Tourat 4: Shumari 4
4
Kahati oḳlor dayitto
1Mabude Musa ar Harun nobire ḳoila, 2“Tumra Lebi kandanor mazor Kahati oḳol alada ḳori gono, tarar hoḳol foribar ar gusṭi mafik gono. 3Tish taki foinchash bosor boyoshor zeta beṭainte Milon-tambur ḳam-ḳaz ḳorat aiba, ḳali tarare gonio.
4“Kahati oḳlor ḳam oibo, Milon-tambur ḳas fobitro siz oḳlor deḳa-huna ḳora. 5Boni Israil soforo baronir shomoy, Harun ar tar fuainte amar goror bitre hamaia, Herem Shorifor forda kulia hari, oḳandi shahadot shondukre guria diba. 6Er ufre doriar fuʼ masor samṛar gilafdi guriba, bade furafur lilua rongor ekḳan ḳafoṛdi guria dia, shonduk boia nibar benda guin zaga moto haraiba. 7Fobitro ruṭi raḳar ṭebulor ufre tara lilua rongor ekḳan ḳafoṛ bisaia, oḳanor ufre huru-boṛo hoḳol tal-bashon, ar shorbot-fanir sodga ḍalibar zog-mog toiba. Fobitro zeta ruṭi hamesha ṭebulor ufre toa taḳe, ita ṭebulor ufre-u roibo. 8Otar ufre lal ekḳan ḳafoṛ bisaia, fuʼr samṛadi oḳanre guriba, ar ṭebul boia nibar benda guin zaga moto harai diba. 9Bade lilua ekḳan ḳafoṛdi asta serag dani, er serag oḳol, seragor fita saf ḳorar simṭa, zalail fitar sali toar baṭi ar telor fifare guria diba. 10Hoḳol mal-samana shomet serag danire fuʼr samṛadi beraia, boia nibar ḳaṭiar ufre toiba. 11Ar agor-kushboy zalanir shunar ṭebulor ufre lilua ekḳan ḳafoṛ bisaia, fuʼr samṛadi guria diba, bade ou ṭebul boia neoar benda guin zaga moto haraiba. 12Ebadot ḳanar kezmotor hoḳol mal-samana tara lilua ḳafoṛdi fesaia, fuʼr samṛadi guria hari, ota boia nibar ḳaṭiar ufre toiba.
13“Kurbani kanar bitoror hoḳol sali falaia, baingoni rongor ekḳan gilafdi guria diba. 14Bade kurbani kanar hoḳol mal-samana oḳol, ortat angra toar fatil, gust tular boṛo ḳaṭa-sif, sali tular boṛo samos, lou toar baṭi, ita hoḳolta kurbani kanar ufre toiba. Toia fuʼr samṛadi guria dia, er benda guin ṭik zagat haraiba. 15Harun ar tar fuainte zebla ou fak-fobitro zinish oḳol ar ebadot ḳanar mal-samana hoḳolta guriliba, tara tambu tulia soforo baronir lagi zebla tiar oiziba, ou shomoy ota boia nibar lagi Kahati oḳol aiba. Oile tara kunu fak-fobitro sizre atdi soita farta nae, soile-u morba. Milon-tambur ou hokkol zinish tara boia niba.
16“Ar imam Harunor fua Ali-Azoror ufre serag danir tel, zalanir lagi agor-kushboy, fortidinor dan-gomor sodga ar ḳelafoti shomzibar telor dayitto roibo. Allar gor, goror hoḳol mal-samana, mani ebadot ḳana ar tar hoḳol mal-samanar todarki roibo Ali-Azoror ufre.”
17Erbade Mabude Hozrot Musa ar Harunre ḳoila, 18“Tumra kial rakio, Lebi kandanor maze Kahati bongsho taki keu ḳeu zate hor-hamesha taḳoin. 19Tara zanu ḳas fobitro siz oḳlor ḳasat gia na more borong basia roy, otar lagi Harun ar tar fuainte amar goror bitre gia zarzir ḳam-ḳaz buzai diba. Ar ḳe kita boia nita, ota-o ṭik kori diba. 20Oile Herem Shorifor bitoror ou fak-fobitro zinish eḳ foloḳor lagi-o deḳar niote Kahati oḳol bitre kunu laḳan-u hamaita farta nae, ou niote hamaile-u mori zaiba.”
Zarsuni oḳlor day-dayitto
21Mabude Musare ḳoila, 22“Tumi gusṭi ar foribar mafik Zarsuni oḳolre gono. 23Tish taki foinchash bosor boyoshor zeta Zarsuni beṭainte Milon-tambur ḳam ḳorta farba, ḳali tarare gonio.
24“Milon-tambur kezmot ḳora ar bar boar shomoy Zarsuni oḳlor ḳam oilo, 25amar goror hoḳol fordain, Milon-tambu ar er gilaf, tar ufror fuʼr samṛar sani, ar Milon-tambur duaror forda boia neoa. 26Erloge Allar gor ar kurbani kanar uṭanor sairo galar forda ar er doṛi oḳol, uṭano hamanir geiṭor forda, otar logor dorḳari hoḳol mal tara boia niba, ar ou befare zoto ḳam-ḳaz ase, ita tara ḳorba. 27Bar boibar ḳam ouk ba oinno kunu ḳam ouk, hoḳolta Harun ar tar fuaintor hukum mafik Zarsuni oḳole ḳorba. Tara kita kita boia nito, ita tumra-u tarare ḳoia dibae. 28Ota-u oilo Milon-tambur ḳamo Zarsuni oḳlor day-dayitto. Tarar ḳam-ḳazor todarki korba imam Harunor fua Isamare.
Mararia oḳlor day-dayitto
29“Tumra gusṭi ar foribar mafik Mararia oḳlor foriman gono. 30Tish taki foinchash bosor boyoshor zeta Mararia beṭainte Milon-tambur ḳam ḳorta farba, tumra ḳali tarare gonio. 31Milon-tambur maze Mararia oḳlor dayitto oilo, Allar goror hoḳol freim, freimor batti, kuṭi ar kuṭir tolor sungi boia neoa. 32Erloge sairo galar uṭanor hoḳol kuṭi ar sungi, uṭanor forda ṭananir fereg ar doṛi ar otar logor mal-samana zeta dorḳari ita hoḳolta tara boia niba. Tara ḳe kita boia nito, ita tumra ḳoia dio. 33Ota-u oilo Milon-tambur maze Mararia gusṭir day-dayitto. Tarar ḳam-ḳazor todarki korba imam Harunor fua Isamare.”
Lebi kandanor manush gona
34Teu gusṭi ar foribar mafik Hozrot Musa, Harun ar Boni Israilor shordar oḳole Kahati oḳolre gonila. 35Tish taki foinchash bosor boyoshi zeta beṭainte Milon-tambur ḳam-ḳaz ḳorar ḳota, ḳali tarare gonila. 36Gonia tarar gusṭi mafik dui azar shat-sho foinchash zon faoa gelo. 37Era-u asla Kahati gusṭir muṭ manush, zera Milon-tambur ḳam-ḳaz ḳorta. Musa nobir marfote Mabudor deoa hukum mafik Musa ar Harune tarare gonila.
38Gusṭi ar foribar mafik Zarsuni oḳolre gona oisil. 39Tish taki foinchash bosor boyoshor zeta beṭainte Milon-tambur ḳam-ḳaz ḳorar ḳota, 40gusṭi ar foribar mafik tarare gonia hari dui azar soy-sho tish zon faoa gelo. 41Era-u asla Zarsuni gusṭir muṭ manush, zera Milon-tambur ḳam-ḳaz ḳorta. Mabudor hukum mafik Musa ar Harune tarare gonila.
42Gusṭi ar foribar mafik Mararia oḳolre gona oisil. 43Tish taki foinchash bosor boyoshor zeta beṭainte Milon-tambur ḳam-ḳaz ḳorar ḳota, 44gusṭi mafik tarare gonia tin azar dui-sho zon faoa gelo. 45Era-u asla Mararia gusṭir muṭ manush, zera Milon-tambur ḳam-ḳaz ḳorta. Hozrot Musar marfote faoa Mabudor hukum mafik Musa ar Harune tarare gonila.
46Gusṭi ar foribar mafik Hozrot Musa, Harun ar Boni Israilor murobbi oḳole asta Lebi kandanre gonila. 47Tish taki foinchash bosor boyoshi zeta beṭainte Milon-tambur kezmot ar mal-samana boia nibar ḳota, 48gusṭi mafik tarare gonia aṭ azar fas-sho ashi zon faoa gelo. 49Hozrot Musar marfote Mabudor deoa hukum mafik era forteḳ zonor ḳam-ḳaz ar ḳe kita boia nita, hoḳolta buzai deoa oisil.
Mabudor deoa hukum mafik Musa nobie Lebi kandanre gonila.
Currently Selected:
Tourat 4: Shumari 4: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.