2 Koronti 7
7
1Fati̱bi̱ mi̱m, yo niyang ya bwa̱ki̱ku nang ki̱kiye, ni chaku yichireyu we ti̱bwitantu n ti chi ki̱kai ni̱tu ka bwi chireyetu. Ni funti̱bwi ni bau kasi siiku Kwama, di̱ne n chi̱ni ni nwe tayi Kwamaye.
Ti̱mi̱la Bulusin
2Ti̱yung ni̱n mi̱laki̱ changu. Di̱ne nang mabu wuka nii mi̱nbi̱ ki̱le, nang kaiti̱bu wuka nii, nang sul ti̱bu wuka ni. 3Mang yo chimi̱nbi ki̱le yinangu mang fwa yangu, yinangu mang wi mang fwa chimi̱nangu, a ne chi ka yarka chi̱nu n ti mi̱laki̱ nange we, ka a bwange ka ti̱kuriye. 4N ke ki̱ni chi̱n yinang. Mi̱n ngatti̱ kwiye ki̱ni chi̱n, ti̱ru mi̱nu, mi̱n ma furi mwen, ki̱ni riye ni̱n nwede kwang.
5Kasi no nang ki̱dangu nang be Makidoniya, nang yabi̱ fi̱kaku. Kasi no ni̱n ya bwa̱le ka ti̱kwa̱ma̱n, ti̱kwa̱ma̱ntu wetuwe fi̱langu, we mure ni̱re tayu a ri bwiyu. 6Aya n Kwama wu ki̱ru ni̱tu bi̱bu a yobu ni̱ri̱mu, a ru ni̱n we beki̱ Titusangu. 7Nang mabu furi mwenu di̱ne kana beki̱ kangu, aya ya̱m bi̱bu a fwa ni mi̱ni̱mu a yo ke ni ya kunkaku changu. A fwa ni̱mi̱n yinangu ti̱bau numi yinangu, n ti kaiyan ni̱re ta ma di̱ne chi a fwe n ti mi̱ne, n ti yinangu ta funti̱bwi ta ti mituwe ki̱ri̱ngu, ti̱tu a yo n nwe ta̱ma̱ng yinang.
8Kasi no lwangi̱n mi̱nu a yo chi̱ni kaiyan ni̱ri, a buibu ni̱r. A no n kai ni̱r yo ferediye di̱ne mang ku lwangi̱nu a kai chimi̱n ni̱re, kasi ki̱ku a baki̱ swi bayim a newe nabwenangu. 9We yiko yinangu chitu ki̱yadangu, ni̱r mi̱ni mwe. Kasi ki̱ku mang nwebu ta̱ma̱ng yinangu mang kai chimi̱n ni̱rangu, aya kaiyan ni̱re chi̱n a yo suteku ni̱rang di̱ne ta wo ki̱ti̱me. Kaiyan ni̱re chi̱n a letuwe ki̱ke Kwama, di̱ne a yo chi wo ki̱ti̱m, nang ma chimi̱nbu ki̱le we chi nang ma chimi̱nitu. 10Nangki̱n, kaiyan ni̱re wu a be a dukan Kwamane, ka yo ni̱bu ka wo ki̱ti̱m, ka ki̱la bwa di̱Kwama, we yiko n ka, ka ya yuku. Ti̱nti̱ne a ne no ka no n yimme we. Aya kaiyan ni̱re wu ni a ki̱ bedi ki̱ne ki̱yo ni a bwa.
11Ti̱da̱ng chi kaiyan ni̱re wu Kwama yo ni̱tu chi̱ntu a be chimi̱ne ki̱nitu. A yo ti̱bau nangangu, ti̱keti̱ ki̱taku changu. A yo ti̱ma ki̱fwini, ti̱nwe tayi. A ni chi̱n yo ni̱re, ti̱funti̱ bwi. A yo ti̱swe ki̱ni doku bwiyang, ti̱ke ta ku ti̱welan ti̱tu a dakani. We ti̱tu fal, ti̱funti̱ bwi we wa̱riyi kwang ta kebu ta ma ki̱le. 12Ki̱dangu mang mwale lwangi̱n di̱dangu, m ma di̱ne nii wu a ma ki̱le, ka nii wu ni̱bu a ma ki̱mi̱n ki̱lenge. N ti ki̱ki yikongu n mwal chimi̱n di̱ne ke n fwa chimi̱n mi n Kwama a yim ko ti̱mi̱la ni̱n yinang yinang. 13Nang chi a yo ni̱tu ni̱ntu a kummi buke.
A bwin ni̱tu ni̱ntu a kummitu, lanta di ni̱n ma furi mwen di̱ne furi mwenu n Titus kikundi̱nu, di̱ne n ti̱ni ki̱ni kwang ti̱maka ki̱n a ya kunki̱ ni̱rang ki̱ku. 14Aya kasi no n fwa ki̱mi̱n mi mi̱n ngau kwiye ki̱ni chi̱n, n ke chi dibwi. We yiko yinangu chi nang fwa chimi̱ne kwang ka bi̱yili̱mangu, we yiko ti̱n ngakku kwiye nangu ki̱ni chi̱n a kau bi̱yili̱m we kabu Tituse.
15Mi̱laki̱ku n Titus ki̱ma chimi̱ndangu, ki̱chakakku yinang ka a kur kwa̱mbi̱r chi̱nangu, n ti nabwe dwiyene ta ni ki̱n we ki̱dangu ta yiu ki̱nangu. 16Mi̱n ma furi mwenu ki̱ka̱ngu di̱ne n yo ni̱r we di̱chine yinang.
Currently Selected:
2 Koronti 7: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
