Tourat 2: Hizrot 25
25
Allar fobitro gor bananir hukum (25:1—31:18)
Goror mal-samana zuganir hukum
1Mabude Musare ḳoila, 2“Tumi Boni Israilre ḳo, tara amar gese dan-ḳoyrat loia azir ouk. Tarar nizor kushie zeta dan ḳorba, ota tumi shomzia rakio. 3Tarar ges taki ou laḳan mal shomzio:
shuna, rufa, fitol;
4lilua, baingoni, lal rongor suta;
dami suti kafoṛ ar sagolor ruma;
5lal rong lagail meṛar samṛa, doriar fuʼ masor samṛa;
babla laḳṛi;
6serag oḳol zalanir lagi zoytunor tel;
kelafoti shomzibar telor moshla ar agor-kushboy bananir moshla;
7imamor lebasor efron ar bukur ufror tolit laganir akik moni ar baki hoḳol zator dami fattor.
8“Amar roar lagi tumi Boni Israil oḳolredi fak-fobitro ekḳan zaga toiar ḳoraibae. Teu ami tarar loge boshot ḳormu. 9Amar roar gor ar mal-samanar befare ami tumare zela nomuna deḳaimu, ekkere ou laḳan ḳori hoḳolta tiar ḳoraio.
Shahadot shonduk bananir niom
10“Tara babla laḳṛi dia egu shonduk banaiba. Iṭa lambae aṛai at, deṛ at fash ar deṛ at usa. 11Er bare-bitore ḳaṭi shunadi lefia dio, ar sairo kinaro shunar noksha lagaio. 12Aguindi shuna golaia sairṭa ḳoṛa er sairo kunat lagaio, ogalat duiṭa ar hogalat duiṭa lagaio. 13Babla laḳṛidi dugu benda banaia shunadi lefia dite oibo. 14Shondukre boia neoar lagi duio galar ḳoṛar mazedi, ou duio benda harani lagbo. 15Benda duioṭa shondukor ḳoṛar bitre harail roibo, iguin kulio na. 16Ami amar hukum-ahkam leḳa ze fobitro shahadot fattor tumare dimu, tumi iṭa ou shondukor bitre toio.
17“Ḳaṭi shunadi shondukor ekḳan ḍaḳna banaio, oḳanor ufre gunar kofora adae ḳora oibo. I ḍaḳna lambae aṛai at ar fashe deṛ at oibo. 18-19Tumi hou ḍaḳnar kinaro shuna fiṭaia dugu Karubi banaio. Ou Karubi deḳte Duldul guṛar laḳan ḍaḳna ala. Banaia shondukor dui galat lagaio, ogalat eḳṭa, ar hogalat eḳṭa. Duio Karubi ḍaḳnar loge ou laḳan ḳori shunadi banani lagbo, zeṭa astaṭae ḳali eḳ siz oy. 20Er ḍaḳna duioḳan ufredi melail roibo, ar er sayar tole taḳbo shondukor ḍaḳna. Duio Karubi mukamuki uba taḳbo, ar tarar souk roibo ḍaḳnar bae. 21I ḍaḳnare shondukor ufre lagaio, ar amar hukum-ahkam leḳa ze shahadot fattor tumare dimu, ou fattor tumi shondukor bitre toio. 22I shahadot shondukor ḍaḳnar ufre duio Karubir mazḳano, ami tumare didar dimu. Ou didaror shomoy Boni Israilor lagi amar hoḳol ain-ḳanun zanaimu.
Fobitro ruṭi raḳar ṭebul banaio
23“Babla laḳṛi dia dui at lamba, eḳ at fash ar deṛ at usa ḳori ekḳan ṭebul banaio. 24Oḳanre ḳaṭi shunadi lefia sairo kinaro noksha lagaio. 25Ṭebulor sairo kinaro sair angul usa ḳori eḳ haz dibae, hazor maze shunadi noksha ḳorbae. 26Ṭebulor sairo kunat sairo fayar ufre shunar sairṭa ḳoṛa lagaibae. 27I sairo ḳoṛain ṭebulor kunar hou usa hazor tole lagaio, zate ṭebul boia neoar bala ḳoṛar bitre benda harail zae. 28Benda duioṭa babla laḳṛidi banaia shunadi lefibae, ou bendadi ṭebul boia nibae. 29Ṭebulor ufror tal-bashon, Allar name ḍalia dibar shorbot-fanir sodgar zog ar mog, hoḳolta ḳaṭi shunadi banani lagbo. 30Ou ṭebulor ufre amar samne hamesha fobitro ruṭi raḳbae, i ruṭi zanu shob shomoy toa oy.”
Fobitro serag dani bananir niom
31Mabude Musare ḳoila, “Tumi kaṭi shunadi ekḳan serag dani banaibae, serag danir tola ar ḍanḍi kaṭi shuna fiṭaia goṛaibae. Ou ḍanḍi, fulor laḳan fiala, kuṛi ar fafṛi oḳol, serag danir hoḳoltae eḳloge eḳ fis oibo. 32Serag danir ḍanḍir dui galat tinṭa ḳori muṭ soyṭa ḍal taḳbo. 33Forteḳ ḍalor maze zoba fulor laḳan tingu ḳori fiala taḳbo. Serag danir soyo ḍalo eḳlaḳan ḳam ḳora oibo. 34Serag danir mul ḍanḍir maze-o zoba fulor laḳan sairṭa fiala taḳbo. 35Ou mul ḍanḍi taki baroil soyṭa ḍalor maze, foyla duio ḍalor zuṛat egu kuṛi, dusra duio ḍalor zuṛat arok kuṛi, ar heshor duio ḍalor zuṛat-o kuṛi dio. 36Kuṛi ar ḍal hoḳolta serag dani taki bar oibo, hoḳolta milia eḳ siz oibo. Astaṭa-u ḳaṭi shuna fiṭaia banani lagbo. 37Erbade shatṭa serag banaia ou serag danir ufre ou laḳan ḳori lagani lagbo, zate serag oḳol zalanir bade serag danir samna for oy. 38Seragor fita saf ḳorar simṭa ar zalail fitar sali toar lagi koygu baṭi, ḳaṭi shunadi banani lagbo. 39Serag danir hoḳolta bananir lagi eḳ mon ḳaṭi shuna lagbo.
40“Huno, ou faṛor ufre tumare zela noksha deḳail oilo, ekkere ou laḳan ḳori hoḳolta banaio.”
Currently Selected:
Tourat 2: Hizrot 25: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
