Tourat 4: Shumari 9
9
Boni Israilor Azadi Id
1Boni Israil zati Mishor desh taki baronir dusra bosoror foyla sando, Sinai morubumit Mabude Musa nobire ḳoila, 2“Boni Israile zanu ṭik shomoye Azadi Id adae ḳoroin. 3Tara ou sandor souddo tarik hainja bala amar niom-ḳanun mania id adae ḳorte oibo.”
4Mabudor hukum faia Musae Boni Israilre zanaila Azadi Id adae ḳorar lagi. 5Erdae tara foyla sandor souddo tarik hainja bala Sinai morubumit ou id adae ḳorla. Mabude Musare zelaḳan hukum disla, tara ṭik olaḳan hoḳolta ḳorla.
6Oile tarar maze ḳoyzone mora lashre soia nafak oae, ou din Azadi Id ḳorto farlo na. Erlagi ou din-u tara Musa ar Harun nobir gese gia azir oila. 7Tara Musare zikaila, “Mora lash soae amra nafak oisi, erlagi Boni Israilor loge ṭik shomoy Mabudor name kurbani ditam fartam na ḳene?” 8Musae zuaf dila, “Tumrar befare Mabudor hukum na zana forzonto tumra bar sao.”
9Ou shomoy Mabude Musare ḳoila, 10“Tumi Boni Israilre ḳo, tara ba tarar bongshor ḳeu zudi mora lashre dora-soar ḳarone nafak bonizae, ba musafir halote lamba soforo taḳe, te tara-o Mabudor name Azadi Id adae ḳorta farba. 11Dusra sandor souddo tarik hainja bala tara ou id ḳorba. Azadi Idor gustor loge ḳamir saṛa ruṭi ar titta hag furaia ḳaiba. 12Bian forzonto kunuzat ḳani zoma raḳa nished, kurbanir gustor zekunu aḍḍi banga nished. Azadi Idor ou hoḳol niom-ḳanun tara mante oibo. 13Oile zera pak-pakiza halote ase, ar zera soforor maze nae, ila kunu zone zudi Azadi Idor kurbani na dey, te Mabudor ṭik kora shomoye kurbani na deoae, tar zati taki tar nam miṭailibae. Tar gunar shaza he faite oibo.
14“Boni Israilor maze boshot ḳorra bideshi kunu manshe zudi Mabudor name Azadi Id adae ḳorto sae, te ḳorto farbo. Oile ou idor niom-ḳanun mania adae ḳorte oibo. Boni Israil ba bin-deshi hoḳole-u eḳoi niom mante oibo.”
Allar kudroti megor kuṭi
15Allar gor shahadot tambu zedin ḳaṛa ḳora oilo, ou din kudroti megor kuṭi aia asta gorre gurililo. Hainja taki bian forzonto hara rait i megor kuṭire nuror agunir laḳan deḳa gelo. 16Erbad taki ola oilo, Allar gor dinor bala hamesha megor kuṭie gura roito, ar raitor bala mono oito ita nuror agunir kuṭi. 17Ar fobitro tambur ufre taki megor kuṭi zebla horto, ou shomoy Boni Israil oḳol soforo bar oita, bade zeno gia ou kuṭi tir oito, tara oḳano-u tambu oḳol gaṛita. 18Mabudor hukume tara soforo bar oita ar tan hukume-u sofor bond ḳoria tambu gaṛita. Allar goror ufre zotoboil megor kuṭi roito, tara otoboil kempor bitre roita. 19Allar goror ufre megor kuṭi beshi din roile, Mabudor hukum mania tara kunu soforo bar oita na. 20Maze maze megor kuṭi Allar goror ufre tuṛa din roito. Boni Israil to Mabudor hukume kempo roita ar tan hukume-u hirbar soforo bar oita. 21Ar maze maze ḳali hainja taki bian forzonto megor kuṭi roito. Biane megor kuṭi horigele tara soforo bar oita. Dino ba rait zekunu shomoy megor kuṭi horar loge loge-u tara soforo bar oita. 22Zotodin megor kuṭi Allar goror ufre roito, otodin tara kempo roita, soforo bar oita na. Ita dui din ouk, eḳ mash ba er beshi oile-o bar oita na, ḳali megor kuṭi horar bade tara soforo bar oita. 23Mabudor hukume tara kemp gaṛita ar tan hukume-u soforo roana oita. Musa nobir marfote faoa hukum mafik, tara Mabudor ou niom mania solta.
© Ahle Kitab Society. All rights reserved.