Sam 132
132
Sam Kratrtqki-esz'-nzpnu-tq-nrade-li (132)
Nzesz'tikr Drtwr Yawe Ncdr Devet
Nabz kx nzngrnelzngr Jerusalem mz nzangiongr.
Devet Suti Drtwrde Nzrwzngr Mangr-nzangiongr Yawe
1Yawe, na-aoti drtwrm nzkxpukr Devet,
Mz nzwztr-krbzle bam.
2Nim Gct kc tqrninr tqangio Jekop.
X Devet esalzbz bam.
3-4Rpibzle kx, “Yawe, trtxpnzngr nzvz-krnge ma nyznge o mz nelvq nyznge,
X trtxpnzngr nzama-krnge x nzmwi-krnge,
5A' nawzti-kaix dq ma kx namnc-ngrn,
Mz nzngini-krm Gct r Jekop.”
Devet Rmctile Bokis Kc Tqyclz-ngrm Nzesz'tikr Drtwrdr Badr Gct
6Mzli kc Devet badr ncblo nedeng tzmnc-ngrdr Efrata,
Nzxlrlr nrpa ngr Bokis kc tqyclz-ngrm Nzesz'tikr Drtwrdr Badr Gct.
X sc tzrmctipelr mz mztea Jerim mz nrlarnrlc lcde.
7X sc tzrpipelr kx, “Naglqpeku Bokis lc mz Tentkxtr nyz Yawe.
Mz nzangio-krgu nide mrkc tqwxbu-ngrde mz tron.”
8X sc tzrpipebzlr mz Gct kx, “Yawe, vzm mz Tentkxtr nyzm,
Murde namnc-zvzq mrkc tqycngr Bokis ngr zmatq ngrm.
9Murde pris nemqng nayapwxtipxbzlr nztubq-esz'ngr-krm mz leplz nedrng,
Kcng na-angrlvzlr nim.”
Nzesz'tikr Drtwr Yawe Ncdr Devet
10Yawe, mzli ka bzkq pxtxpx-ngrn king rgr kc tqmcpxbzme,
A' atutr nzesalz-krbzme mz kxnzawz nem, King Devet.
11Murde esalz-ngrbzme bade da kx trnzkatxu,
Mz nzrpi-krbzme bade kx, “Sa nayrlqbo dq mrlxm kx nanginide king kx na-aclvele lr Israel mz nibrm. #Aposol 2:30
12X nzmu mrlxdrng nayrlq-angidrlr nzesz'tikr drtwrgr badr,
X navz-nqblqlr natqnge kc tqkapxbo badr,
Sa nangini-zvzdr king,
Badr mrlxdrng, tqyc tqyc.”
Mevalu Kc Navzpxm Mz Nqvi Lr Devet
13Yawe, rlxtibzkr nzamrlz-krm king nem.
Murde mcpxq Jerusalem nangi mztea nyzm,
14Mz nzrpi-krm kx, “Krlc mztea kx namnc-alo-ngrne,
Mz nzvz-nqblq-krde me pnz drtwrnge.
15Sa nakabo mz lr mztea nyznge lc da kxmrlzting kxkqlu.
X sa na-aputrx kxtrnzrngiscung murde nelzdr nakrlc x naesatxpx zpwx.
16Sa nabatrpo mz pris nengeng nzyapwxtipx-krbzlr mz leplz nengeng nzarlapx-krnge nidr,
Murde leplz kxnztr lcng namalqlvzlr ninge.
17Sa nayrlqx king kc tqmatq Jerusalem kx navzpxm mz nqvi lr Devet,
X nzaclve-krde trtxpnzngr nzesaki-krde.
18Sa na-amyalzx nide mz nzalao-krbo kraon mz narde,
A' sa nabatrpo nzmyakr drtq enqmi rdeng.”
Currently Selected:
Sam 132: ntu
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
