আছমানি কিতাব: সুলাইমানি ছিল্লেখ 29
29
1হেদায়তর বুলি হুনিয়াও যে রয় পাষান,
আখতাউ অইবো চুরমার রেহাই নায় তান।
2পরেজগারে খেমতা পাইলে খুশি হকলে,
নাফরমানর খেমতায় সবে হায় হায় করে।
3গিয়ানরে যে ভালা পায় বাফরে হে খুশি করে,
ছিলানর লগে যেগু রয় নিজর ধন খুয়ায় হে।
4হক বিচারি রাজায় দেশরে থির রাখে,
ঘুষখুর রাজায় তো দেশরে বিনাশ করে।
5আরি-ফরিরে যে তেল মারে,
ফান্দ পাতে নিজর পাওর তলে।
6নাফরমানে নাফরমানির ফান্দো পড়ে,
পরেজগারে গজল গাইয়া ফুর্তি করে।
7পরেজগারে চায় গরিবে পাউক হক বিচার,
নাফরমানে বুজে না ইলা কুনু বেয়াপার।
8মশকরা কররায় টাউনো আগুইন লাগায়,
গিয়ানি অকলে মানষর গুছারে থামায়।
9গিয়ানিয়ে মামলা করলে আম্মকর বিপক্ষে,
আম্মকে তো গুছা-ঠাট্টায় মিটমাট না করে।
10খুনি জনে নির্দুষিরে ঘিন্নায়,
হক জনরেও খুন করতো চায়।
11আম্মকে রাগ-গুছা জাইর করে,
গিয়ানিয়ে নিজরে দমাই রাখে।
12রাজায় মিছা মাত কানো লইলে,
উজির-নাজিরেও নাফরমানি করে।
13গরিব আর জালিম হমান এক বেয়াপারে,
চখুর ফর দেইন মাবুদে অউ দুইও জনরে।
14গরিবর হক বিচার করইন যে রাজা,
তান গদি বওয়াল রয় হর-হামেশা।
15হেদায়ত আর ছিংলায় গিয়ান দান করে,
শাসন ছাড়া পুতে মাʼরে বেইজ্জত করে।
16নাফরমান বাড়িলে গুনাও বাড়ে,
তারার পতন দেখবা পরেজগারে।
17তুমার পুতরে শাসন করো হে দিবো শান্তি,
তার লাগি তুমার দিলে করবো খুশি-ফুর্তি।
18হেউ সুখি যে শরিয়ত মানে,
ওহী ছাড়া মানুষ সীমা ছাড়ে।
19গুলাম সুজা অয় না মুখর জবানে,
বুজিয়াও হে না বুজার ভান করে।
20অলা মানুষ দেখছো নি বুজার আগেউ মাতে?
অগু থাকি তো ভরসা ভালা আম্মকর উপরে।
21হুরু থাকিউ মাথাত তুললে কুনু চাকররে,
বাদে তারে দমাইল যায় না বেয়াদবি করে।
22রাগি মানষে মাইর লাগায়,
গরম মাথায় গুনা বাড়ায়।
23অহংকারে পতন ঘটায়,
নরম মনে ইজ্জত বাড়ায়।
24চুরর সংগি জনে নিজর খেতি আনে,
কছম করাইলেও সাক্ষি দেয় না হে।
25মানষরে ডরানি তো ফান্দর মত,
মাবুদর ভরসায় রাখে নিরাপদো।
26রাজারে নিজর পক্ষে বউতে পাইতো চায়,
মানষে খালি মাবুদ থাকি হক বিচার পায়।
27পরেজগারর গেছে না-হক জন নফরতি,
নাফরমানর গেছে হক-পথিয়ে নফরতি।
Currently Selected:
আছমানি কিতাব: সুলাইমানি ছিল্লেখ 29: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
