Asmani kitab: Sulaimani misal 23
23
Nosiot 6
1Boṛolukor goro ḳaile, souḳ melia saio,
samne kita deoa oise, bala ḳori dekio,
2beshi buk lagile tumar, shabdan roio tumi,
raikkushi kani kaile to, golat dibo suri,
3tan dami dami kani deki, lalos na ḳorio,
dami kani kene disoin, motlobḳan buzio..
Nosiot 7
4Don-samana dola ḳorat, fagol na oio,
dilo taki ola sinta, horaia dilaio.
5Donor bae eḳbar saile, deḳbae ita nai,
ḍaḳna gozai silor laḳan, batashe uṛia zae..
Nosiot 8
6Monor maze kifṭami zar, tar ḳani na ḳaio,
dami kani dile-o he, lalos na ḳorio.
7He to ḳali hishab ḳore, ḳoto ḳoros or,
“Ḳani-fani kailao” ḳoy, ichcha nae monor.
8Tuṛa zeta ḳani kaiso, bait ḳori falaibae,
tumar mukor miṭa mator, kunu fayda-u nae..
Nosiot 9
9Ammok zonor loge tumi, kunta na matio,
tumar gianor bulire he, ela to ḳoribo..
Nosiot 10
10Zominor furana ze ail, ita na horaio,
etimor zomi-mirash-o, doḳol na ḳorio,
11tarare basaora zon to, nichchoy boloban,
tain tumar bifokke gia, diba bodla dan..
Nosiot 11
12Talim-nosiot hikar lagi, dilre norom ḳoro,
aḳol-buddir bulire tumi, ḳan fatia huno..
Nosiot 12
13Huruttainre shashon ḳorte, ela na ḳorio,
singla dia marle to, zane na moribo,
14shashon ḳorle singla dia, oibo ufoḳar,
roshatolo zaoa taki, zan basbo tarar..
Nosiot 13
15Tumar dilo gian borle, ore fut amar,
amar dil-o kushie borbo, shuki oibo ontor.
16Hok matile tumar ṭuṭe, amar mon to kushi,
hoḳol ongo kushi amar, oy hasaror shuki..
Nosiot 14
17Gunagaror laḳan tumi, oitae na saio,
ḳali Mabudor ḍor-ḳofe, hor-hamesha solio,
18teugi tumar bobishote, nichchoy balai ase,
tumar monor asha-borosha, zaito nae bifole..
Nosiot 15
19Huno huno amar fut, tumi giani bono,
tumar dilre salao tumi, hok fote raḳo.
20Beshi beshi mod ḳaora, otar loge na zaio,
beshi gust ḳaora feṭua, tarar dust na oio.
21Matal-feṭuae buge to, heshe goribi doshae,
hor-hameshar unganie, faṛa ḳafoṛ findae..
Nosiot 16
22Zonom deora bafor hukum, kial ḳori huno,
tumar ma buṛa oile-o, elami na ḳoro.
23Asol hokre ḳorid ḳoro, kunumonte besio na,
gian, shashon, bisar-buddi, itare saṛio na.
24Forezgar futor baba zein, ein boṛo kushi oin,
giani futor zonom deora, futor dae shuke roin.
25Tumar afon ma-baf zanu, shuki re shuna,
ze maijie zonom disoin, tain kushi oukka..
Nosiot 17
26Amar baedi kial ḳoro, ore fut amar,
mor foto boail taḳouk, duio souḳ tumar.
27Silan beṭi oilo to, goin eḳṭa gaṛa,
bodmaish beṭi oilogi, sikon eḳṭa kua.
28Ota beṭin ut fatia roin, ḍaḳaitor laḳan,
beṭaintor shomazo baṛain, beimanor foriman..
Nosiot 18
29Hae-hutash ar ahazari, ḳore kun zone?
Ḳaijja, nalish, mair ḳaia, ḳar souḳ lal bone?
30Mod-shorab gilar nishae, din ḳaṭae zara,
modor moza buzar ashae, guraguri kore tara.
31Ḳoṛa lal shorab oile-o, tumi ibae saio na,
soḳsok korle-o gelasho, lamle-o golat shuza.
32Itae bade ḳamoṛ marbo, hafor laḳan tumare,
bishakto haf ḳamṛae zela, ola-u mare mode.
33Tumar souḳe deḳbae toḳon, nanan aula-zaula,
tumar mone ḳoibo ḳali, ulṭa-falṭa ḳota.
34Doriar ḍeut huti roiso, buzbo tumar dile,
“Mostulor ufor gumaiar,” buzbae mone mone.
35“Tara more zoḳom ḳorle-o, duḳ faisi na ami,
mair ḳaia ṭer na faile-o, hozag oia mod kuzi..”
Currently Selected:
Asmani kitab: Sulaimani misal 23: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
