ꠎꠛꠥꠞ ꠡꠞꠤꠚ 25
25
ꠀꠟ-ꠎꠛꠥꠞ ২৫
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1ꠅ ꠝꠣꠛꠥꠖ, ꠀꠝꠣꠞ ꠎꠣꠘꠞꠦ ꠔꠥꠝꠣꠞ ꠖꠞꠛꠣꠞꠅ ꠖꠤꠟꠣꠁꠍꠤ ꠡꠙꠤꠀ,
2ꠈꠣꠟꠤ ꠔꠥꠝꠣꠞ ꠃꠙꠞꠦꠃ ꠜꠞꠡꠣ ꠇꠞꠤ, ꠅꠉ ꠀꠝꠣꠞ ꠀꠟ꠆ꠟꠣ।
ꠡꠞꠝꠤꠘ꠆ꠖꠣ ꠇꠞꠤꠅ ꠘꠣ ꠝꠞꠦ ꠖꠥꠡꠝꠘꠞ ꠍꠣꠝꠘꠦ,
ꠛꠣꠢꠣꠖꠥꠞꠤ ꠘꠣ ꠇꠞꠃꠇ ꠔꠣꠞꠣ ꠀꠝꠣꠞ ꠃꠙꠞꠦ।
3ꠔꠥꠝꠣꠞ ꠃꠙꠞꠦ ꠇꠞꠦ ꠎꠣꠞꠣ ꠀꠡꠣ-ꠜꠞꠡꠣ,
ꠔꠣꠞꠣꠞ ꠝꠣꠎꠞ ꠇꠥꠘꠥ ꠎꠘ ꠅꠁꠔ ꠘꠣꠄ ꠔ ꠡꠞꠝꠤꠘ꠆ꠖꠣ,
ꠡꠞꠝ ꠙꠣꠁꠛ ꠔꠣꠞꠣ, ꠈꠣꠝꠈꠣ ꠛꠦꠁꠝꠣꠘꠤ ꠇꠞꠦ ꠎꠣꠞꠣ।
4ꠅ ꠀꠟ꠆ꠟꠣ, ꠔꠥꠝꠣꠞ ꠙꠕ ꠅꠇꠟ ꠀꠝꠣꠞꠦ ꠌꠤꠘꠣꠅ,
ꠔꠥꠝꠣꠞ ꠡꠑꠤꠇ ꠞꠣꠡ꠆ꠔꠣ ꠀꠝꠣꠞꠦ ꠖꠦꠈꠣꠅ।
5ꠔꠥꠝꠣꠞ ꠢꠇꠦ ꠀꠝꠣꠞꠦ ꠌꠣꠟꠣꠅ ꠀꠞ ꠢꠤꠇꠣꠅ,
ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠝꠣꠟꠤꠇ ꠔ ꠔꠥꠝꠤꠃ,
ꠢꠞ-ꠢꠣꠝꠦꠡꠣ ꠔꠥꠝꠣꠞ ꠃꠙꠞꠦ ꠀꠡꠣ ꠞꠣꠈꠤ।
6ꠅꠉ ꠝꠣꠛꠥꠖ, ꠁꠀꠖ ꠇꠞꠅ ꠔꠥꠝꠣꠞ ꠖꠄꠀ-ꠝꠣꠄꠀ,
ꠡꠥꠞꠥ ꠕꠣꠇꠤ ꠔ ꠄꠛ ꠇꠞꠣꠔ ꠀꠍ ꠅꠔꠣ।
7ꠀꠝꠣꠞ ꠎꠥꠀꠘ ꠇꠣꠟꠞ ꠉꠥꠘꠣ-ꠘꠣꠚꠞꠝꠣꠘꠤ ꠘꠣ ꠞꠣꠈꠤꠅ ꠝꠘꠅ,
ꠅ ꠉ ꠝꠣꠛꠥꠖ, ꠔꠥꠝꠣꠞ ꠖꠄꠀ-ꠝꠣꠄꠀꠄ ꠝꠞꠦ ꠁꠀꠖ ꠇꠞꠅ,
ꠔꠥꠝꠣꠞ ꠅꠐꠟ ꠝꠦꠢꠦꠞꠛꠣꠘꠤꠞ ꠈꠣꠔꠤꠞꠦ ꠔꠥꠝꠤ ꠅꠟꠣ ꠇꠞꠅ।
8ꠝꠣꠛꠥꠖ ꠔ ꠖꠄꠀꠟꠥ, ꠅꠔꠤ ꠢꠇ ꠔꠣꠁꠘ,
ꠄꠞꠟꠣꠉꠤ ꠉꠥꠘꠣꠉꠣꠞꠞꠦꠅ ꠔꠣꠘ ꠙꠕ ꠌꠤꠘꠣꠁꠘ।
9ꠢꠇ ꠙꠕꠦ ꠌꠣꠟꠣꠁꠘ ꠔꠣꠁꠘ ꠘꠞꠝ ꠖꠤꠟꠞ ꠝꠣꠘꠡꠞꠦ,
ꠔꠣꠘ ꠙꠕ ꠖꠦꠈꠣꠁ ꠖꠦꠁꠘ ꠔꠣꠞꠣ ꠢꠇꠟꠞꠦ।
10ꠔꠣꠘ ꠅꠀꠖꠣ-ꠌꠥꠇ꠆ꠔꠤ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠦ ꠎꠣꠞꠣ,
ꠔꠣꠞꠣꠞ ꠟꠣꠉꠤ ꠔꠣꠘ ꠙꠕ ꠅꠇꠟ ꠢꠇ ꠀꠞ ꠖꠄꠀꠄ ꠜꠞꠣ।
11ꠛꠃꠔ ꠛꠖ ꠇꠣꠝ ꠘꠣꠚꠞꠝꠣꠘꠤ ꠇꠞꠤꠟꠤꠍꠤ ꠀꠝꠤ,
ꠔꠥꠝꠣꠞ ꠘꠣꠝꠞ ꠖꠥꠀꠁ ꠉ ꠝꠣꠛꠥꠖ, ꠖꠤꠟꠣꠅ ꠝꠞꠦ ꠝꠣꠚꠤ।
12ꠝꠣꠛꠥꠖꠞꠦ ꠢꠣꠍꠣꠃ ꠒꠞꠣꠁꠀ ꠌꠟꠦꠞ ꠅꠟꠣ ꠀꠖꠝ ꠇꠦ?
ꠇꠥꠘ ꠙꠕ ꠛꠣꠍꠤꠀ ꠘꠤꠔ, ꠝꠣꠛꠥꠖꠦꠃ ꠖꠦꠈꠣꠁꠘ ꠔꠣꠞꠦ।
13ꠡꠥꠈ-ꠡꠣꠘ꠆ꠔꠤ ꠀꠞꠣꠝꠦ ꠇꠣꠐꠣꠁꠘ ꠔꠣꠞꠣꠞ ꠎꠤꠘ꠆ꠖꠦꠉꠣꠘꠤ,
ꠔꠣꠞꠣꠞ ꠀꠅꠟꠣꠖꠦꠅ ꠙꠣꠁꠛꠣ ꠖꠦꠡꠞ ꠝꠤꠞꠣꠡꠖꠣꠞꠤ।
14ꠝꠣꠛꠥꠖꠞ ꠒꠞ-ꠈꠚꠦ ꠎꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠘ,
ꠔꠣꠞꠣꠞꠦꠃ ꠔꠣꠘ ꠖꠤꠟꠞ ꠉꠥꠙꠘ ꠇꠕꠣ ꠎꠣꠘꠣꠁꠘ,
ꠔꠣꠘ ꠅꠀꠖꠣ-ꠌꠥꠇ꠆ꠔꠤꠞ ꠛꠦꠙꠣꠞ ꠔꠣꠞꠣꠞꠦ ꠢꠤꠇꠣꠁꠘ।
15ꠀꠝꠣꠞ ꠌꠃꠈꠦ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠛꠣꠄ ꠌꠣꠁ ꠞꠁꠍꠦ,
ꠡꠤꠇꠣꠞꠤꠞ ꠎꠣꠟ ꠕꠣꠇꠤ ꠔꠣꠁꠘ ꠛꠣꠌꠣꠁꠘ ꠀꠝꠣꠞ ꠙꠣꠅꠞꠦ।
16ꠞꠢꠝ ꠇꠞꠅ ꠔꠥꠝꠤ ꠝꠞꠦ, ꠀꠝꠣꠞ ꠛꠣꠄꠖꠤ ꠌꠣꠁꠀ,
ꠀꠝꠤ ꠅꠁꠟꠣꠝ ꠖꠥꠈꠤ-ꠇꠣꠋꠉꠣꠟ, ꠀꠍꠤ ꠛꠠ ꠄꠇꠟꠣ।
17ꠀꠝꠣꠞ ꠖꠤꠟꠞ ꠖꠥꠈ-ꠎꠘꠔ꠆ꠞꠘꠣ ꠖꠤꠟꠣꠅ ꠢꠞꠣꠁꠀ,
ꠢꠇ꠆ꠇꠟ ꠛꠣꠟꠣ-ꠝꠍꠤꠛꠔ ꠕꠣꠇꠤ ꠞꠣꠈꠅ ꠛꠣꠌꠣꠁꠀ।
18ꠖꠦꠈꠅ ꠝꠞ ꠖꠥꠈ-ꠝꠍꠤꠛꠔ ꠛꠦꠢꠣꠟꠔ ꠖꠡꠣ,
ꠝꠣꠚ ꠇꠞꠤꠀ ꠖꠤꠟꠣꠅ ꠝꠞ ꠎꠤꠘ꠆ꠖꠦꠉꠤꠞ ꠉꠥꠘꠣ।
19ꠖꠦꠈꠞꠣꠄ ꠘꠤ ꠇꠔ ꠖꠥꠡꠝꠘ ꠟꠣꠉꠍꠦ ꠀꠝꠣꠞ ꠈꠞꠦ,
ꠔꠣꠞꠣ ꠌꠞꠝ ꠁꠋꠡꠣ-ꠊꠤꠘ꠆ꠘꠣ ꠇꠞꠦꠞ ꠀꠝꠣꠞꠦ।
20ꠚꠣꠘꠣ ꠖꠦꠅ ꠀꠝꠣꠞꠦ, ꠛꠣꠌꠣꠅ ꠀꠝꠣꠞ ꠎꠣꠘ ꠈꠣꠘ,
ꠀꠡꠞꠄ ꠟꠁꠍꠤ ꠔꠥꠝꠣꠞ ꠉꠦꠍꠦ, ꠞꠣꠈꠅ ꠀꠝꠣꠞ ꠝꠣꠘ-ꠡꠝ꠆ꠝꠣꠘ।
21ꠢꠇ-ꠢꠣꠟꠣꠟꠤ ꠡꠞꠟꠔꠣ ꠇꠞꠃꠇ ꠀꠝꠣꠞꠦ ꠞꠇ꠆ꠇꠣ,
ꠀꠝꠤ ꠔ ꠔꠥꠝꠣꠞꠃ ꠃꠙꠞꠦ ꠇꠞꠍꠤ ꠜꠞꠡꠣ।
22ꠅ ꠉ ꠀꠟ꠆ꠟꠣ, ꠈꠣꠟꠣꠍ ꠇꠞꠅ ꠛꠘꠤ ꠁꠍꠞꠣꠁꠟꠞꠦ,
ꠔꠣꠞꠣꠞ ꠢꠇꠟ ꠝꠍꠤꠛꠔ ꠕꠣꠇꠤ ꠛꠣꠌꠣꠅ ꠔꠣꠞꠣꠞꠦ॥
Currently Selected:
ꠎꠛꠥꠞ ꠡꠞꠤꠚ 25: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
