Tourat 1: Foyda Nama 43

Dosh baie Bin-Iaminre loia gela

1Kenan deshor aḳalor dosha aro behal oilo. 2Ar Mishor desh tone zeta dan nisla, ita fuṛai gele Israile ḳoila, “Tumra hirbar gia amrar lagi aro kisu ḳani-kuraki loia anogi.” 3Teu Ehudae tanre ḳoilo, “Hou manshe amrare kub ḳoṛa bashae ḳoia disoin, ‘Tumrar bai tumrar loge na aile tumra ar amar samne aio na.’ 4Oḳon tumi amrar baire amrar loge ḳori deo, teu amra gia tumar lagi kani loia aimu. 5Ar tare loge na dile amra-o zaitam nae. Hi manshe amrare ḳoia disoin, ‘Tumrar baire loge na anle, tumra ar amar samne aio na.’ ” 6Israile ḳoila, “Tumra ḳene amar loge oula fatrami korlae? Tumrar aroḳ bai ase, ita tanre ḳene ḳoilae?” 7Tara ḳoila, “Hi manshe amrar ar amrar foribaror aga-guṛi hokkolta zikaisoin, ‘Tumrar baf kita oḳono zinda asoin ni? Tumrar ar kunu bai asoin ni?’ Amra ḳali tan soalor zuaf dislam, amra kunu zantam ni, tain ḳoiba tumrar baire-o loia aio?” 8Ehudae tan bafre ḳoila, “Tare amar loge ḳori dilao, amra zoldi zoldi roana oizai, teu tumi, amra ar amrar huruttain hokkol-u zane basmu, ḳeu mortam nae. 9Ami nize-u tar lagi zamin roilam, tare amar ges tone shomzia nio. Ami tare tumar gese firaia na anle, tumar gese azir na ḳorle, hara zindegi bora ami tumar gese dayi roimu. 10Ar oto deri na ḳorle, amra otodine duibar guria aitam farlam one.”

11Ou tarar baf Israile ḳoila, “Oula oile ek kam ḳoro, tumra zarzir begor maze onor bala bala mal, agor, mou, kushboy moshla, meshke-ambor, pesta ar badam boria hou manshor lagi salami loia zao. 12Ar tumrar loge ḳori agor ḍabul ṭeḳa neo, bostar muko ze ṭeḳa firot aise, ta-o hirbar loia zao, ki zani kunu bul oigesil. 13Tumrar i baire loge loia, zoldi kori hou manshor gese zao. 14Shorbo-shoktiman Allae tumrar lagi hou manshor dilo meherbani foyda ḳoroukka, zate tain tumrar hou bai ar Bin-Iaminre tumrar ato firot dein. Ar amar fua kuani gele, na oy gelo-u.” 15Teu tara hou salami, ḍabul ṭeḳa ar Bin-Iaminre loia roana oia, Mishor desho fosia Iusufor samne azir oila.

16Tarar loge Bin-Iaminre dekia Iusufe tan baṛir ḳadimre ḳoila, “Ou manush oḳolre baṛir bitre neo ar ḳoshi zobo ḳoria gust rando. Tara madane amar loge ḳaiba.” 17Iusufe zela ḳoila, ḳadime-o ṭik oula ḳorlo, he erare baṛir bitre loia gelo. 18Ar he erare Iusufor baṛir bitre neoae, tara ḍoraia mata-mati korla, “Agor fira ze ṭeḳa amrar bostat ḳori firot gesil, otar lagi-u amrare ono nira, oḳon amrar dush deḳaia mair-doir ḳoria amrare gulam banaiba, ar gada oḳol-o ḳaṛia niba.” 19Teu Iusufor baṛir dorzar samne aia tara baṛir ḳadimre ḳoila, 20“Huzur, amra er age-o dan loat aislam, 21heshe firot zaoar bala, dom loibar zagat fosia, bosta kulte-u deki, amrar fura ṭeḳa-foysha zarzir bostar muko roise, oḳon ou ṭeḳa firot anchi. 22Ar dan neoar lagi aro ṭeḳa anchi, oile hi ṭeḳa amrar bostar bitre ḳe toisil zani na.” 23Ou ḳadime ḳoilo, “Tumrar balai ouk, ḍoraio na. Tumrar ar tumrar bafor Allae, i gaibi don tumrar bostar maze disoin. Tumrar ṭeḳa ami faisi.” Bade he Shimionre bar ḳoria tarar gese loia ailo. 24He hoḳolre Iusufor baṛir bitre nia fani dilo tara fao duila ar he tarar gada oḳolre-o ḳani dilo. 25Iusuf madane aiba gotike, era tarar salami oḳol zuit ḳorla. Tara hunsla zen, tan loge-u tarar ḳana-dana oibo.

26Bade Iusuf baṛit aile, tarar hou salami oḳol goror bitre nia tanre dila, dia harle tanre soizda ḳorla. 27Tarar bala-bura ḳobor hunia tain zikaila, “Tumrar ze murobbi bafor ḳota ḳoislae, tain bala asoin ni? Tain zinda asoin ni?” 28Tara zuaf dila, “Ji oy, afnar gulam amrar baba oḳono zinda asoin ar bala asoin.” Heshe tara mata nuaia tanre ijjot ḳorla. 29Iusufe souk tulia tan nizor bai Bin-Iaminre dekia ḳoila, “Ouni tumrar hou huru bai, zar ḳota age ḳoislae?” Tain Bin-Iaminre ḳoila, “Allae tumare rohom ḳoroukka.” 30Baire dekia Iusufor dil ḳandito laglo. Tain zoldi kori bar oia, nizor kuṭat gia ḳandila. 31Bade souk-muk doia bar oia aila ar nizore shamlaia ḳani bilaibar hukum dila. 32Ou Iusufre, tan baiainre ar tan loge ḳaneala Mishori oḳolre alog alog zagat ḳani dila. Ḳaron Mishorinte Ibrani oḳlor loge boia ḳana-dana ḳorto na, ita tara gin ḳoroin. 33Tara Iusufor samne tan baiainre boṛore boṛor zagat, hurure hurur zagat boaila, teu tara taijjub oia eḳzone aroḳzonor bae sai roila. 34Ar Iusufe nizor talor ḳani tone tan baiainre deoaila, oile Bin-Iaminre hoḳol tone fas gun beshi deoa oilo. Ḳaia harle tara kushi oia uṭla.

Currently Selected:

Tourat 1: Foyda Nama 43: sylL

Highlight

Copy

Compare