Ioane Taekan te Boki Aio
Taekan te Boki Aio
E taekinaki n te Euangkerio aei b'a Iesu bon ana Taeka te Atua, are iai ma ngkoangkoa ao ngkai ao n aki totoki. E riki n aomata, ao E maeka i buakoia aomata.
E a koreaki te boki aei, n ai aron taekana ae boni m'akoro iai: b'a a aonga te koraki ake a warekia n onimakina Iesu b'a boni Ngaia te Tia Kamaiu, are E a kaman taekinaki n te taeka n akoi b'a E na roko; ao akana onimakinna e na reke i rouia te maiu.
I mwini kab'arab'araan aron Iesu b'a Ngaia ana Taeka te Atua, ao e waaki nako te tia korea te boki aei n taekin taiani m'akuri aika kamimii ake a kaota taekan Iesu b'a boni Ngaia Natin te Atua ao te Tia Kamaiu are E a kaman taekinaki n te taeka n akoi. A raonaki taekani m'akuri aika kamimii aikai n taiani kakarabakau aika kataia ni kab'arab'arai nanon aeka ni m'akuri aikai; ao i nanon taekinaia, ao a oti naba iai aroia aomata tem'angina n onimakina Iesu, ao tem'angina ngke a rawa n onimakinna. M'akoro 13 nakon 17 a taekina aron Iesu n reitaki ma ana reirei n te tairiki are E kam'aneaki iai, ao ana taeka ni katauraoia ma ni kakorakoraia i m'ain te karawaawataaki are E nangi taonaki iai, are te mate n te kaibangaki.
Ni kabanea ni m'akoro n te boki, ao a taekinaki iai aron Iesu ngke E tauaki ma ni kabowiaki taekana, ao arona ngke E kamateaki n te kaibangaki ao E a manga uti; ao a taekinaki naba iai arona ni kakaoti nakoia ana reirei i mwini manga-utina man te mate.
E a katuruturuaki n te boki aei taekan te maiu are aki toki iroun Iesu, b'a bon te b'ai n tituaraoi are e kona naba ngkai n reke iroun te aomata ane onimakina Iesu b'a te kawai, te koaua, ao te maiu. Ao te b'ai ae noraki iroun te tia korea te boki aei, b'a e kabonganai baika a tataneiai iai aomata b'a kairan te iango nakoni koaua aika kakawaki, aika koaua n tamnei.
Aron Teini Kanoana
Moan Taeka 1.1-18
Ioane are te Tia B'abetito ao aomata ake ana moa n reirei Iesu 1.19-51
Ana M'akuri Iesu 2.1—12.50
Kabaneani Boong i Ierutarem ao n taabo ake i rarikina 13.1—19.42
Manga-utin te Uea man te Mate ao Kaotina 20.1-31
Mwin Taeka: Kaotin riki te Uea i Kariraia 21.1-25
Currently Selected:
Ioane Taekan te Boki Aio: KNVB
Highlight
Share
Copy
Want to have your highlights saved across all your devices? Sign up or sign in