ꞌRooma 4

Lemiinit cĩ Abũrahamĩ

1Hõthõõth occa ꞌyioko naag Abũrahaamõ#4:1 Abũrahaamõ: Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. baangeet baa baangaani haĩ ũmmũda nẽẽ neegi thõõthaa cĩ ẽlẽmmĩ Nyekuci ĩnõõnnõ ho? 2Má baa ẽlẽmĩ Nyekuci Abũrahaamõ, hĩnĩngĩtĩ ꞌgii ꞌcĩ baa adĩman nẽẽnĩ, occa thĩ mĩĩ baa aꞌnyak nẽẽ ꞌgiimwa ꞌcĩ irrianĩ. Nẽẽthĩ, occa hõllõngaa ꞌgõõl cĩ Nyekuci niccia. 3Aduha ꞌBuuhi cĩ Nyekuci aĩ nẽẽ, “Baa ẽlẽmĩ Abũrahamĩ thõõth cĩ Nyekuci, hĩnĩngĩtĩ thõõth icci, ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.”#Tigiil ꞌBuuk cĩ ꞌThianaattõ 15:6

4Ma adticanni ẽẽtĩ, hõllõngaa aaꞌnyĩhoothĩk ꞌrabbẽẽta cĩgĩnnĩg hĩ ꞌbaaniniti, aaꞌnyĩhoothĩk hĩ dũmanĩ cĩ dtiic cĩnnĩ ho. 5Nẽẽthĩ, ẽẽtĩ ꞌcĩ hõllõngaa adticanni nẽ aꞌnyak lemiinit hĩ Nyekuc ꞌcĩ ẽlẽmĩ eet ꞌcĩg ĩĩn ꞌthẽccanniook, ẽlẽmĩ hatĩ Nyekuci ĩnõõnnõ hĩĩ eet ꞌcĩ abũnnaa, hĩnĩngĩtĩ aꞌnyak nẽẽ lemiinit hĩ Nyekuc. 6Aduha habuui Daavide buúk thõõth icci diooni, ngaatĩ õthõõthĩ taliinit cĩ eet ꞌcĩ acĩn Nyekuci abũnnaa, tananga nga hidtican dtiic umwa.

7“ꞌGattan hĩ eet

ꞌcĩg atamaatĩk Nyekuci ꞌthẽccanẽẽt cĩggĩĩng

nẽ umummuunyattĩ ꞌthẽccanẽẽta cĩggĩĩng.

8ꞌGattan hĩ eet

ꞌcĩ iittiõõ Makayyioohiti hõllõngaa agiil ꞌthẽccanẽẽt cĩgĩnnĩg.”#Tigiil ꞌBuuk cĩ Tegellwaanu 32:1-2

9Ĩĩn ꞌgattanĩ ciee cĩ eet ꞌcĩg etteeddi eleeti dioo hode ꞌcĩg eet ꞌcĩg hõllõngaa etteeddi eleeti buúk? Baa gõõng hõthõõth naag haĩ, lemiiniti cĩ Abũrahamĩ aaꞌnyĩhoothĩk ĩnõõnnõ hĩ ẽẽtĩ ꞌcĩ abũnnaa. 10Nẽẽthĩ, edeeꞌnyia baa thõõth ꞌcĩ ẽlẽmmĩ Nyekuci Abũrahaamõ baa nĩngaan? Edeeꞌnyia baa ĩĩcĩ oou hode urutaa baa ẽttẽẽdõĩ Abũrahaamõ ẽlẽ cĩnnĩ ẽlẽk? Eei, baa edeeꞌnyia ĩĩcĩ oou. 11Baa aaꞌnyĩk Abũrahamĩ ẽlẽ cĩnnĩ hẽttẽẽdĩ, hĩnĩngĩtĩ hẽtẽrẽtha aĩ, baa ẽlẽmĩ Nyekuci ĩnõõnnõ, hĩnĩngĩtĩ lemiinit cĩnnĩ, tananga baa nga hẽttẽẽdĩ ẽlẽ cĩnnẽẽnĩ. Thõõth ꞌcĩ aaꞌnyĩk Abũrahaamõ hĩĩ maaꞌnyĩ eet vẽlẽk ꞌcĩg ẽlẽmĩ Nyekuc ko cieeni, tananga nga hetteeddi eleeti cĩggĩĩng. 12Nẽ tarĩ ĩĩ Abũrahaamõ buúk maaꞌnyĩ eet ꞌcĩg etteeddi eleeti nẽ hõllõngaa ĩĩn maaꞌnyĩ eet ꞌcĩg etteeddi eleeti diooni, nẽẽthĩ, ĩĩn maaꞌnyĩ eet ꞌcĩg anũ ꞌgõõl cĩ lemiinit baa aꞌnyak baangẽẽtĩ cĩnaac Abũrahamĩ baa nga hẽttẽẽdĩ ẽlẽ.

Ĩĩn thõõth cĩ Nyekuci, cĩ eet ꞌcĩg aꞌnyak lemiinit

13Baa hõllõngaa ammũda Abũrahamĩ hĩ lõhõlĩ cĩg lõhõlĩ cĩgĩnnĩg, thõõth ꞌcĩ aduha Nyekuci, aĩ ĩĩn hatĩ nẽẽg ꞌrigiꞌthiook cĩg lootu, hĩnĩngĩtĩ nyattal. Nẽẽthĩ, baa ammũda, hĩnĩngĩtĩ bũnnai ꞌcĩ aku, hĩnĩngĩtĩ lemiinit. 14Má baa haaꞌnyĩk Nyekuci Abũrahaamõ hĩ lõhõlĩ cĩgĩnnĩg thõõth ꞌcĩ arigithi nẽẽg looc icci, hĩnĩngĩtĩ aꞌthũũnnĩ nẽẽg nyattal, occa hinnia baa ĩĩn lemiiniti cĩnĩĩng ko ꞌgiimwa haaga nẽ occa ĩĩn thõõth ꞌcĩ aduha Nyekuci ho buúk ꞌgiimwa haaga. 15Hĩnĩngĩtĩ alĩĩlĩ Nyekuci hatĩ ẽꞌthẽcanni nyattalĩ cĩnnẽẽnĩ. Nẽ ngaatĩ aitiõõ nyattalĩ tõõ, aitiõõ ꞌgii ꞌcĩ occa ẽꞌthẽcan eeta tõõ.

16Nẽẽthĩ hoti ho, aku thõõth ꞌcĩ aduha Nyekuci, hĩnĩngĩtĩ lemiinit nẽ thõõth ꞌcĩ aduha nẽẽ ho, agayyi, hĩnĩngĩtĩ tarbalꞌthẽẽt cĩnnĩ cobbi. Hõllõngaa ĩĩn thõõth ꞌcĩ aduha Nyekuci ho, cĩ lõhõlĩ cĩg Abũrahamĩ dioo ꞌcĩg aꞌnyak nyattal. Ĩĩn cĩ lõhõlĩ cĩg lõhõlĩ cĩg Abũrahamĩ vẽlẽk, hĩnĩngĩtĩ aꞌnyak nẽẽg lemiinit hĩ baa nẽẽnĩ. Ĩĩn Abũrahamĩ baangeet cĩnaac vẽlẽk. 17Hĩcĩ eheeddi ꞌBuuhaa cĩ Nyekuci aĩ nẽẽ, “Haaꞌnyii naa nganiit ĩĩnu maaꞌnyĩ loonyin ꞌcĩg mẽẽlĩg.”#Tigiil ꞌBuuk cĩ ꞌThianaattõ 17:5 Ĩĩn nẽẽ baangeet cĩnaac muumaa cĩ Nyekuci, baa ẽlẽmĩ nẽẽ aĩ, aaꞌnyĩk rũgẽt daakiak nẽ ẽtẽhẽnya hẽlẽggĩ ꞌcĩg ĩĩn ngeju.

18Tananga baa aitiõõ hõllõngaa aꞌnyak Abũrahaamõ muhẽẽnĩt ꞌcĩ abũnnaa, baa aalla ẽlẽmĩ nẽẽ aĩ, aku hatĩ ĩĩn nẽẽ maaꞌnyĩ loonyin ꞌcĩg mẽẽlĩg. Hĩnĩngĩtĩ baa uduhaak Nyekuci ĩnõõnnõ ĩĩnnĩk, “Lõhõlĩ hatĩ cugunnig ko nicciag.”#Tigiil ꞌBuuk cĩ ꞌThianaattõ 15:5 19Baa aalla õkõmĩ lemiiniti cĩ Abũrahamĩ, tananga baa ĩĩtõ irkiꞌnyia cĩgĩnnĩg ꞌmiia hõdẽĩ (100). Baa aga nẽẽ ngaatĩ õbõhõõĩ ĩnõõnnõ daahĩthĩ nẽ iittiõõ ngaa cĩnnĩ Thaara hõllõngaa occa aꞌnyak lõhõlĩ. 20Nẽẽthĩ, baa aitiõõ Abũrahamĩ hõllõngaa ĩccaad hode ajin thõõth baa aduha Nyekuci. Baa aaꞌnyĩk lemiiniti cĩnnĩ ĩnõõnnõ hõkõm ꞌthĩnĩt nẽ baa ikia aaꞌnyĩk nẽẽ bulẽẽnĩt vẽlẽk Nyekuc. 21Baa aga Abũrahamĩ ngaatĩ aꞌnyahĩ Nyekuci makaaꞌthĩt dĩdĩ, ꞌcĩ occa adĩmanĩ thõõth baa aduha nẽẽnĩ. 22Ĩnõõ baa adukiaanĩ nẽẽ aĩ, “Ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.” 23Thooꞌthioha ꞌcĩg aĩ, “Ĩĩn nẽẽ eet ꞌcĩ abũnnaa ho,” baa hõllõngaa eheeddi, hĩnĩngĩtĩ ĩnõõnnõ diooni, 24baa eheeddi thõõth ciee hĩĩ cĩnaac, hĩnĩngĩtĩ helemmi hatĩ naag buúk, hĩnĩngĩtĩ lemiinit cĩnaac hĩ Nyekuc, baa arũgtha Makayyioohit cĩnaac Yeesu daahĩtha. 25Baa aaꞌnyĩk Nyekuci Yeesu hadaak, hĩnĩngĩtĩ ꞌthẽccanẽẽt cĩggaac nẽ ũrũgũtha ĩnõõnnõ daahĩtha, hátĩ helemeet Nyekuci ngagĩĩta.

Currently Selected:

ꞌRooma 4: did

Highlight

Copy

Compare