Tourat 4: Shumari 28
28
Fortidinor kurbanir niom
1Mabude Musa nobire ḳoila, 2“Tumi Boni Israilre amar ou hukum zanai deo, amare kushi korar niote geran ala zalail kurbani amar ḳanir lagi shoṭik shomoye azir ḳorte oibo. 3Tarare eoḳan ḳo, tumra Mabudor name fortidinor agunit deoa kurbani adae ḳorar niote ou foshu oḳol anio, fortidin eḳ bosor boyoshi dugu nikut meṛa-baichcha anio. 4Ania egu biane ar egu hainja bala kurbani dibae. 5Erlogor fortidinor dan-gomor sodgar lagi dui sher moyda ar eḳ sher zoytunor fisha tel anbae. 6Iṭa oilo hou fortidinor zalail kurbani, zeta Tur faṛo shaibosto ḳora oisil. Ar ita to amar name agunit deoa kurbani, er dumar gerane ami kushi oi. 7Forteḳ meṛar loge eḳ sher anguror shorbot dia shorbot-fanir sodga adae ḳorio. Mabudor namor kurbanir ou shorbot ebadot ḳanar uṭano ḍali dibae. 8Meṛar aroḳ baichchare hainja bala kurbani dibae. Erloge biankur laḳan dan-gomor sodga ar shorbot-fanir sodga adae ḳorbae. Ita oilo agunit deoa kurbani, er dumar gerane ami Mabud kushi oi.
Forti Zummabaror kurbanir niom
9“Forteḳ Zummabare eḳ bosor boyoshi dugu meṛa-baichcha kurbani dibae. Erloge shorbot-fanir sodgar samana ar dan-gomor sodgar tel maḳail sair sher moyda-o dibae. 10Fortidinor zalail foshu kurbani ar er logor shorbot-fanir sodga saṛa-o forteḳ Zummabare ou zalail kurbani adae ḳorbae.
Forteḳ sandor kurbanir niom
11“Forteḳ sandor foyla din Mabudor name zalail kurbanir lagi dugu bisal, egu meṛa ar eḳ bosor boyoshi shatgu meṛa-baichcha kurbani dibae, i hoḳol foshu fura nikut oito. 12Ou forteḳ bisalor loge dan-gomor sodga hishabe tel maḳail soy sher moyda dibae, ar meṛar loge sair sher moyda dio, 13ar forteḳ meṛa-baichchar loge tel maḳail dui sher moyda dio. Ita oilo amar name agunit deoa kurbani, itar dumar gerane ami Mabud kushi oi. 14Shorbot-fanir sodgar lagi forteḳ bisalor loge dui sher anguror shorbot dibae. Forteḳ meṛar loge shua sher ar forteḳ meṛa-baichchar loge eḳ sher shorbot dio. Ita oilo mashik zalail kurbani, bosoror forteḳ sando ita adae ḳorbae. 15Itar loge gunar koforar niote amar name egu sagol kurbani dio. Ta-o forteḳ dinor zalail kurbani, ar er logor shorbot-fanir sodga-o adae ḳorio.
Azadi Idor kurbanir niom
16“Forteḳ bosoror foyla sandor souddo tarik Mabudor name Azadi Id adae ḳorio. 17Ou sandor fonro tarik taki shat din bora aroḳ id adae ḳorio, ikṭar nam Ḳamir Saṛa Ruṭir Id. 18Er foyla din fobitro milon-mahfil ḳorio, i din duniabi niote kunu ḳam-ḳaz ḳora nazaiz. 19Ou din amar name dugu bisal, egu meṛa ar eḳ bosor boyoshi shatgu meṛa-baichchadi agunit deoa zalail kurbani adae ḳorio. Kurbanir forteḳ foshu nikut oite oibo. 20Ou foshur logor dan-gomor sodga hishabe tel maḳail moyda dibae, eḳoṭa bisalor loge soy sher, meṛa faṭar loge sair sher, 21ar meṛa-baichchar loge dui sher dibae. 22Itar loge tumrar gunar koforar lagi egu faṭa sagol-o kurbani dio. 23Forteḳ dinor biankur zalail kurbani to dibae-u, erloge ou kurbani-o adae ḳorbae. 24Ou laḳan fura haftar shatodin amare kushi korar geran ala ḳani hishabe forteḳ din ou agunit deoa kurbani adae ḳorbae. Fortidinor zalail kurbani ar er logor shorbot-fanir sodgar loge ou kurbani-o adae ḳorbae. 25Heshe shat nombor din-o tumra fobitro milon-mahfil ḳorio, ou din duniabi niote kunu ḳam-ḳaz ḳora nazaiz.
Fonchaisha Idor kurbanir niom
26“Fonchaisha Idor din, mani ketor foyla daoa foshol dia zedin tumra amar name fobitro milon-mahfil ḳorbae, hi din kunu duniabi niote ḳam ḳorio na. 27Ou din tumra dugu bisal, egu meṛa ar eḳ bosor boyoshi shatgu meṛa-baichcha dia zalail kurbani adae ḳorio, ou kurbanir dumar gerane ami Mabud kushi oi. 28Ar otar logor dan-gomor sodga hishabe eḳoṭa bisalor loge tel maḳail soy sher moyda, meṛar loge sair sher, 29ar meṛa-baichchar loge dui sher dibae. 30Otar loge egu faṭa sagol-o kurbani dio tumrar gunar koforar lagi. 31Ou hoḳol kurbani ar itar logor shorbot-fanir sodgar loge fortidinor zalail kurbani ar er logor dan-gomor sodga adae ḳorbae. Kial rakio, kurbanir hoḳol foshu zanu furafur nikut oy.
© Ahle Kitab Society. All rights reserved.