ꞌRuuth 1
1
Uluugi Elimẽlẽhĩ eet cĩg õlõ cĩnnĩ ꞌJuuda ũũhĩ Mõaba
1Korrioohĩĩ baag aggamĩ ꞌgaadĩꞌnya#1:1 ꞌGaadĩꞌnya: Aitiõõ eeta cieeg hõllõngaa aattĩg hĩ ꞌgaadĩꞌnya cĩg ꞌyioko ho, baa ĩĩn nẽẽg tõrõmĩ ꞌcĩg eteiini Ĩꞌthĩraẽl jõrẽẽnĩ. looc cĩ Ĩꞌthĩraẽlĩ, baa adhukiaak nyarõnĩ looc. Nĩngĩtĩ ĩꞌngaannĩ eet umwaa ꞌtaaũnaa cĩ Bẽtẽlẽmĩ looccaa cĩ ꞌJuuda, ũũnnĩkĩ looc cĩnnĩ nẽ ũũk ĩĩcĩ looc ꞌcĩ haĩ Mõab, baa õõkõr nẽẽ hĩ ngaa cĩnnĩ hĩ buul cĩgĩnnĩg ꞌramma. 2Baa haĩ ꞌthaar cĩg eet tĩho Elimelek nẽ hĩĩtõ ngaa cĩnnĩ Naoomi. Haĩ ꞌthaarriok cĩg buul cĩggĩĩng ko, Mahalon hĩ Kilion. Baa ĩĩn nẽẽg eet cĩg hattũũg cĩ Ẽvarathĩ ꞌcĩg au Bẽtẽlẽma looccaa cĩ ꞌJuuda. Ma baa õdõlan nẽẽg Mõab ko, õõt õlõmanit nĩngaata. 3Nĩngĩtĩ aku adaaknĩ Elimẽlẽhĩ nẽ ũtũngẽẽhĩ Naoomi buul ꞌcĩg ĩĩn ꞌramma ho.
4Ma nĩngaata, iita ũꞌthũwatta nyahaappanĩta ꞌcĩg ĩĩn ꞌramma ho buheeci cĩg eet cĩg Mõabĩ. Baa aꞌthũwan umwaa bũhẽẽc ꞌcĩ haĩ Õrpa nẽ ũꞌthũwan umwaa ꞌcĩ haĩ ꞌRuuth. Ma baa aauto nẽẽg nĩngaata ĩꞌthõng hõbõktĩ irkiꞌnyia hĩĩtõ õmmõtõ, 5iita adaahito Mahalonĩ hĩ Kilion buúk. Nĩngĩtĩ ũũnnõthõõthĩkĩ Naoomi hatamaat ẽmmẽn hiꞌthihi loholeec hode baattĩ olu.
Oboddiõõthĩ Naoomi hĩ ꞌRuuth õõt ꞌJuuda
6Nĩngĩtĩ athĩknĩ Naoomi aĩ, ikia ẽẽl Makayyioohiti#1:6 Makayyioohit: Aĩ ꞌthaara cieeg Ebereeiyyi, Yiaawe. Aĩ Yiaawe Ebereeiyyi, Eet ꞌcĩ aalla arũgĩ ũdũt. Baa ꞌthaar ꞌcĩg tiirik cieeg gẽrrẽẽt ꞌcĩg avvĩyyĩ eeta cĩg Ĩꞌthĩraẽlĩ Nyekuc. Havvĩ naag ꞌthaar ꞌcĩg haĩ Makayyioohit ko Dĩdĩngaayyi hĩĩ nĩngĩtĩ ꞌthaar ꞌcĩg haĩ Yiaawe ho. eet cĩgĩnnĩg looccaa cĩ ꞌJuuda, ngaatĩ aaꞌnyĩkĩ hibbiirito manẽẽna tarĩ. Ma nĩngaata, iita ũkũmattoothĩk Naoomi hĩ alawanĩt cĩgĩnnĩg ko ꞌrammaattiyyiaak, nĩngĩtĩ ũũnnĩkĩ Mõab nẽ oboddiõõthĩ õõt ĩĩcĩ looc cĩnnĩ. 7Ma baa ũtũngteek nẽẽg nĩngĩtĩ aattiyyi ho, ĩtĩngaacõ hĩ alawanĩt cĩgĩnnĩg ookorit õõt ĩĩcĩ looc cĩ ꞌJuuda.
8Ma ꞌgõõla, ũũk ĩĩnnĩk Naoomi alawanĩt cĩgĩnnĩg, “Oboddiooth ĩĩcĩ olooyyiok cĩg morwak cugguung. Aꞌnyĩĩk Makayyioohit hĩĩ tarbal hĩ ngagiit haau hĩ baa iiginnu niig tarbalĩg hĩ maaccwa cugguung baag adaahito, hĩ nganĩĩt buúk. 9Aꞌnyĩĩk Makayyioohit heeluung ngagiit hõdẽĩ hõdẽĩ, ummuddia maaccwa ũgĩ cĩrrĩĩng, hátĩ aaut lõꞌngõõc olooyyiohĩĩ cugguung.”
Ma baa ĩꞌthaaĩk Naoomi ĩhõõggõ ꞌgõõl ko, arruui hinnia Õrpa hĩ ꞌRuuth gẽrrẽẽt ũdũt. 10Ma ho, õthõõth hinnia alawanĩta aĩ, “Aitiõõ! Hookorit ꞌthẽk ĩꞌthõng eet cugunnig.”
11Ẽdẽcĩ hinnia Naoomi ĩhõõggõ anneek, “Lõhõlẽẽtĩg, oboddiooth ĩĩcĩ olooyyiok cugguung! Nga ꞌyioko ꞌthẽk anũaannangu niig nganĩĩt ne? Occa ꞌthẽk nga harrita naa lõhõlĩ ꞌcĩg maacĩg ũgĩ ꞌcĩg occa alĩꞌtha hiita holomttuung ngagiita? 12Lõhõlẽẽtĩg, oboddiooth ĩĩcĩ olooyyiok cugguung! Iittiõõ hatĩ eet ꞌcĩ nga õlõmma nganĩĩt ꞌcĩ hĩĩna morwahit haaga ho tõõ. Tananga hõlõma eet umwaa nganĩĩt hatĩbaal nẽ hittirriawa lõhõlĩ ꞌcĩg maacĩg, 13ĩcca occa ereeinnu ĩꞌthõng hitiliꞌthia nẽẽg, hátĩ hiita holomtuunga? Aitiõõ tõõ, lõhõlẽẽtĩg! Ahuci thooꞌthioha cĩgannĩg ĩllõõan cugguung, hĩnĩngĩtĩ ĩdĩmanaa nganĩĩt Makayyioohiti ꞌbuth.”
14Ma ngaati, urruuyyio tarĩ gẽrrẽẽt ũdũt. Nĩngĩtĩ ĩꞌthaaĩkĩ Õrpa inyinnini ꞌgõõla, nẽẽthĩ hinnia, baa odoknoothĩk ꞌRuuthi Naoomi.
15Ma nĩngaata, ikia ĩĩnnĩk Naoomi ꞌRuuth, “Cĩĩn nõõ, õbõdõõthĩ nyigaarnu hĩ eet cĩgĩnnĩg hĩ nyekuꞌnya cĩgĩnnĩg! Aitiõõ nii hõllõngaa ookorru hĩ ĩnõõnnõ inni?”
16Ẽdẽcĩ hinnia ꞌRuuthi aĩ, “Ma hattĩnganeekaa nganĩĩt hutungeehii nganiit nẽ hobodootha ĩĩcĩ õlõ cĩnaang! Hõkõ naa ĩĩcĩ õkõõĩ niina, haaĩ hatĩ naa ngaatĩ aayyi niina, ĩĩn hatĩ eeta cugunnig eet cĩgannĩg, ĩĩn hatĩ Nyekuci cunni Nyekuc caannĩ. 17Hadaahi hatĩ naa looccaa ꞌcĩ adaaknĩ niina nẽ hadaĩ nĩngaata. Aꞌnyĩĩk Makayyioohit huuka nganĩĩt gẽrrẽẽt hatĩ huunnikii nganiita, aꞌnyĩĩk daahĩth dioo heꞌngereet ngagĩĩta!”
18Ma baa acĩn Naoomi ꞌRuuth ngaatĩ arĩnyanẽẽkĩ hookorit hĩ ĩnõõnnõ ho, iittiõõ hõllõngaa aduhaak hõbõdõõthĩ.
19Ma baa õdõlanit nẽẽg Bẽtẽlẽm, akuleek hinnia eeta cĩg ꞌtaaũnaak vẽlẽk ꞌjieen ngaatĩ acĩnĩ ĩhõõggõ. Nĩngĩtĩ ajinõõnĩ ngaaĩ ꞌcĩg ꞌtaaũnaak nyaagwaana aĩnnĩ, “Ĩĩn occa ꞌthẽk ciee Naoomi dĩdĩ?”
20Nĩngĩtĩ aduhaakĩ Naoomi#1:20 Naoomi: Aĩ ꞌthaara ꞌcĩg haĩ Naoomi ho Ebereeiyyi, taliinit. ĩhõõggõ annẽẽkĩ, “Ma nga haũyyaangu hanneekaangu Naoomi tarĩ! Utuvvuyyiaangu ĩĩttĩhaangu Maara,#1:20 Maara: Aĩ ꞌthaara ꞌcĩg haĩ Maara ho Ebereeiyyi, hahati. hĩnĩngĩtĩ aaꞌnyĩk Nyekuci ꞌTirriannioohiti ꞌcĩ ĩllõõan vẽlẽk rũgẽt caannĩ hõkõm. 21Baa haꞌnyahi ꞌgii vẽlẽk baa hĩꞌngaathi ngaati, nẽ ꞌyioko õbõdaayya Makayyioohiti õlõ athĩnĩ ꞌtẽl. Nẽ aalla nga aũyyaangu anneekaangu Naoomi noho inni? Aaꞌnya Makayyioohiti nganĩĩt ꞌcannan nẽ ĩnõõnnõ Nyekuc ꞌTirriannioohit ꞌcĩ ĩllõõan vẽlẽk, ꞌcĩ ĩꞌthõõakaa thooꞌthiok ꞌcĩg abathĩ dtẽc ko.”
22Nẽẽthĩ hoti ho, baa õbõda Naoomi looccaa cĩ Mõabĩ ittioona alaannĩnĩ ꞌRuuthi, tĩnaatĩ eet cĩ looc cĩ Mõabĩ. Baa õdõlan nẽẽg Bẽtẽlẽm baa nga iꞌthianaanĩ eeta janiinit cĩ haal ꞌcĩg haĩ ꞌbarli#1:22 ꞌBarli: Ĩĩn cieeg haal ꞌcĩg aattĩg hĩ ꞌgẽẽmẽna. thõng.
Currently Selected:
ꞌRuuth 1: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.