আছমানি কিতাব: সুলাইমানি ছিল্লেখ 21
21
1বাদশার দিল মাবুদর আতো পানির ফুতর লাখান,
যেবায় খুশি অবায় ঘুরাইন ইচ্ছামতো তান।
2নিজর সব পথ ছহি নিজর চখুর গেছে,
দিলর সঠিক উজন করইন তো মাবুদে।
3মাবুদর দরবারো কুরবানি দেওয়া থাকি,
হক বিচার, হক কামো তাইন আরো খুশি।
4দেমাগির চউখ, দিলর গরিমা,
নাফরমানর লেমও গুনায় ভরা।
5পরিশ্রমির চিন্তায় ধনি বানায় তারে,
উড়া-তাড়ার কামে নিচ্চিত অভাব আনে।
6মিছা মাতর জিফরাদি দৌলত জমাইলে,
ইতা থুড়া সময় টিকে, মরন ফান্দও বনে।
7নিজর জুলুমে ছেচরাইয়া নেয় নাফরমানরে,
নাফরমান তো রাজি নায় হক পথে চলিতে।
8অপরাধির পথ বেকা-তেড়া,
খাটি জনর কাম সরল-সোজা।
9কাইজ্জাখুর বউ লইয়া সংসার করা থাকিয়া,
ছাতর কুনাত একলা একলা রওয়া ভালা।
10খারাপির আশিক নাফরমানর জান,
আরি-ফরিয়ে পায় না তার দয়াখান।
11তামশাকারিরে সাজা দিলে সিধা অয় গিয়ানি,
গিয়ানি জনরে বুজাইলে তো বাড়ে তার বুদ্ধি।
12হক আল্লায় নাফরমানর ঘরর বায় চাইন,
নাফরমানরে তাইন মছিবতো ফালাইন।
13গরিবর কান্দন হুনিয়া বন্দ রাখলে কান,
নিজর কান্দনো হে পাইতো নায় আছান।
14লুকাইল বখশিশে গুছারে কমায়,
গোপন ঘুষে গরম রাগরে থামায়।
15পরেজগার খুশ হক বিচারে,
অপরাধিয়ে ডরাইয়া কাপে।
16বুদ্ধির পথ ছাড়ি বে-পথে গেলে,
মুর্দার মজলিছো হামাইবো হে।
17মউজ-ফুর্তিত মন মজাইলে গরিব বনিবো,
শরাব আর আতরে মজিলে ধনি না অইবো।
18পরেজগারর বদলা সাজা পাইবো নাফরমানে,
হক মানষর বদলা সাজা পাইবো বেইমানে।
19বদরাগি কাইজ্জাখুর বউর লগে রওয়া থাকিয়া,
নিরাই-নির্জন বনবাসো একলা রওয়াউ ভালা।
20গিয়ানির ঘরো দামি ধন, খুশবয় তেল থাকে,
আম্মকে তো খুয়াইলায় ইতা হকলতারে।
21হক-হালাল, দয়া-মায়ায় যে চলে,
জিন্দেগি, রহমত, ইজ্জত তার মিলে।
22গিয়ানিয়ে বলবানর টাউনো হামলা চালায়,
তারার বল-শক্তির ভরসারে পতন ঘটায়।
23জবান-জিফরা সাবধান যার,
বিপদ থাকি জান বাচে তার।
24গরিমা-অহংকারির নামউ “মশকরাকারি,”
চলা-ফিরায় দেখায় তারা বেশি বাহাদুরি।
25আলসিয়ার শখে তার মরন আনে,
তার আত রাজি নায় তো কুনু কামে।
26হারা দিন হে খালি পাইতো চায়,
পরেজগারে খুলা আতে দান বিলায়।
27নাফরমানর কুরবানি মাবুদর নফরতি,
বদ নিয়তির কুরবানি আরো বেশি লান্নতি।
28মিছা সাক্ষি দেওরা জন বিনাশ অইযিবো,
খিয়াল করি যে হুনে তারে সবে হুনিবো।
29নাফরমানে মুখদি ফালাফালি করে,
আপন পথর চিন্তা করে দীনদারে।
30নায় কুনু গিয়ান, নায় কুনু বুদ্ধি,
নায় কুনু পরামিশ মাবুদর ছামনে।
31যুদ্ধর লাগি ঘোড়া জুইত-জাইত রাখা অয়,
খালি মাবুদর উপরে নির্ভর করে যুদ্ধর জয়।
Currently Selected:
আছমানি কিতাব: সুলাইমানি ছিল্লেখ 21: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
