Asmani kitab: Sulaimani misal 27
27
1Agami kailkur befare, boṛai korio na,
kundin kita oito fare, tumi to zano na.
2Nizor tarif ḳorio na, ḳorouk dusra muke,
oinne tumar gunogan gauk, gaio na nizor ṭuṭe.
3Fattoror uzon bout beshi, balur bar-o beshi,
ammokor kusa aro bari, ou duiota taki.
4Rag oilo boṛo fashan, gusa oilo boinna,
ingshar samne ḳegu fare, roizito ubaia?
5Dilor maze maya-mohobbot, gufon raḳa taki,
aro bala dush deḳaia, ḳoile samna-samni.
6Dustor deoa agatre, bishash ḳora zae,
dushmonor beshi firiti, bala kichchu nae..
7Titta ḳani-o miṭa lage, feṭor buk lagle,
moure-o manshe ela ḳore, feṭ bora taḳle.
8Kuf taki gelegi faki, nirafod nae zela,
baṛi taki duroi zae ze, tar halot-o ola.
9Ator-agoror gerane, mon kush oy zela,
asol dustor foramish-o, miṭa lage ola.
10Tumar nizor bondu ze, tare na saṛio,
tumar bafor dustre-o, horaia na dio;
mosibot-nidanor ḳalo, foṛile bifodo,
hou shomoy zaio na to, tumar bair goro;
bout duroi boshot ḳorra, afon bai takia,
tumar laga ari-fori, tara aro bala..
11Giani zudi o mor fut, ami gourob ḳormu,
zara gaito amar gibot, usit zuaf dimu.
12Aḳoldare bifod deḳle, nizore lukae,
be-aḳole samne gia, emne shaza fae.
13Osin zonor zamindaror, lebas kuli neo,
bin-deshir zamindarre-u, bondok raki deo.
14Bout biane sillaia ze, salam dey bondure,
tar i salam goinno oibo, obishaf hishabe.
15Barisha masho megor fuṭa, foṛat taḳe zela,
hamesha gen-genani kore, ḳaijjakur bou ola;
16taire tamaito sae ze, he batashre tamae,
tar ato tel makia hari, kunta dorto sae..
17Luadi fiṭia luare, dar deoa oy zela,
eḳe-oinnor zindegire, goṛia dey ola.
18Ḍumur gasre zoton ḳorle, ḍumur ḳaoa zae,
malikre ze kezmot ḳore, he to shomman fae.
19Fanir maze nizor muk, deḳa zae zela,
dilor ḳaislote buzae, ḳaṭi manush ki na.
20Ḳoybor ar fatalor feṭ, bore na to zela,
kunudin-u tusṭo oy na, manshor souḳ-o ola.
21Shuna-rufa zasair lagi, ase agunir sula,
shunamor maze dia to, manshore zae sina.
22Be-aḳolre saulor laḳan, gail-siat kuṭile,
kunumonte-u tar be-aḳoli, ṭik oito nae re.
23Tumar nizor meṛar falor, ḳobora-ḳobor raḳo,
nizor goru-sagolor zoton, kial ḳori koro,
24don-doulot zomi-maṭi, siroḳal roy na to,
matar mukuṭ-o siroḳal, mouroshi oy na to.
25Ḳer horanir bade zela, noya gash zonom oy,
faṛ-forbot taki ola, gash ḳaṭi ana oy,
26meṛar baichchar lumae oy, tumar ḳafoṛ toiri,
zomi kinar ṭeḳar zugan, mile sagol besi.
27Bokrir dud beshi kaia, foribar roy bala,
tumar goror gulam-bandi, dud ḳaia roy taza..
Currently Selected:
Asmani kitab: Sulaimani misal 27: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
