Luugithõõ 24

Elemit eeta cĩg Ĩꞌthĩraẽlĩ lõhõt cĩ Makayyiookto

1Nĩngĩtĩ aduhaakĩ Makayyioohiti Mũũꞌtha annẽẽkĩ, “Ijjia mũdeehaa nganĩĩt muura hujjieen ngaati. Ookorria hĩ Arõõnẽ hĩ Nadab hĩ Abiihu hĩ makayyiook cĩg Ĩꞌthĩraẽlĩ hẽẽn tũrkĩramma buúk. Adiim alainnu niig vẽlẽk aattiyyiaannu ꞌrẽẽna. 2Nẽẽthĩ, Mũũꞌtha dioo ꞌcĩ occa aku hikia hõbõktõ hĩ Makayyioohit. Adiim occa hõllõngaa au nyakangaaꞌnya buúk, hiita hõbõktõ hĩ Makayyioohit nẽ aitiõõ eeta ũgẽẽgĩ ꞌcĩg occa alahanoothĩk hiita hotoddia hĩ Mũũꞌtha hummuddioothĩk Makayyioohit muura lokora tõõ.”

3Ma baa allũũcĩ Mũũꞌtha õkõ aduhaak eet vẽlẽk thõõth ꞌcĩ aduhaak Makayyioohiti ĩnõõnnõ hĩ nyattalliook ko, baa ẽdẽcĩ eeta vẽlẽk molooha hõdẽẽthõng aĩ, “Hadĩmanna hatĩ hẽlẽggĩ vẽlẽk ꞌcĩg aduha Makayyioohiti.” 4Ma ngaati ẽtẽhẽẽd Mũũꞌtha thooꞌthiok vẽlẽk baag aduha Makayyioohiti loota.

Ma baa loohoth ꞌcĩ ꞌrĩĩng, ĩtĩnga nẽẽ ẽtẽhẽny nĩngĩtĩ ĩbboorini ꞌgaarrieeniti muura uruta nẽ adaeek biyyiẽẽn õmmõtõ hĩ ꞌramma ꞌcĩg ĩthakꞌthoothĩk habucieeꞌnya õmmõtõ hĩ ꞌramma cĩg Ĩꞌthĩraẽlĩ. 5Ma nĩngaata, ĩꞌthõ nẽẽ nyahaappanĩt ũgĩ cĩg Ĩꞌthĩraẽlĩ hõõt haanytĩk Makayyioohit ꞌgaarriẽẽn ꞌcĩg ĩwaaddi nẽ ibboorrik olĩꞌnya hĩĩtõ ꞌgaarriẽẽn ꞌcĩg agaõõnĩ eeta hĩ Nyekuc.#24:5 ꞌGaarriẽẽn ꞌcĩg agaõõnĩ eeta hĩ Nyekuc: Baa adak eeta cĩg Ĩꞌthĩraẽlĩ ꞌgaarriẽẽn iccig kõr ꞌcĩ adahĩ nẽẽg lõhõt hĩ Nyekuc. 6Nĩngĩtĩ akannaanĩ Mũũꞌtha biyyi ũgĩ hẽddẽẽmẽẽtĩ nẽ ittiha biyyi ꞌcĩg abadtẽc urwacanĩ nĩngĩtĩ ĩbboorini ꞌgaarrieeniti ho. 7Ma ho, ittiha ꞌBuuk cĩ Lohoto nẽ itigiilik eet molooha cobbi. Ẽdẽcĩ eeta tarĩ anneek, “Hathĩkna hatĩ Makayyioohit nẽ hĩdĩmatta thõõth vẽlẽk ꞌcĩ aduha nẽẽnĩ.”

8Ma ho, ittiha Mũũꞌtha biyyi hẽddẽẽma nẽ urwacanĩ eeta. Ma tarĩ ho, ĩĩnnĩk ĩhõõggõ, “Biyyi cĩg lõhõtaak cieegi,#24:8 Biyyi cĩg lõhõtaak: Baa aaꞌnyĩk Nyekuci eet cĩg Ĩꞌthĩraẽlĩ hibboorito ꞌgaarriẽẽn cĩg olĩꞌnyaannu hĩ cĩg ẽẽthak, hátĩ hũtũũnyĩtõ ĩhõõggõ ꞌthẽccanẽẽtĩĩ cĩggĩĩng. Ẽtẽrꞌtha ꞌgaarriẽẽna cieeg daahĩth ꞌcĩ hatĩ õkõ adaaknĩ Yeesu Krĩstõ hurucceea hĩ Mĩꞌnyõõn cĩ Nyekuci. Ũũny hatĩ Yeesu ꞌgaarrieettaa cĩnnĩ ĩcĩ ĩĩn hõdẽẽthõng, ꞌthẽccanẽẽt cĩg eet vẽlẽk ꞌcĩg ẽlẽmĩ ĩnõõnnõ. Tigiil Levitiko 16:11-19; Maatteeo 14:24; Maatteeo 26:28; Ebereei 9:15-22. baag aarĩk Makayyioohiti hĩ ngagiit, hĩnĩngĩtĩ thooꞌthiok iccig vẽlẽk.”

9Nĩngĩtĩ ĩꞌngaannĩ Mũũꞌtha hĩ Arõõnẽ hĩ Nadab hĩ Abiihu hĩ makayyiook hẽẽn tũkĩramma cĩg Ĩꞌthĩraẽlĩ, õtõdĩ muura hujjieen. 10Ma nĩngaata, udtuukta nẽẽg Nyekuc cĩ Ĩꞌthĩraẽlĩ. Nẽ ꞌthõõnĩĩ cĩgĩnnĩg loota, baa aaĩ ꞌgiimwaa ꞌcĩ aaĩ hĩ bẽẽ ꞌcĩ cũlahẽẽnĩ nẽ ĩĩ tẽlla haau hĩ hẽẽtkujjieen. 11Tananga baa ĩcĩnĩt nyakangaaꞌnya cĩg Ĩꞌthĩraẽlĩ Nyekuc, baa hõllõngaa aruk Nyekuci ĩhõõggõ buúk. Nĩngĩtĩ aduhẽẽnĩ nẽẽg nẽ uhuddi muumaa cĩ Makayyiookto.

12Ma nĩngaata, ĩĩnnĩk Makayyioohiti Mũũꞌtha, “Tõda muura hujjieen nẽ nõõ ikia aau ngaati hĩdĩhĩdĩĩc. Haaꞌnyii hatĩ naa nganiit biyyiẽẽn ꞌramma ꞌcĩg ꞌthabalĩg, ꞌcĩg baag heteheedĩha naa nyattalliook ꞌcĩg hatĩ allimaneehi eeta.”

13Nĩngĩtĩ ĩꞌngaannĩ Mũũꞌtha hĩ dticciannioohit cĩnnĩ ꞌJooꞌthua nẽ ũũk õtõd Mũũꞌtha muur cĩ Nyekuci. 14Baa aduhaak Mũũꞌtha makayyiook anneek, “Ereeyyieetu ngagĩĩt ngaati ĩꞌthõng hoboddiaawa naaga. Arõõnẽ hĩ Hur cieeg arũmeennu hĩ ngagiit ngaati ho. Má ẽppẽhanõõ eeta ũgẽẽgĩ nga haattiyyiaanna naaga, aanytĩk hootti thõõth hĩ ĩhõõggõ.”

15Ma baa õtõd Mũũꞌtha muur, ikia ũmmũlũũnyan loduruui muur, 16nĩngĩtĩ aku aayyi bulẽẽnĩtĩ cĩ Makayyiookto Muuraa cĩ ꞌThĩnaĩ lokora nẽ ũmmũlũũnyan loduruui muur waathinniook tõrkõnõn. Ma baa kõr ꞌcĩ ĩĩn tũrkĩramma, ũtũvvũ Makayyioohiti Mũũꞌtha loduruuwatõõ. 17Nẽ hĩ eet cĩg Ĩꞌthĩraẽlĩ, baa edeeꞌnyia bulẽẽnĩtĩ cĩ Makayyiookto muura lokora aaĩ hĩ ꞌgwaa ꞌcĩ atũũthĩ thõng. 18Nĩngĩtĩ adukni Mũũꞌtha loduruuwatõõ hĩcĩ õtõd nẽẽ muura lokora. Nẽ aau muura nĩngaata, waathinniook hẽẽn ꞌwec hĩ baalinniook hẽẽn ꞌwec buúk.

Currently Selected:

Luugithõõ 24: did

Highlight

Copy

Compare