ꠁꠘ꠆ꠎꠤꠟ ১: ꠝꠕꠤ 24

ꠇꠤꠀꠝꠔꠞ ꠀꠟꠣꠝꠔ

1ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞ ꠅꠁꠀ ꠎꠣꠁꠞꠣꠉꠤ, ꠅꠃ ꠡꠝꠄ ꠔꠣꠘ ꠍꠣꠢꠣꠛꠤ ꠅꠇꠟ ꠔꠣꠘ ꠉꠦꠍꠦ ꠀꠁꠟꠣ, ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘ꠆ꠖꠞ ꠡꠥꠘ꠆ꠖꠞ ꠖꠟꠣꠘ ꠖꠦꠈꠣꠘꠤꠞ ꠟꠣꠉꠤ। 2ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠅꠃ ꠎꠦꠔꠣ ꠛꠠ ꠛꠠ ꠖꠟꠣꠘ ꠖꠦꠈꠞꠣꠄ, ꠁꠔꠣꠞ ꠖꠥꠁ ꠁꠐ ꠄꠇꠈꠣꠘꠅ ꠞꠁꠔ ꠘꠣꠄ, ꠢꠇꠟꠔꠣ ꠝꠣꠐꠤꠔ ꠝꠤꠡꠤꠎꠤꠛ।”

3ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠄꠔꠥꠘ ꠙꠣꠠꠞ ꠃꠙꠞꠦ ꠛꠅꠀꠔ ꠀꠍꠟꠣ, ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠀꠁꠀ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣꠞꠦ ꠇꠁꠛꠣ ꠘꠤ, ꠁꠔꠣ ꠇꠥꠘ ꠡꠝꠄ ꠅꠁꠛ? ꠇꠥꠘ ꠀꠟꠣꠝꠔ ꠖꠦꠈꠤꠀ ꠀꠝꠞꠣ ꠛꠥꠎꠝꠥ, ꠀꠙꠘꠣꠞ ꠀꠅꠀꠞ ꠡꠝꠄ ꠀꠞ ꠇꠤꠀꠝꠔꠞꠅ ꠡꠝꠄ ꠀꠁꠌ꠆ꠍꠦ?” 4ꠁꠍꠣꠄ ꠇꠁꠟꠣ, “ꠖꠦꠈꠤꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠘꠣ ꠐꠉꠦ। 5ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤꠀ ꠀꠁꠛ, ꠀꠁꠀ ꠇꠁꠛ, ꠀꠝꠤꠃ ꠀꠟ-ꠝꠍꠤ, ꠇꠁꠀ ꠛꠃꠔꠞꠦ ꠐꠉꠤꠛ। 6ꠢꠥꠘꠅ, ꠎꠥꠖ꠆ꠖꠞ ꠀꠅꠀꠎ ꠀꠞ ꠟꠣꠠꠣꠁꠞ ꠈꠛꠞ ꠔꠥꠝꠞꠣ ꠙꠣꠁꠛꠣꠄ, ꠅꠁꠟꠦ ꠁꠔꠣꠄ ꠒꠞꠣꠁꠅ ꠘꠣ। ꠁꠔꠣ ꠘꠤꠌꠄ ꠊꠐꠛ, ꠊꠐꠟꠦꠅ ꠁꠔꠣ ꠔ ꠡꠦꠡ ꠘꠣꠄ। 7ꠄꠇ ꠎꠣꠔꠤꠄ ꠀꠞꠇ ꠎꠣꠔꠤꠞ ꠟꠉꠦ, ꠄꠇ ꠖꠦꠡꠦ ꠀꠞꠇ ꠖꠦꠡꠞ ꠟꠉꠦ ꠟꠣꠠꠣꠁ ꠇꠞꠛ। ꠛꠃꠔ ꠎꠣꠉꠣꠔ ꠜꠂꠍꠣꠟ ꠀꠞ ꠘꠤꠖꠣꠘ ꠖꠦꠈꠣ ꠖꠤꠛ। 8ꠅꠁꠟꠦ ꠁꠔꠣ ꠔ ꠈꠣꠟꠤ ꠝꠍꠤꠛꠔꠞ ꠡꠥꠞꠥ।

9“ꠅꠃ ꠡꠝꠄ ꠀꠁꠟꠦ ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠣꠞ ꠟꠣꠉꠤ ꠗꠞꠣꠁ ꠖꠤꠛ ꠀꠞ ꠈꠥꠘ ꠇꠞꠣꠁꠛ। ꠀꠝꠣꠞ ꠟꠣꠉꠤ ꠢꠇꠟ ꠎꠣꠔꠤꠄ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ। 10ꠔꠦꠃ ꠛꠃꠔ ꠎꠘ ꠙꠤꠍꠟꠤꠎꠤꠛ, ꠄꠇꠦ-ꠅꠁꠘ꠆ꠘꠞꠦ ꠊꠤꠘ꠆ꠘꠣꠁꠛ ꠀꠞ ꠗꠞꠣꠁ ꠖꠤꠛ। 11ꠛꠃꠔ ꠜꠘ꠆ꠒ ꠘꠛꠤ ꠀꠁꠀ ꠝꠣꠘꠡꠞꠦ ꠐꠉꠤꠛꠣ। 12ꠘꠣꠚꠞꠝꠣꠘꠤꠞ ꠙꠞꠤꠝꠣꠘ ꠛꠣꠠꠤꠎꠤꠛ, ꠄꠞꠟꠣꠉꠤ ꠛꠃꠔ ꠝꠣꠘꠡꠞ ꠝꠣꠄꠀ-ꠝꠝꠔꠣ ꠇꠝꠤꠎꠤꠛ। 13ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦꠞꠣ ꠐꠤꠇꠤꠀ ꠞꠁꠛꠣ, ꠄꠞꠣꠃ ꠞꠦꠢꠣꠁ ꠙꠣꠁꠛꠣ। 14ꠢꠇꠟ ꠎꠣꠔꠤꠞ ꠉꠦꠍꠦ ꠡꠣꠇ꠆ꠇꠤ ꠢꠤꠡꠣꠛꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠛ, ꠄꠞꠛꠣꠖꠦꠃ ꠇꠤꠀꠝꠔ ꠀꠁꠛ।

ꠀꠈꠦꠞꠤ ꠎꠝꠣꠘꠣꠞ ꠢꠣꠟꠔ

15“ꠢꠎꠞꠔ ꠖꠣꠘꠤꠀꠟ ꠘꠛꠤꠞ ꠝꠥꠈ ꠕꠣꠇꠤ ꠎꠦ ꠛꠦꠎꠥꠁꠔꠣ ꠘꠚꠞꠔꠤ ꠎꠤꠘꠤꠡꠞ ꠇꠕꠣ ꠎꠣꠘꠣꠁꠟ ꠅꠁꠍꠦ, ꠔꠥꠝꠞꠣ ꠅꠃ ꠙꠣꠇ ꠎꠣꠉꠣꠔ ꠁ ꠎꠤꠘꠤꠡ ꠖꠦꠈꠛꠣꠄ। ꠎꠦ ꠎꠘꠦ ꠔꠤꠟꠣꠅꠔ ꠇꠞꠦꠞ, ꠢꠦ ꠛꠥꠎꠃꠇ। 16ꠅꠃ ꠡꠝꠄ ꠎꠦꠞꠣ ꠄꠢꠥꠖꠤꠀ ꠎꠤꠟꠣꠔ ꠕꠣꠇꠛꠣ, ꠔꠣꠞꠣ ꠙꠣꠠꠦꠖꠤ ꠉꠤꠀ ꠜꠣꠉꠃꠇ। 17ꠢꠤꠖꠤꠘ ꠇꠦꠃ ꠎꠥꠖꠤ ꠊꠞꠞ ꠌꠣꠟꠞ ꠃꠙꠞꠦ ꠕꠣꠇꠦ, ꠢꠦ ꠔꠣꠞ ꠊꠞꠞ ꠝꠣꠟ-ꠍꠣꠝꠣꠘꠣ ꠘꠤꠛꠣꠞ ꠟꠣꠉꠤ, ꠟꠣꠝꠣꠔ ꠟꠣꠝꠤꠀ ꠊꠞꠞ ꠜꠤꠔꠞꠦ ꠘꠣ ꠢꠣꠝꠣꠃꠇ। 18ꠎꠦꠞꠣ ꠛꠘ꠆ꠖꠞ ꠝꠣꠎꠦ ꠀꠍꠦ, ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠘꠤꠛꠣꠞ ꠟꠣꠉꠤ ꠛꠣꠠꠤꠔ ꠘꠣ ꠀꠃꠇ। 19ꠅꠃ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠙꠦꠐꠅ ꠢꠥꠞꠥꠔ꠆ꠔꠣ, ꠀꠞ ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠞꠣ, ꠔꠣꠞꠣꠞ ꠛꠠ ꠝꠍꠤꠛꠔ ꠅꠁꠛ। 20ꠔꠥꠝꠞꠣ ꠖꠥꠀ ꠇꠞꠅ, ꠡꠤꠔꠞ ꠖꠤꠘꠅ ꠛꠣ ꠎꠥꠝ꠆ꠝꠣꠛꠣꠞꠦ ꠎꠣꠘꠥ ꠔꠥꠝꠞꠣꠞ ꠜꠣꠉꠤꠀ ꠎꠣꠅꠀ ꠘꠣ ꠟꠣꠉꠦ। 21ꠅꠃ ꠡꠝꠄ ꠅꠔ ꠛꠦꠎꠥꠁꠔꠣ ꠇꠡ꠆ꠐ ꠅꠁꠛ, ꠎꠦꠔꠣ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ, ꠀꠞ ꠅꠁꠔ-ꠅ ꠘꠣꠄ। 22ꠝꠣꠛꠥꠖꠦ ꠎꠥꠖꠤ ꠁ ꠡꠝꠄꠞꠦ ꠇꠝꠣꠁꠀ ꠘꠣ ꠖꠤꠔꠣ, ꠔꠦ ꠇꠦꠃ ꠎꠤꠘ꠆ꠖꠣ ꠞꠁꠟ ꠘꠣ ꠅꠘꠦ। ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠁ ꠡꠝꠄ ꠇꠝꠣꠁꠀ ꠖꠤꠛꠣ।

23“ꠢꠤ ꠡꠝꠄ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ, ‘ꠢꠥꠘꠍ ꠘꠤ, ꠀꠟ-ꠝꠍꠤ ꠛꠥꠟꠦ ꠅꠘꠅ ꠀꠁꠍꠂꠘ’ ꠛꠣ ‘ꠢꠘꠅ ꠀꠁꠍꠂꠘ’ ꠔꠦ ꠔꠥꠝꠞꠣ ꠄꠇꠤꠘ ꠇꠞꠤꠅ ꠘꠣ। 24ꠇꠣꠞꠘ ꠀꠟ-ꠝꠍꠤ ꠘꠣꠝ ꠟꠁꠀ ꠛꠃꠔ ꠜꠘ꠆ꠒ ꠀꠁꠛꠣ, ꠘꠛꠤ ꠢꠣꠎꠤꠀꠅ ꠛꠃꠔ ꠜꠘ꠆ꠒ ꠀꠁꠛꠣ। ꠁꠔꠣꠄ ꠛꠃꠔ ꠛꠠ ꠛꠠ ꠀꠌꠣꠘꠇ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠛꠣ। ꠔꠣꠞꠣ ꠌꠣꠁꠛꠣ, ꠡꠥꠎꠥꠉ ꠙꠣꠁꠟꠦ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣꠞꠦ ꠗꠥꠇꠣ ꠖꠤꠀ ꠛꠦ-ꠙꠕꠦ ꠘꠤꠔꠣꠉꠤ। 25ꠖꠦꠈꠤꠅ, ꠀꠝꠤ ꠁꠔꠣ ꠢꠇ꠆ꠇꠟꠔꠣ ꠔꠥꠝꠞꠣꠞꠦ ꠀꠉꠦꠃ ꠎꠣꠘꠣꠁ ꠖꠤꠟꠣꠝ।

26“ꠢꠥꠘꠅ, ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ, ‘ꠀꠟ-ꠝꠍꠤ ꠛꠥꠟꠦ ꠝꠞꠥꠜꠥꠝꠤꠔ ꠀꠍꠂꠘ,’ ꠔꠦ ꠔꠥꠝꠞꠣ ꠎꠣꠁꠅ ꠘꠣ। ꠎꠥꠖꠤ ꠇꠄ, ‘ꠔꠣꠁꠘ ꠊꠞꠞ ꠜꠤꠔꠞꠦ ꠀꠍꠂꠘ,’ ꠔꠦ ꠄꠇꠤꠘ ꠇꠞꠤꠅ ꠘꠣ। 27ꠝꠦꠊꠞ ꠎꠤꠟꠇꠤꠞ ꠟꠉꠦ ꠙꠥꠛꠦ-ꠙꠁꠌꠝꠦ ꠢꠇꠟꠛꠣꠄ ꠎꠦꠟꠣ ꠚꠞ ꠅꠁꠎꠣꠄ, ꠀꠝꠤ ꠛꠤꠘ-ꠀꠖꠝ ꠀꠁꠟꠦꠅ ꠅꠟꠣ ꠅꠁꠛ। 28ꠢꠥꠘꠅ, ꠟꠣꠡ ꠎꠦꠘꠅ ꠕꠣꠇꠦ, ꠢꠇꠥꠘ ꠄꠝꠘꠦꠃ ꠢꠘꠅ ꠖꠟꠣ ꠅꠄ।

29“ꠅꠃ ꠝꠍꠤꠛꠔꠞ ꠡꠝꠄ ꠡꠦꠡ ꠅꠀꠞ ꠛꠣꠖꠦꠃ, ‘ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠎꠤꠛ, ꠌꠣꠘ꠆ꠖꠦ ꠀꠞ ꠚꠞ ꠖꠤꠔ ꠘꠣꠄ। ꠔꠦꠞꠣ ꠅꠇꠟ ꠀꠍꠝꠣꠘ ꠕꠣꠇꠤ ꠙꠠꠤꠎꠤꠛ, ꠀꠍꠝꠣꠘꠞ ꠇꠥꠘꠥ ꠡꠇ꠆ꠔꠤꠀꠟꠣ ꠌꠤꠎꠃ ꠑꠤꠇ-ꠑꠣꠇ ꠞꠁꠔ ꠘꠣꠄ।’ 30ꠅꠃ ꠡꠝꠄ ꠀꠍꠝꠣꠘꠞ ꠝꠣꠎꠦ ꠀꠝꠤ ꠛꠤꠘ-ꠀꠖꠝꠞ ꠘꠤꠡꠣꠘꠣ ꠖꠦꠈꠣ ꠎꠣꠁꠛ। ꠖꠥꠘꠤꠀꠞ ꠢꠇꠟ ꠝꠣꠘꠡꠦ ꠀꠢꠣꠎꠣꠞꠤ ꠇꠞꠛꠣ। ꠔꠣꠞꠣ ꠖꠦꠈꠛꠣ, ꠀꠟ꠆ꠟꠣꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠘꠥꠞꠞ ꠝꠢꠤꠝꠣꠄ, ‘ꠝꠦꠊꠞ ꠈꠥꠐꠤꠔ ꠅꠁꠀ ꠛꠤꠘ-ꠀꠖꠝ ꠖꠥꠘꠤꠀꠔ ꠀꠁꠞꠣ।’ 31ꠅꠃ ꠡꠝꠄ ꠎꠥꠞꠦ ꠎꠥꠞꠦ ꠡꠤꠋꠉꠣꠞ ꠀꠅꠀꠎ ꠅꠁꠛ, ꠄꠞ ꠟꠉꠦ ꠟꠉꠦꠃ ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠔ ꠔꠣꠁꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠙꠣꠑꠣꠁꠛꠣ, ꠄꠞꠣ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠌꠣꠁꠞꠅꠛꠣꠄ ꠕꠘꠦ ꠖꠟꠣ ꠇꠞꠛꠣ।

32“ꠅꠃ ꠒꠥꠝꠥꠞ ꠉꠣꠍꠞ ꠛꠣꠄ ꠌꠣꠁꠀ ꠔꠣꠟꠤꠝ ꠟꠅ। ꠉꠣꠍꠞ ꠒꠣꠟ-ꠙꠣꠟꠣ ꠘꠞꠝ ꠅꠁꠀ ꠎꠦꠛꠟꠣ ꠘꠄꠀ ꠇꠥꠠꠤ ꠛꠣꠞꠅꠄ, ꠅꠃ ꠡꠝꠄ ꠔꠥꠝꠞꠣ ꠛꠥꠎꠤꠟꠣꠅ ꠉꠞꠝꠞ ꠖꠤꠘ ꠀꠁꠌ꠆ꠍꠦ। 33ꠔꠦ ꠅꠃ ꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ ꠁꠔꠣ ꠢꠇꠟꠔꠣ ꠊꠐꠦꠞ, ꠖꠦꠈꠤꠀ ꠛꠥꠎꠤꠟꠤꠅ, ꠛꠤꠘ-ꠀꠖꠝꠅ ꠗꠣꠞꠅ ꠀꠁꠌ꠆ꠍꠂꠘ। ꠈꠣꠟꠤ ꠗꠣꠞꠅ ꠘꠣꠄ, ꠔꠣꠁꠘ ꠀꠁꠀ ꠖꠥꠀꠞꠅ ꠑꠥꠇꠣꠁꠞꠣ। 34ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠁꠔꠣ ꠘꠣ ꠊꠐꠣ ꠙꠞ꠆ꠎꠘ꠆ꠔ ꠁ ꠎꠝꠣꠘꠣꠞ ꠝꠣꠘꠥꠡ ꠚꠥꠠꠣꠁꠔꠣ ꠘꠣꠄ। 35ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠛꠤꠘꠣꠡ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠢꠣꠝꠦꠡꠣ ꠎꠣꠞꠤ ꠞꠁꠛ।

36“ꠢꠃ ꠖꠤꠘ ꠀꠞ ꠢꠤ ꠡꠝꠄꠅꠞ ꠛꠦꠙꠣꠞꠦ ꠈꠣꠟꠤ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠎꠣꠘꠂꠘ ꠘꠣ। ꠀꠍꠝꠣꠘꠤ ꠚꠤꠞꠤꠡ꠆ꠔꠣ ꠛꠣ ꠁꠛꠘꠥꠟ꠆ꠟꠣꠄꠅ ꠎꠣꠘꠂꠘ ꠘꠣ। 37ꠘꠥꠢ ꠘꠛꠤꠞ ꠀꠝꠟꠅ ꠎꠦ ꠢꠣꠟꠔ ꠅꠁꠍꠤꠟ, ꠀꠝꠤ ꠛꠤꠘ-ꠀꠖꠝ ꠖꠥꠍꠞꠣꠛꠣꠞ ꠀꠅꠀꠞ ꠡꠝꠄ ꠑꠤꠇ ꠅꠟꠣꠈꠣꠘꠃ ꠅꠁꠛ। 38ꠛꠁꠘ꠆ꠘꠣ ꠡꠥꠞꠥ ꠅꠀꠞ ꠀꠉꠦ ꠘꠥꠢ ꠘꠛꠤ ꠎꠣꠎꠅ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠦ ꠈꠣꠅꠀ-ꠖꠣꠅꠀ ꠇꠞꠍꠦ, ꠄꠇꠦ-ꠅꠁꠘ꠆ꠘꠞꠦ ꠛꠤꠀ-ꠡꠣꠖꠤ ꠇꠞꠍꠦ। 39ꠘꠥꠢ ꠘꠛꠤꠞ ꠛꠁꠘ꠆ꠘꠣꠞ ꠙꠣꠘꠤꠄ ꠁꠔꠣꠞꠦ ꠜꠣꠡꠣꠁꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠣ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ। ꠀꠝꠤ ꠛꠤꠘ-ꠀꠖꠝ ꠀꠁꠛꠣꠞ ꠡꠝꠄꠅ ꠑꠤꠇ ꠅꠟꠣꠈꠣꠘ ꠅꠁꠛ। 40ꠅꠃ ꠡꠝꠄ ꠖꠥꠁꠎꠘ ꠝꠣꠘꠥꠡ ꠄꠇꠟꠉꠦ ꠛꠘ꠆ꠖꠅ ꠕꠣꠇꠟꠦ, ꠄꠇꠎꠘꠞꠦ ꠘꠦꠅꠀ ꠅꠁꠛ ꠀꠞ ꠖꠥꠍꠞꠣ ꠎꠘꠞꠦ ꠛꠣꠖ ꠖꠦꠅꠀ ꠅꠁꠛ। 41ꠖꠥꠁ ꠛꠦꠐꠤꠄ ꠄꠇꠟꠉꠦ ꠛꠣꠞꠣ-ꠜꠣꠘꠣꠔ ꠕꠣꠇꠟꠦꠅ, ꠄꠞꠣꠞ ꠄꠇꠎꠘꠞꠦ ꠘꠦꠅꠀ ꠅꠁꠛ, ꠀꠞꠇ ꠎꠘ ꠛꠣꠖ ꠙꠠꠤꠎꠤꠛ। 42ꠄꠞꠟꠣꠉꠤ ꠇꠁꠞꠣꠝ, ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠟꠤꠇ ꠇꠥꠘꠖꠤꠘ ꠀꠁꠛꠣ, ꠁꠔꠣ ꠔ ꠔꠥꠝꠞꠣ ꠎꠣꠘ ꠘꠣ। 43ꠅꠁꠟꠦ ꠁꠈꠣꠘ ꠝꠘꠅ ꠞꠣꠈꠤꠅ, ꠌꠥꠞ ꠇꠥꠘ ꠡꠝꠄ ꠀꠁꠛ, ꠁꠈꠣꠘ ꠎꠥꠖꠤ ꠉꠤꠞꠡ꠆ꠔꠦ ꠎꠣꠘꠔ, ꠔꠦ ꠔ ꠢꠦ ꠢꠎꠣꠉ ꠞꠁꠟ ꠅꠘꠦ ꠀꠞ ꠌꠥꠞꠞꠦ ꠊꠞꠅ ꠢꠣꠝꠣꠁꠔꠦ ꠖꠤꠟ ꠘꠣ ꠅꠘꠦ। 44ꠄꠞꠟꠣꠉꠤ ꠔꠥꠝꠞꠣꠅ ꠢꠣꠝꠦꠡꠣ ꠔꠤꠀꠞ ꠞꠁꠅ, ꠎꠦ ꠡꠝꠄꠅꠞ ꠇꠕꠣ ꠔꠥꠝꠞꠣ ꠌꠤꠘ꠆ꠔꠣꠅ ꠇꠞꠔꠣꠄ ꠘꠣꠄ, ꠢꠃ ꠡꠝꠄ ꠛꠤꠘ-ꠀꠖꠝ ꠀꠁꠛꠣ।

45“ꠁꠟꠣ ꠢꠇ-ꠢꠣꠟꠣꠟꠤ ꠀꠞ ꠀꠈꠟꠖꠣꠞ ꠌꠣꠇꠞ ꠇꠦ ꠀꠍꠦ, ꠎꠣꠞ ꠀꠔꠅ ꠔꠣꠞ ꠝꠥꠘꠤꠛꠦ ꠖꠣꠄꠁꠔ꠆ꠔ ꠖꠤꠟꠣ ꠢꠦ ꠅꠇ꠆ꠔꠞ ꠇꠣꠟꠅ ꠅꠁꠘ꠆ꠘ ꠌꠣꠇꠞ ꠅꠇꠟꠞꠦ ꠈꠣꠘꠤ ꠛꠣꠐꠤꠀ ꠖꠤꠛ। 46ꠇꠙꠣꠟꠤ ꠔ ꠢꠃ ꠌꠣꠇꠞ, ꠎꠣꠞꠦ ꠔꠣꠞ ꠝꠥꠘꠤꠛꠦ ꠀꠁꠀ ꠢꠇ-ꠢꠣꠟꠣꠟ ꠙꠣꠁꠛꠣ। 47ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠝꠥꠘꠤꠛꠦ ꠅꠃ ꠌꠣꠇꠞꠞ ꠀꠔꠅꠃ ꠔꠣꠘ ꠘꠤꠎꠞ ꠢꠇꠟ ꠗꠘ-ꠍꠣꠝꠣꠘꠣꠞ ꠜꠣꠞ ꠖꠤꠛꠣ। 48ꠅꠁꠟꠦ ꠗꠞꠅ, ꠢꠃ ꠌꠣꠇꠞꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠝꠥꠘꠤꠛ ꠀꠁꠔꠦ ꠔ ꠛꠃꠔ ꠖꠦꠞꠤ ꠀꠍꠦ, 49ꠀꠞ ꠅꠃ ꠚꠣꠇꠦ ꠢꠦ ꠢꠇ꠆ꠇꠟ ꠌꠣꠇꠞ-ꠛꠣꠇꠞꠞꠦ ꠝꠣꠁꠞ-ꠗꠁꠞ ꠇꠞꠟ, ꠀꠞ ꠝꠖꠈꠥꠞꠞ ꠟꠉꠦ ꠈꠣꠘꠣ-ꠖꠣꠘꠣ ꠇꠞꠤꠀ ꠝꠖ ꠈꠣꠁꠟ। 50ꠛꠣꠖꠦ ꠎꠦ ꠖꠤꠘ ꠀꠞ ꠎꠦ ꠅꠇ꠆ꠔꠞ ꠇꠕꠣ ꠢꠦ ꠌꠤꠘ꠆ꠔꠣꠃ ꠇꠞꠔ ꠘꠣꠄ, ꠢꠃ ꠖꠤꠘ ꠀꠞ ꠢꠃ ꠅꠇ꠆ꠔꠅ ꠔꠣꠞ ꠝꠥꠘꠤꠛ ꠀꠁꠀ ꠀꠎꠤꠞ ꠅꠁꠛꠣ। 51ꠔꠣꠁꠘ ꠀꠁꠀ ꠔꠣꠞꠦ ꠇꠣꠐꠤꠀ ꠐꠥꠇꠞꠣꠁꠀ ꠜꠘ꠆ꠒ ꠅꠇꠟꠞ ꠟꠉꠦ ꠝꠤꠡꠣꠁꠛꠣ। ꠢꠤꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ, ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ।”

Currently Selected:

ꠁꠘ꠆ꠎꠤꠟ ১: ꠝꠕꠤ 24: sylN

Highlight

Copy