Tourat 4: Shumari 6
6
Naziria etekafor niom
1Mabude Musare ḳoila, 2“Tumi Boni Israilre zanai deo, kunu beṭa ba beṭie zudi Naziria etekaf ḳorta sain, mani kali Mabudor ebadot-bondegir lagi alada roar mannot ḳorilae, 3te anguror shorbot ba zekunu nomunar shorab ḳaoa taki tara nichchoy horia taḳte oibo. Anguror shirka ba zekunu nomunar shirka ḳaoa taki-o tara basia roibo. Ar tara taza angur, kismis, ba anguror rosh-o ḳaito nae. 4Mul ḳota oilo, era zotodin Naziria etekafo roibo, otodin angur to duror ḳota, anguror eḳṭa bisi ba baḳol-o tara kunu laḳan-u ḳaito farto nae.
5“Ar zotodinor lagi Naziria etekafor niote nizore alada raḳar mannot ḳorsoin, otodin tarar matat kur-beleiṭ lagani nished. Mabudor name alada roar shomoy era pak-pakiza roite oibo. Matar sul lamba ḳorte oibo. 6I shomoy kunu mora lashor gese zaito farto nae. 7Tarar ma-baba, bai-boin ḳeu mara gele-o nizore nafak korto farto nae, ḳaron erar matar maze to Allar name alada roar nishana sul lagail. 8Tarar i alada roar miad na fura forzonto, pak-pakiza roite oibo.
9“Ar aḳta kunu manush zudi tar samne morizae, te ou morar dae Mabudor name raḳa tar matar sul nafak oizaibo, ar hirbar pak oar lagi shat dinor din tar mata ḳamailite oibo. 10Ar aṭ dinor din he duiṭa ḍufi faki ba duiṭa faro loia Milon-tambur duaro imamor gese zaibo. 11Mora lashor gese gia he nafak oae, oḳon tar nafakir guna mafir lagi imame eḳṭa faki dia gunar koforar kurbani, ar dusra faki dia zalail kurbani adae ḳorba. Ou din-u Mabudor name tar matare noya ḳori pak-pakiza raḳte oibo. 12Ar agor laḳan hirbar Mabudor name alada roar mannot ḳora lagbo. Erloge dush-ḳosurir koforar lagi eḳ bosor boyoshi egu meṛa-baichcha kurbani dibo. Ta-o age zotodin he Mabudor name alada roisil, ita batil oizibo, ḳaron hi shomoy he nafak oigesil.
13“Zekunu zone Mabudor name Naziria etekafor miad fura ḳoria harle, fobitro Milon-tambur duaror ḳandat zaibo. 14Gia Mabudor name zalail kurbanir lagi eḳ bosor boyoshi egu nikut meṛa-baichcha, ar gunar koforar kurbanir lagi eḳ bosor boyoshi egu nikut meṛi-baichcha, erloge salamoti kurbanir lagi egu nikut meṛa ante oibo. 15Otar logor dan-gomor sodga ar shorbot-fanir sodga anbo, erloge nirek guṛidi banail teldi baza eḳ ṭukri fiṭa ar tel maḳail safaṭi banaio. Ita kuntat-u ḳamir mishaio na. 16Imame ita hoḳolta nia Mabudor samne toia hari, gunar koforar kurbani ar zalail kurbanir loge diba. 17Ar salamoti kurbanir meṛar loge-o ola ḳamir saṛa ruṭi diba. Erlogor dan-gomor sodga ar shorbot-fanir sodga adae ḳorba. 18Bade Milon-tambur duaror gese Naziria etekaf ḳorra zonor matar sul ḳamaia, ou sul salamoti kurbanir tolor aguino falaiba. 19Ar Mabudor name raḳa ou sul ḳamanir bade imame kurbanir meṛar shiddo ḳora ekḳan gordona ar ṭukri taki kamir saṛa ekḳan fiṭa ar ekḳan tel maḳail safaṭi nia Naziria etekaf ḳorra zonor ato diba. 20Bade imame ota nia Mabudor samne usa ḳori dulaiba. Ita to fak-fobitro zinish, ita hokkolta imamor faona. Dulaia toa sinar ou gust ar kurbanir foshur ran-o imamor faona. Ita hoḳolta ḳorar bade Naziria etekaf ḳorra ou zone anguror shorbot ḳaita farba.
21“Ita to Naziria etekaf ḳorra zonor lagi ain. Mabudor name alada roia Naziria etekafor niom mafik, ota hoḳolta kurbani dite oibo. Ar zudi tarar shaiddo mafik aro kunta ḳorar niot ḳore, te ota-o ḳorte oibo. Mabudor name alada roar mannot mafik etekafor zoruri hokkolta era adae ḳorbo.”
Boni Israilor lagi imam oḳlor dua
22Mabude Musare ḳoila, 23“Tumi imam Harun ar tar fuainre zanai deo, Boni Israilor lagi dua ḳorar shomoy tara zanu ola ḳoin,
24Mabude deukka rohom-borkot,
ar ḳoroukka tumrare hefazot.
25Tan nuror rushni tumrar ufre foṛouk,
tan meherbani hamesha zari rouk.
26Mabude tan muk kan zanu tumrar bae firain,
ar tumrare shae-shanti dan ḳoroin.
27Ou laḳan tara Boni Israilor ufre amar nam loiba, teu ami tarare rohom-borkot dimu.”
© Ahle Kitab Society. All rights reserved.