2 Timoti 2
2
Naba ki̱rannge Masiya wu yile
1Bwe mi Timoti m Mi̱lan, ti ki̱ri̱ng we li̱me wu n Kwama a ni̱n a di̱n Yesu Masiyane. 2N nwe yinangu ya mi̱n miya chi ni̱bu nabwen a ke ki̱ne. Miya ni̱bu ka medu ka ma nangang ki̱ni ya̱m bi̱bi̱mumi̱n ya̱m bi̱yili̱mu.
3Mu ni̱ru we nwe riye yinangu mang muwangu, yinang naba ki̱range wuyile wu Yesu Masiya. 4We tiku mwangu ki̱ku a naba ki̱range wu yile Masiyangu, kedu chi ka da̱u ti̱kuran mwite we, ka fwe yiko, a ne mwang ma nii wu a yali̱nemi̱n chi ki̱badde. 5Ti̱bunti̱ yili̱n Kwamatu we maku nangang ki̱kangu, yinangu bi̱bu ki̱ swa̱ka̱ bananimu a ne chau ki̱la, a mwituwe ka bunti̱n yili̱ntu. 6Naba kuwe a ma nangangu yinange, nang ni a no dakan ka mwedu ka chau li̱mang kuwange. 7Ma ti̱kuran we chi mi̱n fwaditu, N Tewuduwe ka ni chi̱n swaanki̱ku we ya̱miyu ki̱ni kwang.
8Tabbi̱du Yesu Masiya we wu ni̱bu a bi̱u a di̱kur Lon Dauda ne. N Kwama a kukku ki̱n we fure. Bi̱bu nang ya̱mu mi̱n fwadi̱mu. 9Aya di̱ne mi̱n fwa ya̱m bi̱be, mi̱n nwe riye wu ni̱bu a kwabai ti̱n ki̱ni maki̱lan yinang ni wubwila. Aya a ne ni ka kwau ya̱m Kwamame we. 10Di̱ne yiko m mi̱n m mu ni̱ru mang tur kasi wuwule riye wu ka bedu ki̱ni yuku n ti dwiyen ki̱diya kwadi we bi̱bu Kwama a sutu chimu.
11Yam bi̱bu ya̱m bi̱yili̱m:
Ka ni bwa ware n ti ki̱ne,
ni swe ti̱nu ware n ti ki̱n.
12Ka ni mu ni̱ru we riye,
ni ma mati̱ntu n ti ki̱n ware yinang mati̱m.
ka ni yi ko niyang yimbu ki̱ne,
n ki̱n ka koti̱ chi̱ni.
13Ka ni a tumbu bi̱yili̱me,
yile a sutebu we di̱ki̱ne
n ki̱n a ne mwe dur ki̱nu mi̱n ti̱kwanitu.
14Kur ka nang wuwule niye mi̱n ya̱m bi̱bu, yi chi we di̱n Kwamanu mwi a du tukaki̱kku a ti̱kwa̱li yii ti̱kusiyangu. Duum tukaki̱m bi̱bu bi̱kusi̱m. Ka kai bi̱bu ki̱nwedi̱mu. 15Aya funti̱bwi li̱ma Kwama ni̱r yinangu a dakanang. Ti yinang ni ki̱ma nangangu a nwebu dibwi we nangang kange, ti̱nti̱ne nang miya di̱kwa̱l Kwamanu, sudu chi we.
16Kedu ya̱mi yikusiyu n ti yiyu ki̱madu yinangu ni n ke naba Kwamayu we. Ya̱mi yiyu ki̱sudu ki̱kai ni yinangu n ke naba Kwama. 17Duum ya̱mim bi̱bu ki̱ti̱radu yinang di̱nti̱le. N Yimeniya n ti Filetus n wetuwe ni̱bu bi̱bu ki̱fwa duum ya̱mim bi̱bi̱mu. 18Ni̱bu bi̱bu a du bi̱yili̱mu we, kiyi ni̱bu ko kunku futangu a tu a su. We ki̱swi wu, n chi a yo bi̱kamu ni̱bu nabwen a du wa̱re keku bi̱yili̱mange.
19Aya ni̱bu Kwamamu yinang tame wu a ne mi̱kade. Ya̱m Kwamamu a mwal ko, “N Kwama a yim bi̱ki̱mu,” Ti̱nti̱ne n ki̱n wu ki̱ ngau kwiye ko n ki̱n wu Kwama, a du nangi̱n ti̱bwilaitu.
20We lo naba kuliye, yikayu kutai a ma ki̱ni si̱nariya n ti asurfa yinu yikayu a ma ki̱ni tini n ti swani. Kuli̱n di̱yili̱nu a yo di̱ne diti yei ka di mabwiye. Aya kuli̱n tini̱nu n ti di̱du a swani̱nu a yo ki̱n di̱ne diti yikusi. 21Ka n du yimwiyu yinang Kwama, mwang kau kuli̱n di̱du n Kwama ka ma nanga ki̱ni̱n. Di̱ne yiko, wu ka du yikiyu yinang Kwama, ka kau kuli̱n nangang di̱yili̱n a ki̱swi a dakane. Dako kanodi wauwad, Tewuduwe ka nwe ta̱ma̱ng, di̱ne n ki̱n a do bwi ka ma chi a dakane.
22Wulmi̱n we kasi no ti̱ti̱le chi ti̱tu ki̱yo duum kubeki̱mu a kal tayonitu. Funti̱bwi tau nangang yilengu ki̱ni dukan, keku bi̱yili̱mangu n ti mi̱laku n ti li̱me. Ti̱ma fiswe fati̱ne n ti bi̱bu a ke bi̱yili̱m ki̱ni ni̱ri diini̱mu.
23Kedu bunti̱nu ni̱bu ki̱fumbwi a kana ti̱turan ti̱kusi ti̱tu ki̱yo ti̱kulanimu we. 24Aya naba nanga Kwama a dakabu kani̱n mana ti̱kulani n ti ni̱bu. N ki̱n a nang miya ya̱m Kwamamu yinangu a dakanang, a nang ma bwanu ki̱ni ni̱bu a ma bwari̱mu. 25Ki̱ni bubbuke ni̱re, miya ni̱bu mi̱n a swaan ya̱m bi̱yili̱mu. Ka n Kwama we ni chi ki̱swi ka wo ki̱ti̱me. 26Yinu yo ti̱kuran chitu ka ki̱lade, n chi ka chiru we la̱nu n Setan a tan chi̱nu ke a bunti̱ chi n ki̱n ki̱baddite.
Currently Selected:
2 Timoti 2: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
