ইঞ্জিল ২৭: জাইরা কালাম 7
7
আল্লার সীল-চাপ্পড় মারা গুলাম
1এরবাদে আমি দেখলাম, দুনিয়ার চাইর কুনাত চাইর জন ফিরিস্তা উবাই রইছইন। তারা দুনিয়াত, দরিয়াত আর হকল গাছ-পালাত বাতাস হামানির দুয়ার বন্দ করার লাগি উবাইছইন। 2বাদে আমি দেখলাম, পুবে থাকি আরক জন ফিরিস্তা উঠিয়া আইরা, জিন্দা আল্লার সীল-চাপ্পড় তান গেছে আছে। তাইন আইয়া যে চাইর জন ফিরিস্তারে দুনিয়া আর দরিয়ার খেতি করার লাগি খেমতা দেওয়া অইছিল, হউ চাইরো ফিরিস্তারে জুরে জুরে ডাকিয়া কইলা, 3“আমরা যতবইল আমরার আল্লার গুলাম অকলর কপালো সীল না মারছি, অতবইল তুমরা দুনিয়ার, দরিয়ার বা গাছ-পালার খেতি করিও না।” 4বাদে আমি হউ সীল-চাপ্পড় মারা মানষর পরিমান হুনলাম। বনি ইছরাইলর হকল খান্দান থাকি এক লাখ চৌচাল্লিশ আজার জনরে সীল মারা অইছে।
5এহুদা খান্দানর বারো আজার জন সীল মারা;
রুবেন খান্দান থাকি বারো আজার;
ছাদু খান্দান থাকি বারো আজার;
6আশির খান্দান থাকি বারো আজার;
নপ্তালি খান্দান থাকি বারো আজার;
মানশা খান্দান থাকি বারো আজার;
7শিমিয়ন খান্দান থাকি বারো আজার;
লেবি খান্দান থাকি বারো আজার;
ইছাখর খান্দান থাকি বারো আজার;
8সবুলন খান্দান থাকি বারো আজার;
ইউছুফ খান্দান থাকি বারো আজার;
বিন-ইয়ামিন খান্দান থাকি বারো আজার জন সীল মারা।
ধলা লেবাছ ফিন্দা মানষর মিছিল
9বাদে আমি দেখলাম, পরতেক দেশ, হকল খান্দান, হকল জাতি আর হকল জাতর বুলিয়ে মাতরা বউত মানুষ দলা অইছইন, এরারে গনিয়া ফুড়ানির সাইধ্য কেউরর নাই। এরা ধলা লেবাছ ফিন্দিয়া খেজুর পাতা আতো লইয়া, হউ তখত আর মেড়া-বাইচ্চার ছামনে উবাই রইছইন। 10তারা জুরে জুরে কইরা,
“আমরার আল্লা যেইন তখতো বওয়াত আছইন,
আর মেড়া-বাইচ্চার আতোউ,
গুনার মাফি আর নাজাত আছে।”
11এরবাদে তামাম ফিরিস্তা অকল, হউ তখতর, হউ মুরব্বি নেতা অকলর আর চাইরো জানদারর চাইরো কান্দাবায় উবাইলা। তারা তখতর ছামনে সইজদাত পড়িয়া কইলা,
12“আমিন।
তারিফ, গৌরব, আখল আর শুকরিয়া,
ইজ্জত, খেমতা আর বল-শক্তি,
যুগে যুগে আমরার আল্লারউ অউক।
আমিন।”
13বাদে মুরব্বি নেতা অকলর মাজর একজনে আমারে কইলা, “বুজরায় নি, ধলা লেবাছ ফিন্দা অউ মানুষ অকল কে, এরা কুয়াই থাকি আইছইন?” 14আমি তানরে কইলাম, “ও মালিক, ইতা তো আপনেউ জানইন।” তেউ তাইন কইলা, “এরা অইলা হউ জন অকল, যেরা হউ মহা মছিবতর মাজ থাকি আইছে। তারার লেবাছরে মেড়া-বাইচ্চার লউদি ধইয়া ধলা বানাইছে।
15এরলাগি এরা আল্লার তখতর ছামনে আছে;
তারা দিন-রাইত বেহেস্তি এবাদত খানার মাজে এবাদত-বন্দেগি কররা।
আর তখতো যেইন বওয়াত আছইন,
তাইন নিজে এরার উপরে তাম্বু টানাই দিবা।
16এরার আর কুনুদিন ভুক লাগতো নায়,
পানির পিয়াছে ধরতো নায়;
সুরুজর তেজ এরার গতরো লাগতো নায়,
কুনু গরমও লাগতো নায়।
17তখতর মাজর মেড়া-বাইচ্চায়উ এরার রাখালি করবা।
তাইন এরারে আবে-হায়াতর
জিন্দেগি-পানির ঝরনার গেছে লইয়া যাইবা,
আর আল্লায় এরার চউখর পানি ফুছিয়া দিবা।”
Currently Selected:
ইঞ্জিল ২৭: জাইরা কালাম 7: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
