bunti̱ki̱me.
16N ki̱n a ya bwiyu ki̱ni kwang a di̱katuwe a fiwiine yi medmed. Yo fantiyu ki̱man nangi̱ntu a daka kawurete, ki̱maka yikayu fanti we bwiyu ki̱dwiyedu. Ti̱tu ki̱ni bwiyu li̱mang, ki̱dwiyedu ki̱laan fiko, ki̱ni mi̱laku.
Da wu fwi a di̱Masiya
17Di̱ne yiko mi̱n wu chimi̱n ki̱teliyu a di̱n Tewuduwe, aya mi̱n fwa chimi̱nu, a dakabi̱ ta chakakku ki̱ni da wu a kuuti, wu a ri ki̱ni ti̱kuran ti̱tu ditiye. 18Ti̱kuran chitu a tibebu, di̱ne n chi a mwatanbuwe chi a leetu n ti ti̱tu a lebitu, n chi a yabu we yiiku Kwamangu, di̱ne kwalan swaangke a di̱chiye, n ti ni̱tu chiti ki̱ngki̱ngitu. 19Kangu a fwerabangu, n chi a ni dutu chitu ki̱ya yayu wu a ti̱kuliye n ti duum dati yikusiyi kwang.
20Aya ti̱tu n ke chi a no ta miyan a yingku Masiyange. 21We bi̱yili̱mu ti̱ nwe ya̱m Yesumu, ti̱ya miyaku we bi̱yili̱mu a di̱ki̱nemu yinangu ni ya yayu wu a dakanengu. 22Ti̱du da bwiye n ti wa̱ri yika̱ri chiyu, yiyu a fwi swi a ri ki̱ni kana ti̱kwani n ti kubekiyu. 23N ti ki̱ki yikongu, ti̱du fi̱ki̱m Kwamamu a sute ti̱kuran chi̱ntu ke ti̱ya yayu wu fwiye. 24Ti̱da̱u ni̱r di̱fwin, di̱du yinang Kwamanu di̱du a yile n ti wauwade Kwamanu.
25Di̱ne ka nang wuwule niye a du ti̱kwanitu a fwa bi̱yili̱m n ti keko, di̱ne n chi̱ni kwang a bwi wiin. 26Ti̱madu ki̱lewe ki̱ni ki̱fwini di̱ne kaiyan ni̱re, ti̱dudu di a leduwe n ti̱n we ki̱ni ki̱fwini. 27Ti̱nidu Setan da we ko bayim ki̱dangu ti̱ma ki̱fwiniyangu. 28Nii ki̱ma kuute a lwaduwe, aya n kawure a funti̱bwi a ma nangangu ki̱ni fa̱li ki, wu ka ya chitu nabwene, a makati̱ bi̱bu a yabi̱mu.
29Ti̱fwadu ya̱mi yi bwilayu we, ti̱tudu ni we, chitu ta fwaditi kwang a sudu bi̱bu ka kadu ki̱ni makaki̱mu we, di̱ne ke ya̱m chimu a kau bi̱bu ka maka ni̱bi̱m.
30Aya ti̱yo Fi̱ki̱m Kwamamu mi̱nu kaiyan ni̱re we dati chiyu a lebiyu. Ti̱tabbi̱du we, n ki̱n nang wu ki̱yungdu n ti̱n n bi̱u ki̱ne. Kanang chikiye ki̱ni da ta ya yuku we di swan kute. 31Ti̱chaku muti̱ne ni̱re n ti chi kaiyan ni̱re n ti ki̱fwini n ti swa̱ba ku n ti rabi̱ki̱ya̱ma̱ngu ti̱turan n ti kanang wuwule ki̱duum bwilame n ti kasi no di̱di̱le muli̱n.
32N ti ki̱ki yikongu, ti̱nwe ki̱bune yichiye, ti̱du ni̱bu mi̱n ki̱leti chiyu yinangu n Kwama a du nimi̱n a di̱Masiyangu.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.