Tourat 1: Foyda Nama 45

Baiainre forisoy dila

1Iusufe tan ḳormosari oḳlor samne nizore ar ṭik raḳta farla na, tain sillaia ḳoila, “Amar ges tone hokkol hori zao!” Teu baiaintor gese nizor forisoy deoar shomoy tan samne ar ḳeu roilo na. 2Tain sillaia ḳandon shuru ḳorla, teu Mishori oḳole ita hunla ar Feraunor baṛir manshe-o i kobor faila. 3Iusufe tan baiaintore ḳoila, “Ami Iusuf; amar baba oḳono zinda asoin ni?” Ou tan baiainte ḍoraia zoban bond oigelo, matta farla na.

4Teu Iusufe tan baiainre ḳoila, “Tumra amar ḳasat ao.” Tara ḳasat aile tain ḳoila, “Ami tumrar hou bai Iusuf, Mishoro zaora befari oḳlor gese, tumra zare besilaislae. 5Oile tumra amare besislae ḳori oḳon bezar oio na, ba nizor ufre naraz oio na. Manshor zanor hefazotor lagi, Allae-u tumrar age amare ono faṭaisoin. 6Aḳal soler ou dui boros dori, te aro fas boros kunu ḳet-ḳamar ba foshol folto nae. 7Duniait tumrar aolad oḳolre basaia raḳar lagi Allae-u tan kudrote tumrar age amare faṭaisoin. 8Teu buza zae zen, tumra amare ino faṭaiso na, Allae-u faṭaisoin. Tain amare Feraunor bafor homani koria tan foribaror saloḳdar banaisoin, ar hara Mishor desh shashonor eḳtiar disoin. 9Oḳon tumra zoldi kori babar gese gia ḳo, tan fua Iusufe ḳoise, Allae amare hara Mishor deshor saloḳdar banaisoin, te tumi ar deri na ḳoria amar gese aio. 10Tumi, tumar fua-fuṛin, nati-futi, goru-meṛar fal ar tumar zotota ase, hokkolta loia amar gese Gushon elaḳat roibae. 11Hono ami tumare deḳa-huna ḳormu, aḳal to aro fas boros roibo, arnae tumitain hoḳole i aḳale behalot oizitae faro. 12Amar afon bai Bin-Iamine ar tumra hoḳole nizor souke deḳrae zen, ami nizor muke tumrar loge matram. 13Mishor desho amar zeta dafoṭ, man-ijjot deḳrae, tumra amar babare ita ḳoibae, ar tanre zoldi kori oḳano loia aibae.” 14Heshe Iusufe tan bai Bin-Iaminor golat ainja ḳori doria ḳandon shuru ḳorla ar Bin-Iamine-o golat dori kanda-ḳaṭi korla. 15Bade Iusufe tan hoḳol baiainre hunga dila ar tarar golat dori-o ḳandila. Teu baiainte-o tan loge mat-ḳota matla.

16Iusufor baiain aoar ḳobor Feraunor baṛit fosile, Feraun ar tan ḳormosari oḳol kushi oila. 17Feraune Iusufre ḳoila, “Tumar baiainre ḳo zen, tumra gadar fiṭit danor bosta bandia Kenan desho gia, 18babare ar tumrar foribaror hokkolre loia amar gese aio. Ami tumrare Mishoror bala bala siz oḳol dimu ar tumra deshor hoḳol tone bala zaga-o faibae. 19Ar tumrare ami hukum diar, tumra zarzir bou, fua-fuṛintor lagi Mishor desh taki gaṛi loia gia, tarare ar babare loia aio. 20Ar hono tumrar mal-samanar lagi maya deḳaio na, hara Mishor deshor bala bala siz oḳol to tumrar-u.”

21Israilor fuainte oula-u ḳorla. Feraunor hukume Iusufe tarar lagi gaṛi ar fotor ḳanir mosa dila. 22Tain era hokkolre eḳ seṭ ḳoria ḳafoṛ dila, oile Bin-Iaminre dila fas seṭ ḳafoṛ ar tin-sho rufar ṭeḳa. 23Tain tan bafor lagi doshgu gadar fiṭit ḳori Mishoror bala bala siz oḳol, ar doshgu gadir fiṭit ḳori kanir lagi ruṭi ar dan buzai kori faṭaila. 24Ou laḳan tan baiaintore bidae dila, bidae bala tain erare ḳoila, “Tumra foto laga-lagi korio na.”

25Bade tara Mishor tone Kenan desho, tarar baf Iakubor gese gia ḳoila, 26“Iusuf oḳono zinda ase. He to oḳon asta Mishor deshor ortaḳorta.” Oile ita hunia Iakubor hush uṛi gelo, tan bishash-u oilo na. 27Bade Iusufe tarare zeta ḳoia disla ita hunia, ar tane neoar lagi Iusufor faṭail gaṛin dekia, tarar baf Iakubor hush ṭik oilo. 28Israile ḳoila, “Amar fua Iusuf zen oḳono zita ase, oṭa-u to bout, morar age ami gia tare deḳa-u lagbo.”

Currently Selected:

Tourat 1: Foyda Nama 45: sylL

Highlight

Copy

Compare