Tourat 1: Foyda Nama 49
49
Hozrot Iakub (a:)or osiot
1Bade Iakube tan fuaintore anaia ḳoila, “Tumra hokkol ekḳano o. Bobishote tumrar zindegi kila zaibo, ita ami tumrare ḳoiram.
2Iakubor fuain, tumra ekḳano ao;
tumrar baf Israilor buli huno.
3Ruben tumi amar boṛo fua,
tumi amar bol, amar zuankir foyla fol;
tumi hoḳol taki tezi ar himmoti.
4Tumi utrail gorom fanir laḳan,
tumar boṛai roito nae;
tumi afon bafor bisnat geso,
haton maʼr loge nafaki kam ḳorso.
5Shimion ar Lebi dui bai;
tarar toluar zalimor atiar.
6O amar zan, tarar mozliso hamaio na;
O amar shan, tarar shomazo zaio na.
Tara gusa ḳori kun ḳorlo;
aṛuami kori bisalor rog kaṭlo.
7Tarar gusa to lannoti, ita boṛo bezuita;
lannoti tarar zulum, ita to fashan.
Ami tarare Iakubor maze baṭimu;
Boni Israilor maze sitrai dimu.
8Ehuda, tumar baiainte tumar tarif ḳorba;
tumi dushmonor gordonat dorbae;
tumar bafor oarish oḳole,
tumar gese mata nuaiba.
9Tumi to shinghor baichcha Ehuda.
Tumi shikaror gust ḳaia horia ailae;
he shinghor laḳan leṭia hutia goṛiailo;
shinghire ḳegue gum bangaito?
10Ehudar at tone to
raz-laṭi horto nae;
tar duio faor maz tone
bisaror goda zaito nae;
zotodin Shilo na aiba,
ar hoḳol zati tan hukume solba.
11He angur gaso banbo tar gada;
anguror shundor ḍalo banbo gadir baichcha;
lal anguror roshdi duibo tar zubba,
anguror loudi korbo lebas sofa.
12Tar souk anguror roshe lal ṭoḳṭoḳa,
ar tar dat dudor laḳan dola.
13Sobulon doriar faro boshot ḳoribo,
he zaz biṛanir gaṭ oibo,
Sidon forzonto tar shimana oibo.
14Isaḳor egu bolala gada,
he kuoṛor bitre hute.
15He deḳlo ziranir zagaḳan bala,
deshḳan shundor;
teu gaiṭ boibar lagi kand lamailo,
ar zuror gulam oilo.
16Dane tar nizor proza oḳlor bisar ḳorbo,
Israilor ek ḳandanor laḳan.
17He oibo shoṛokor daror haf,
fotor bishala alod;
zegie guṛar faot ḳamoṛ mare,
guṛ-soar ḳoredi ulṭia foṛe.
18O Mabud, ami tumar nazator muka sai roisi.
19Sadure luṭra dole hamla ḳorbo,
bade he-o tarar ḳoredi luṭibo.
20Ashiror kub bala foshol folibo,
he bashshar zuka ḳani zugaibo.
21Noftali oilo saṛa horini,
tar muko ase miṭa miṭa mat.
22Iusuf folala gasor ḍal,
indarar daror folala gasor ḍal;
tar ḍalain beṛ faroizae.
23Tir-donuk alainte tare bezuita toklif disla,
tir maria tare beḳaydat falaisla;
24oile tar donuk mozbut roilo,
tar ator honat bol roilo;
Iakubor hou mohan shoktialar at dia,
zein Israilor asroy ṭilla, tanre dia.
25Tumar bafor hou Allare dia,
zein tumare shaijjo ḳorba;
hou Shorbo-shoktimanre dia,
zein tumare borkot nazil ḳorba;
ufre toa asman taki lamra borkote,
tole bisail fani taki bar oa zornar borkote,
bukur dud ar feṭ taki bar oa borkote.
26Amar baf-dadar dua taki,
tumar bafor deoa dua bout bala ouk;
ita hameshakur ḳaṛa hazail faṛ-forbot taki lamouk.
Hou dua Iusufor matat foṛouk;
baiain taki alogor matar talut foṛouk.
27Bin-Iamin oilo boṛo-bagor laḳan,
he biane ḳae shikaror gust,
ar hainjae bilae luṭor mal.”
28Era oila Israilor baro ḳandan, tarar bafe tarar lagi duar shomoy oula ḳoila. Tain era hokkolre zarzir faona dua dila.
Hozrot Iakub (a:)or inteḳal ar dafon
29Bade Iakube tan fuaintore osiot ḳoraila zen, “Amar to baf-dadar gese zaoar shomoy oigese, te Hiṭṭi Ifrunor zominor guhat, amar baf-dadar ḳandat amare dafon ḳorio. 30I guha Kenan deshor, Momrir daro Moḳfelar zomit. Ibrahime Hiṭṭi Ifrunor ges tone ou zomin loisla ḳobrostan bananir lagi. 31Ono-u Ibrahim ar tan bibi Sayrare dafon ḳora oise, Isʼhak ar tan bibi Rebekare-o ono dafon ḳora oise, ar ami Leare-o ono dafon ḳorsi. 32I zomin ar er mazor guha Hiṭṭi oḳlor ges tone loisla.”
33Iakube tan fuaintore osiot ḳora shesh oile, bisnar ufre tan duio fao ekḳano ḳorla ar aḳeri dom saṛia tan baf-dadar gese gelagi.
Currently Selected:
Tourat 1: Foyda Nama 49: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
