Luke 24
24
I Jesus ni fos ko yam’
(Matthew 28:1–10; Mark 16:1–8; John 20:1–10)
1Chirofen ni madnom nri kakadbul me yan fapi ppin ko fare low ko yam’ ni kar feked fapi florida nra ngongliyed rogon. 2Miyad pir’eg fare gaf i malang ni kan lulubiy ke chuw u langan fare low ko yam’, 3ma aram miyad yan ngalan; machane dar pir’eged downgin Somol Jesus. 4Miyad sak’iy u rom ndawor ra nanged fan e ren’em, ma yugu ra gin gad ma ke sak’iy l’agruw i pumo’on nga to’obrad, ni be galgal ram’en e mad rorow. 5Me yib e tamdag nib gel ngak fapi ppin, miyad yip’ owcherad nga but’, me ga’ar fa gali pumo’on ngorad, “Mangfan ni gimed be gay be’ nib fos u fithik’ e pi’in karm’ad? 6Daki moy u roy; ya ke fos ko yam’. Mu tafinay niged e thin ni fa’ani yog ngomed u Galile ni ga’ar, 7En ni Fak e Girdi’ e thingar ni pi’ nga pa’ e pi tadenen, min richibiy ko kuruth min faseg ko yam’ ko chirofen nra gaman e dalip fen ngay.”
8Ma aram me yib ngan’ fapi ppin e thin ni yog, 9miyad pag fare low ko yam’ ngar sulod, miyad weliy urngin e pin’ey ngak fare ragag nge ta’reb i gachalpen nge tin kabay. 10Ma pi ppin nem e Maria Magdalene, nge Joanna, nge Maria ni chitiningin James; ni yad nge ku boch e ppin ni un ngorad e ra weliyed e pin’ey ngak fapi apostel. 11Me finey fapi apostel ni thin nike weliy fapi ppin e thin ko balyang ma de riyul’ u wun’rad e tin ni karogned. 12Machane me sak’iy Peter ngalang nge mil nge yan ko fare low ko yam’; me ni tare’en ngalan me guy fapi mad ntay ko fare yam’ ma dakuriy ban’en ni guy ngabang. Ma aram me sul nga tafen ni be leamnag ko mang e rin’ me yodorom ni aram rogon.
Yan nga Emmaus
(Mark 16:12–13)
13Ka chirofen nem ni be yan ruw i yad i yan nga bbinaw ni Emmaus fithingan, ni gonap’an e medlip e mayel nga orel u Jerusalem, 14ma yow be weliy murung’agen urngin e pin’em. 15Ma nap’an ni yow be weliy murung’agen, me chugur Jesus i yib ngorow ngu’u ranod i yan; 16miyow guy, machane de pow rorow. 17Me ga’ar Jesus ngorow, “Mang e gimew be weliy murung’agen ni fa’ani gimew be yib?” Miyow duwgil nike m’ug u owcherow nike kireban’row.
18Ma bagayow, ni Kleopas fithingan, e fith Jesus ni ga’ar, “Mog, kemus ni go’ gur e ka ga bay u Jerusalem ndawor mu nang e n’en ni kan rin’ u rom ko fa in i rran ni ba’aray nike yan?”
19Me fith ni ga’ar, “Bogi mang?” Miyow fulweg ngak ni lungurow, “N’en ni kan rin’ ngak Jesus nu Nazareth. Re mo’on nem e ba profet ni bay rogon u wan’ Got nge urngin e girdi’, ya bay gelngin e thin ni i yog nge tin ni i rin’. 20Pi’in tolang ko prist rodad nge pi’in yad ma yog e thin rodad e ra pi’ed ngan turguy ni ngan thang e fan rok, miyad richibiy ko kuruth. 21Ma ug fineyed ni ir e bayi chuweg yu Israel u pa’ e to’ogor rok! Ma ku errogon ni daba’ e ke gaman e dalip e rran ngay nnap’an ni yodorom. 22Ma boch e ppin ko biromad e ulung e ggin gad ko thin nrogned; ya ranod ko low rok ni be puf e woch, 23machane dar pir’eged downgin. Miyad sul mu urogned nike m’ug l’agruw i engel ngorad ma karognew ngorad nike fos ko yam’. 24Ma boch e girdi’ ko biromad e ulung e ranod ko re low rok nem miyad pir’eg ni bod rogon nike yog fapi ppin, machane dar guyed Jesus.”
25Ma aram me ga’ar Jesus ngorow, “Ri gimew bbalyang, ri gimew ba sowath ni nge mich u wun’mew urngin e tin ke mu’ i yog rok e pi profet! 26Gathi ri dabisiy ni nge gafgow fare Messiah ko pin’ey nge mu’ me yan ko fla’ab rok?” 27Me weliy Jesus ngorow e tin ni murung’agen ni kan weliy u lan urngin kaen e babyor nib thothup, ni tabab ko yu ke rok Moses e babyor nge urngin e tin ni yoloy e pi profet.
28Miyad chugur i yib ko fare binaw ni ir e yad be sor i yan ngay, ma susun e dabi un Jesus ko matal ni aram e ka be yan; 29machane miyow taleg ni be lungurow, “Mu par romow; ya ke chugur ni nge m’ay e biney e rran ma ere nge aw e lumor.” Ma aram me un ngorow nga naun ni nge par rorow. 30Me yan i un ngorow ko par nga tebel, me fek e flowa, me pining e magaer riy ngak Got; me t’ar fare flowa nge pi’ ngorow. 31Ma gowa puf owcherow miyow poy; machane me m’ay ngabang ndakur guyew. 32Me lungurow, “Gathi da thamiyew rodow ni bod ba nifiy ni be yik’ u ngorongordow ni fa’ani i welthin ngodow u daken e kanawo’ me weliy fan fapi thin nu babyor nib thothup ngodow?”
33Ka chingiyal’ nem miyow sak’iy ngar sulow nga Jerusalem, miyow pir’eg fa ragag nge ta’reb pi gachalpen Jesus ni kar mu’ulunggad yugu boch i gachalpen 34ma be lungurad, “Fa’anem i Somol e riyul’ nike fos ko yam’! Ya Simon e ke guy!”
35Ma aram me weliy fa gal i nem ngorad rogon nike m’ug ngorow u daken e kanawo’, nge rogon ni kar poyew Somol ko ngiyal’ ni ba’aram ni t’ar e flowa riy.
Jesus ni m’ug ngak pi gachalpen
(Matthew 28:16–20; Mark 16:14–18; John 20:19–23; Acts 1:6–8)
36Nap’an ni ka yow be weliy ngorad e pi thin ney, ma yugu ra gin gad ma ke sak’iy Somol nga fithik’rad me ga’ar ngorad, “Nge yib e gapas ngomed.”
37Me yib e tamdag nge marus ngorad nrib gel, ya ra fineyed ni yad be guy ba kan. 38Machane me ga’ar ngorad, “Mang nike wagageyan’med? Mang ni gimed be fithmed u lanin’med? 39Mu sapgad nga pa’ag nruw raba’ nge rifrif u eg mi gimed nang ni gag. Mmathgad nga dowag ngam guyed, ya kan e dariy e ufin nge yil u dow, ni bod rogon ni gimed be guyeg ni bay rog.”
40I yog e re bugithin ney me dag pa’ nruw raba’ ngorad nge rifrif u ay. 41Machane ku de riyul’ u wun’rad, ya ke gel e felfelan’ ngorad ma kar ngatgad; me fithrad ni ga’ar, “Bay ban’en romed u roy ni yira kay?” 42Miyad pi’ ngak bangi nig ni kan lith, 43me fek nge kay u p’eowcherad.
44Me ga’ar ngorad, “Ri ireray fa pin’em ni gu weliy ngomed nnap’an ni kug bay romed: ni urngin ban’en ni kan yoloy ni murung’ageg u lan babyoren e Motochiyel rok Moses, nge tin ke yoloy e pi profet, nge tin kan yoloy u lan babyoren e pi Psalm ni murung’ageg e thangri yib i m’ug nib riyul’.”
45Ma aram me tamilangnag an’rad ngar nanged fan e pin’em ni bay u lan e babyor nib thothup, 46me ga’ar ngorad: “Ba’aray e n’en ni kan yoloy: en ni Messiah e thingar ni gafgownag min faseg ko yam’ ko chirofen nra gaman e dalip ngay, 47mu fithingan e ngan machibnag riy e thin rok Got ni murung’agen ni ngan kolngan’uy nga ni pi’ keruuy ko denen, me n’ag Got fan, ni thingar ni machibnag ngak urngin e pi nam, ni ngan tabab ngay u lan yu Jerusalem. 48Ma gimed e mich ko pin’ey. 49Mi gag e bay gu pi’ nge yib nga dakenmed e n’en nike yog e Chitamag ni nge pi’. Machane thingar mu son gad u lan e re binaw ney nge yan i mada’ ko ngiyal’ ni bay ni pi’ gelngimed u lang nge yib nga dakenmed.”
Jesus nni fek nga tharmiy
(Mark 16:19–20; Acts 1:9–11)
50Ma aram me fekrad nga wuru’ e binaw ngranod ra mada’gad nga Bethany, me tining pa’ nga dakenrad me yibiliyrad ngak Got. 51Ma nap’an ni be yibiliyrad, me yan rodad ni aram e kan fek i yan nga tharmiy. 52Miyad meybil ngak ni yad be pining e sorok ngak nge mu’ miyad sul ngalan yu Jerusalem, ni kari felfelan’rad, 53mu ur pired u lan e Tempel ni yad be pining e magaer ngak Got.
Currently Selected:
Luke 24: YAP
Highlight
Share
Copy
Want to have your highlights saved across all your devices? Sign up or sign in
© 2007 Bible Society of Micronesia. Released under the Creative Commons CC-BY-SA license 4.0.