Tourat 4: Shumari 3
3
Imam Harun (a:)or fuain
1Tur faṛor ufre Mabude zebla Musa nobir loge batchit ḳorsla, hou shomoy Harun ar tan bai Musar bongsho-buniad asla ou eintain:
2Harunor fuain oila Nadab, Abihu, Ali-Azor ar Isamar. Erar maze Nadab asla boṛo. 3Imamoti kamor lagi Harunor ou sairo fuainre ḳelafoti dia ebadoti kamo boail ḳora oisil. 4Oile Sinai morubumit roar ḳalo, Imam Nadab ar Imam Abihue Mabudor deoa niom bangia, dusra aguindi agor-kushboy zalanir shomoy Mabudor samne-u tarar moron oigelo. Tarar kunu aolad na taḳae, tarar baf Harun nobir loge roia Ali-Azor ar Isamare imamoti kam ḳorla.
Lebi kandanor ḳadim oḳlor dayitto
5Bade Mabude Musa nobire ḳoila, 6“Tumi Lebi kandanor manshore ania imam Harunor ato shomzao, tara imamoti kamo tanre shaijjo ḳorba. 7Tara imam Harunor zimmae Milon-tambur samne hoḳol Boni Israilor torof taki amar goror ḳadimdari korba. 8Tara-u Milon-tambur mal-samana deḳa-huna ar Allar goror kezmot ḳoria Boni Israilor fokke ebadot-bondegir day-dayitto adae ḳorba. 9Lebi kandanor ḳadim oḳolre tumi Harun ar tar fuaintor ato shomzai deo. Boni Israilor maz taki erare imam Harunor ato shofi deoa oilo. 10Imamoti kamor lagi tumi Harun ar tar bongshore basia neo. Tara saṛa dusra ḳeu imamoti korat gele ogure zane mara oibo.”
11Mabude Musare eoḳan ḳoila, 12“Huno, Boni Israili beṭintor goro zonom loa foyla fuar bodla babot, ami Lebi kandanre fosond ḳorsi. Erlagi Lebi oḳol amar. 13Ashole hokkol foyla fuain-u amar. Mishori oḳlor hoḳol foyla fuaintore marilibar din, Boni Israilor forteḳ foyla fuare amar lagi fobitro ḳoria raḳsi, ita manshor fut ouk ba foshur baichcha ouk. Tara to amar, ami-u Mabud.”
14Sinai morubumir maze Mabude Musare ḳoila, 15“Tumi gusṭi ar foribar mafik Lebi oḳolre gono. Eḳ mash ba er beshi boyoshor hoḳol beṭaintore gono.” 16Mabudor hukum mafik tain Lebi kandanre gonila. 17Gonar ḳalo faila, Lebir fuain Zarsun, Kahat ar Marari. 18Zarsunor fuain Libni ar Shimei asla dui gusṭir murobbi neta. 19Kahator fuain Imran, Izhar, Hebron ar Ujjol oila sair bai. 20Mararir fuain Moholi ar Mushi oila dui bai. Era oila bongsho ar foribar hishabe Lebi kandanor nanan gusṭi.
21Zarsun asla Libnia ar Shimeia gusṭir mul murobbi. 22Erar maze eḳ mash ar eḳ mashor beshi boyoshor hoḳol fuaintore gonia shaṛe shat azar faoa gelo. 23Fochchim galabae Allar goror ḳoredi Zarsuni oḳlor tambu ṭangani oito. 24Zarsun gusṭir fordan asla Layelor fua Iliasof. 25Milon-tambur befare Zarsuni oḳlor ufre, zeta ḳafoṛain dia Allar gor banani oise ḳali ota ḳafoṛ oḳol, bara bazur gilaf ar sani oḳol ar ou goror bitre hamaibar forda deḳa-huna ḳorar dayitto asil. 26Ar Allar gor ar kurbani kanar sairobae ze uṭan ase ogur fordain, ar uṭano hamanir lagi ze geiṭ ase ou geiṭor forda, ar shob rosi oḳlor-u deḳa-huna ḳora, ar ota hoḳol ḳam-ḳaz ḳora, ou hokkolta-u tantanor dayitto asil.
27Kahat asla Imran, Izhar, Hebron ar Ujjol, ou sair gusṭir mul murobbi. 28Ou gusṭintor maze eḳ mash ba tar beshi boyoshor hoḳol fuaintore gonia aṭ azar soy-sho zon faoa gelo. Erar dayitto asil fobitro ebadot ḳanar deḳa-huna ḳora. 29Allar goror dokkin galabae Kahati oḳlor tambu ṭangani oito. 30Kahati gusṭir fordan asla Ujjolor fua Ilizafon. 31Ou Kahati gusṭir dayitto asil shahadot shonduk, ṭebul, serag dani, kurbani kana, agor-kushboy zalanir ṭebul, fobitro ebadot ḳanar ebadotir hoḳol zinish ar Herem Shorifor fordar deḳa-huna ḳora, loge bad-baki kam ḳora. 32Lebi kandanor nanan gusṭir murobbi oḳlor fordan asla Imam Harunor fua Ali-Azor. Erloge fobitro ebadot ḳanar deḳa-hunar dayitto zerare deoa oisil, erare nozordari korar lagi tanre boail ḳora oisil.
33Marari asla Moholi ar Mushir ou dui gusṭir mul murobbi. 34Ou gusṭintor maze eḳ mash ba tar beshi boyoshor hoḳol fuaintore gonia soy azar dui-sho faoa gelo. 35Mararia gusṭir fordan asla Abielor fua Suriel. Allar goror utoredi tarar tambu ṭangani oito. 36Erar dayitto asil Allar goror freim, freimor batti, kuṭi, sungi ar er hoḳol chiz, 37uṭanor beṛar sairo galar kuṭi, sungi, beṛa ṭananir rosi ar feregor deḳa-huna ar er logor hoḳol ḳam-ḳaz ḳora.
38Milon-tambur samnedi mani Allar goror fubedi Hozrot Musa, Harun ar tan fuaintor tambu oḳol ṭangani oito. Erar dayitto asil Boni Israilor torof taki fobitro ebadot ḳanat hoḳol ebadoti kam adae ḳora. Era saṛa ar ḳeu ebadot ḳanar ḳandat gele tare marilaoa oito.
39Mabudor hukum mafik Musa ar Harune, Lebi kandanor eḳ mash ba tar beshi boyoshor hoḳol fuaintore gusṭi mafik gonila, gonia baish azar zon faoa gelo.
40Erbade Mabude Musare ḳoila, “Boni Israilor hoḳol foribaror foyla fuainre gono, zerar boyosh eḳ mash ba er beshi, erare gonia erar nam ek katat leḳo. 41Boni Israilor hoḳol foyla fuaintor zanor bodla Lebi oḳolre amar ḳoia gona oibo. Ar tarar foshur foyla baichchar bodla Lebi oḳlor foshur foyla baichchare amar ḳoia gona oibo. Ami-u Mabud.”
42Mabudor hukum mafik Musae Boni Israilor hoḳol foribaror foyla fuainre gonila. 43Teu eḳ mash ba tar beshi boyoshi fuaintore gonia muṭ baish azar dui-sho teyaṭṭoir zon faoa gelo.
44Mabude Musare aro ḳoila, 45“Boni Israilor hoḳol foyla fuaintor bodla Lebi oḳolre, ar tarar foyla foshur baichchar bodla Lebi oḳlor foyla foshur baichchare amar ḳoia dora oibo. Lebi oḳol to amar oiba. Ami-u Mabud. 46Lebi kandanor muṭ foriman taki Boni Israilor foyla fuaintor foriman dui-sho teyaṭṭoir zon beshi. 47Ou dui-sho teyaṭṭoir zonre ḳalas ḳorar lagi zanor bodla hishabe, forteḳ zonor lagi ebadot ḳanar mafe fas tola rufa adae ḳorio. 48Adae ḳora ou rufa nia tumi imam Harun ar tar fuaintore dilaio.”
49Teu Lebi kandanor bodla Boni Israilre ḳalas ḳoria nibar bade, tarar zoto zon baki roila, erar zanor bodla hishabe Musa nobie rufa adae ḳorla. 50Tain Boni Israilor foyla fuaintor ges taki ebadot ḳanar mafe eḳ azar tin-sho foyshoṭṭi tola rufa adae ḳorla. 51Mabudor hukum mafik Musae ou rufa Harun ar tan fuaintore dilaila.
Currently Selected:
Tourat 4: Shumari 3: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.