Tourat 4: Shumari 22
22
Pir Balam ar bashsha Balak
1Erbade Boni Israil gia Ziriho ṭaunor ulṭabae Zordan gangor daro Muab deshor tol zagat tambu ṭangaila.
2Boni Israile Amuri oḳlor ze halot ḳorsil, Muab deshor bashsha Balak bin Shipare ita hoḳolta deḳsoin. 3Boni Israilor oto manush dekia Muabi oḳol ḍoraigela. Ashole-u tara kub beshi gabṛi gela. 4Tara Madian deshor murobbi neta oḳolre ḳoila, “Gorue zela bondor ḳesma gashre leia-fusi kailae, ou dole-o oula amrar sairo galar hoḳolta leia-fusi kailibo.” Ou shomoy Muab deshor bashsha asla Balak bin Shipar. 5Bashshae ḍoraia Balam bin Baur namor pir sabre anar lagi kobria faṭaila. Balam to ou shomoy tan nizor deshor Furat gangor faro Fotur ṭauno asla. Balake ḳobriare ḳoia dila, “Tumra gia tanre ḳoio, Mishor desh taki eḳdol manush bar oia aise. Aia asta zomin boria ḳali gisgis ḳorra, tara oḳon amar samne boshot ḳorra. 6Ita to amra taki beshi boloban. Erlagi afne aukka, aia otare lannot deukka. Teu ami hoyto tarare maria desh taki kedaitam farmu. Ar ami to zani, afne zare dua dein he ṭik-u dua fae, ar zare lannot dein tar ufre hasau lannot foṛe.”
7Teu Muab ar Madianor murobbi neta oḳole isteḳara-azirat ḳoranir ṭeḳa loia roana oigela. Bashsha Balake zela hikai disla, tara gia Balamor gese ola ḳoila. 8Teu Balame tarare ḳoila, “Te afnara aiz rait amar ono roukka. Mabude amare zeta zanaiba, ami ota afnarare zanaimu.” Gotike-u tara tan ono roila.
9Mabude Balamor gese zair oia zikaila, “Tumar loge era ḳara?”
10Balame zuaf dila, “Muabor bashsha Balak bin Shipare amar gese ḳobria faṭaisoin, 11ḳoisoin, Mishor desh taki eḳdol manush aia asta desho gisgis ḳorra. Oḳon afne aia tarare lannot deukka. Teu ami zuddo ḳoria tarare bule ḳedaitam farmu.”
12Oile Mabude Balamre ḳoila, “Tumi erar loge zaio na, ar hita manshore kunu lannot-o dio na. Mono rakio, tara amar rohom-borkot faoa bonda.”
13Bador din biane Balam gum taki uṭia Balakor ḳobria oḳolre ḳoila, “Afnara zarzir desho firot zaukkagi. Ar Mabude amare mana ḳorsoin, afnarar loge na zaoar lagi.” 14Teu Muabi neta oḳole firia gia bashsha Balakre ḳoila, “Balam to amrar loge aite razi oisoin na.”
15Oḳan hunia Balake erar saite aro beshi, aro ijjoti neta oḳolre faṭaila. 16Tara gia Balamre ḳoila, “Bashsha Balak bin Shipare ḳoisoin, afne tan gese zaite kunuzator kunu bada manta na. 17Tain afnare bout ijjot-boḳshish diba, ar afne zela ḳoiba, tain ola-u ḳorba. Ḳali afne zanu tan fokko loia ota manshore lannot dein, tain oḳan-u saira.”
18Balame zuaf dila, “Bashsha Balake zudi tan shuna-rufae bora razbaṛi kan-o amare dilain, ta-o amar Mabudor hukumor ulṭa gia ami ekḳan ḳam-o ḳortam nae, ita huru ḳam ouk ba boṛo ḳam ouk. 19Oile afnara-o agor erar laḳan aizkur rait ḳan ono ḳaṭai laukka. Ami deki, Mabude amare noya kunta ḳoin ni.”
20Hou rait Allae zair oia Balamre ḳoila, “Era zebla tumare neoat aise, te tumi tarar loge zao. Gele ami tumare zela ḳoimu, tumi kali ola-u ḳorio.”
Gadir muko zoban fuṭilo
21Bador din biane Balam pir gum taki uṭia tan gadir ufre godi bisaia Muabi neta oḳlor loge roana oila. 22Tan zaoa dekia Alla Pak tan ufre gusae aguin oigela. Tanre bada dibar kiale Allar firistae fot auglia ubai roila. Balam to gadir ufre soṛia zaira, tan duizon saḳor tan loge asil. 23Mabudor firistae toluar ato loia, fotor maze ubai roisoin dekia, gadiṭa fot saṛia zominedi lami gelo. Gadire hirbar foto tular lagi Balame taire mair-doir ḳorla. 24Bade Mabudor firista zominor angur baganor dui ketor mazor ailor ufre ubai roila. Ailor duio galabae faḳa oal deoa asil. 25Mabudor firistare dekia gadie oalor galabae geshia gelo. Erdae Balamor eḳ fao-o kub gosha laglo. Teu tain hirbar gadire marla. 26Erbade Mabudor firista aguaia gia fotor mazor ola eḳ sifa zagat ubaila, zeno ḍaine-baue kunubae horar ufae nai. 27Mabudor firistare dekia gadie Balamre loia maṭit huti gelo. Teu Balam aro gorom oia laṭi dia gadire marla. 28Ou shomoy Mabude gadir mukor zoban kuli dila. Tai Balamre ḳoilo, “Ami afnare kita ḳorsi, afne tin-tinbar amare marla?” 29Balame gadire ḳoila, “Tui amare aua banaia ḳeiṛ ḳelaire ni? Hun, amar ato zudi ekḳan toluar taḳto, te tore sed mari oḳon-u ḳaṭillam one.”
30Gadie Balamre ḳoilo, “Ami afnar hou gadi nae ni, zegur ufre afne hara zonom dori soṛia aira, ar afnar loge ami kunudin ila ḳorsi ni?”
Balame ḳoila, “Na, ila ḳorsot na.”
31Erbade Mabude Balamor souk kulia dila, tain deḳla, Mabudor firistae toluar loia fot bond ḳori ubai roisoin. Dekia tain mata nuaia nak-kofal maṭit lagaila.
32Teu Mabudor firistae tanre zikaila, “Tumar gadire ḳene tin-tinbar marlae? Tumi amar samne amar birudde ḳam ḳorat zairaegi dekia, ami tumare aṭḳaibar lagi ono aisi. 33Tumar gadie amare dekia tin-tinbar horia gesegi. Tai zudi na horto, te ami tumare marillam one, ar taire basai raḳlam one.”
34Ou shomoy Balame Mabudor firistare ḳoila, “Ami to guna ḳorsi. Ashole ami buzchi na, afne amare aṭḳaibar lagi foto ubat asoin. Te afne naraz oile ami firia zaimugi.”
35Mabudor firistae Balamre ḳoila, “Ṭik ase, tumi ota manshor loge zao. Oile ami tumare zela hikai dimu, tumi kali ola-u ḳoibae.” Teu bashsha Balakor faṭail neta oḳlor loge Balam pir solat roila.
36Balam piror aoar ḳobor hunia, tanre aguaia anar lagi bashsha Balak Ornon ḳalor faro Muab deshor eḳ ṭauno gela. I ṭaun asil tan deshor hesh shimanat. 37Bashsha Balake Balam pirre ḳoila, “Ami to afnare zoruri tolob ḳorlam. Te afne ḳene foyla bar aila na? Afnare zoiggo boḳshish dibar ḳemota kunu amar nai ni?”
38Balame zuaf dila, “Ami oḳon afnar gese aisi. Oile amar nizor kunu mat matar shaiddo nai. Ḳali Allae amaredi zeta ḳoaiba, ami kali oḳan-u ḳoimu.”
39Erbade Balak bashshar loge oia Balam pir Kiriot-Husut gaut gela. 40Gia bashsha Balake goru ar meṛa kurbani dia kisu gust Balam pirre ar tan logor hou neta oḳolre dila. 41Bador din biane bashsha Balake ou Balamre loia Bamut-Baal faṛo gela. Hono ubaia Balame Boni Israilor eḳ ongshore deḳla.
© Ahle Kitab Society. All rights reserved.