1 Timoti 5
5
Miyaku a chi naba bunti̱ke a dakan ka made
1Aya Kwabi̱du sele we ki̱ni ti̱kwa̱li ti̱tu a dabitu. fwa ya̱mu n ti ki̱n yinangu mun fwadu n ti temunang. Ma bwebi̱li̱mu yinang kebi̱mum. 2nati̱m bi̱seli̱mu yinang nebumum, yinu nati̱m fwa̱ni̱mu yinang kebumum, ki̱ni da wu wulake.
Chi a da we nabune, sele n ti ka̱be
3Maka nati̱m buni̱mu ki̱ma bunti̱ki̱mu bi̱bu a ne ni ka maka chidu wemu. 4Aya ka na bune ki̱ni bwesi̱m ka bukebe, n chi ka mwe miyaku siiku Kwama ki̱ni da̱ngku ni̱bu lom yinu di̱ne ye kani̱n fe ba bi̱u chimu n ti tukebu chimu, ti̱tu nang chi ki̱ywa̱tu Kwama. 5Aya nabune siin wu a yo ni̱ru ko Kwama ka maka ki̱ne, nang wu ni̱bu Kwamamu ka titi̱nu we ki̱ri̱nge, wu kum n ti kuko ki̱twa̱ba̱ buni ko Kwama a wudu ki̱mi̱n kwa̱ru we chi ki̱badde. 6Aya na bune wu ki̱ma da wa ywa̱ta̱ku dur ki̱ne, a kau kwa̱me yo ki̱n we ki̱ni ti̱kuriye. 7Ti̱yung ni̱bu dawu, ti̱nti̱ne di̱ne ke wuka nii a yadu ki̱le we.
8Aya ka wuka nii a ko a da̱bbu nangang kange, yinu a la chi ti̱n ka n ki̱n a mebu a da̱bbu tureng lokonge, n ki̱n a kwila keku bi̱yili̱mamang kangu a lati̱n wu a kebu bi̱yili̱mange ki̱ni bwila.
9A ne nabune ni̱bu ka di̱ki̱du a kwa̱l nati̱m buneme we ka n ki̱n a lambu swa̱ti̱tu wanturukune, yinu n ki̱n a no ki̱ma fiswe ni̱ri diin n ti kwartako. 10N ki̱n a dakan naye wu ni̱bu a yim we bi̱bu ki̱funti̱ bwim di̱ne nangi̱n ti̱yilitu ki̱madu a nangan Kwamantu, n ki̱n naye wu ki̱li̱re bwesi̱m ki̱mu yinange wu ki̱yiu rungko ki̱ni furi mwe, ki̱ma chi min chi a dakane, wu ki̱ma ni̱bu Kwama mi̱n nanga a ware dangtidangti wu ki̱maka ni̱bu ki̱ni burang nurange ki̱ma chitu a datu nabwen.
11Aya nati̱m buni̱m bi̱ti̱ri̱mu, kedu n di̱ki̱du chi we kwa̱l nati̱m buni̱mu. Aya ka rungku bwiti chiyangu a yabu yoku ni̱r chiyangu we di̱Masiya, n chi ka baddu ka ma ki̱na. 12Di̱ne yiko kano ki̱ya ti̱welan Kwamai we bwa̱ki̱ kangu a kiyangu. 13A bwin yiko, makaki̱ku ka be nabune fwa̱ne mi̱nedu ki̱ni bubbuke, kano ki̱ma ka di̱bwal a loni ni̱bi. A bwin yiko, kano ki̱le ti̱fwaran kiyi ni̱bu ko no madi ying ka ye. Bi̱bu ya̱m no n ke bi̱chim.
14Di̱ne yiko, mi̱n yi nati̱n buni̱m fwa̱ni̱mu mi a mati̱ ki̱na we. A chakakku ki̱ni bi̱be, a tau kwartabi̱ chimu fa̱li yurau n ti bwesi̱mu n ti chi yo kangetu. We wu bale Fakware a ne ya da we di̱chiye. 15Kangu mi̱n fwadi yangu, bi̱kamu a tu a twa̱ng wa̱re ki̱bunti̱ nani Setan.
16Ka wuka na bunti̱ke ki̱ni nati̱m buni̱m we loko, a dakan ka maka chidu, a ne ka du ka ni̱bu bunti̱ki̱m mi̱n turengu, ke n chi a maka bi̱kamu nati̱m buni̱m bi̱bu a mwan a lusani̱mu.
17Ni̱bu bunti̱ki̱mu a ni seli̱bu ki̱mibadi bobu we nangang Kwamamu dwiyentu a ma chimi̱nti̱ ki̱li̱mang. 18Nangki̱n, ya̱m Kwamamu a yi ko, “Ti̱yingedu yii tanka we yo ki̱su ti̱me.” Ti̱nti̱ne, “Nii ki̱ma nangange a dakan ka ya ki̱ti̱me.”
19Ti̱yi̱ddu ki̱mwa̱rang we a dur wuka selen ka n ke ta nwedu a yiini ni̱bi burau ka bi̱tange. 20Ka nang wuwule niye wu a ya ki̱take, a dakan ni̱bu ka weladu a tibe kwa̱l ni̱bu bunti̱ki̱me, ke bi̱kamu a ya miyaku we.
21Mi̱n fwa mi̱nu ki̱ni dukan we kakku Kwamangu n ti Masiya Yesu, n ti ni̱bu ti̱ti̱mbi̱rim bi̱swabi̱ri̱mu, mi̱n ngau mi̱n ki̱kure, ma nangangu ki̱ni ya̱m a ne sutuku we. 22Ti̱wa̱rta̱duwe wa̱rta̱ne we yoku fa̱liyangu, ti̱subati̱nu we ki̱leti bi̱kamiyu, ti̱tai yichiyu yi walak.
23Nodu ka mwe we, aya nan twai ti̱n mwe yinabiye yi bayim di̱ne furmunu n ti buri̱ntu ki̱kwa̱manitu.
24Ki̱leti bi̱kamu ni̱bu yi kwa̱rikwa̱ri, yinu ki̱lanti̱ fi a kabake ki̱kuti̱ chi; Aya bi̱kamu ni̱bu ki̱leti chiyu ni swaanu yi kuteng. 25We yiko, ti̱nti̱ne nangi̱n ti̱yilitu yi kwa̱rikwa̱ri yinu bi̱bu a ne we yikomo a ne laiyu.
Currently Selected:
1 Timoti 5: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
