ꞌRooma 14

Ma hongomĩttu ꞌgoonogu

1Elemit eet ꞌcĩ aꞌnyak lemiinit ꞌcĩ hõllõngaa attiranĩ nẽ ma hetteediku ĩnõõnnõ thooꞌthiok ꞌcĩg ẽppẽhanoonnu. 2Aaꞌnyĩk lemiiniti cĩ eet umwa ĩnõõnnõ hadak hẽlẽggĩ vẽlẽk, nẽẽthĩ, eet umwaa ꞌcĩ hõllõngaa attiran lemiiniti cĩnnẽẽnĩ, aduk ꞌdiaatĩn ꞌcĩg cũlahĩg diooni. 3Ẽẽtĩ ꞌcĩ adak hẽlẽggĩ vẽlẽk, hõllõngaa occa ẽmẽnĩt eet ꞌcĩ hõllõngaa adak ꞌgii vẽlẽk,#14:3 Eet ꞌcĩ hõllõngaa adak ꞌgii vẽlẽk: Baa aꞌngirannii nyattaalaa cĩ Mũũꞌtha ngaatĩ adahĩ eeta cĩg ꞌJudeei idiꞌngwa ũgĩ ꞌcĩg adukiaa ngaatĩ ĩĩnnĩ idiꞌngwaana tĩko ꞌriiring hode aꞌngirannii hĩ ĩhõõggõ ngaatĩ adahĩ. Tigiil ꞌBuuk cĩ Levitiko 11:1-32. nẽ ẽẽtĩ ꞌcĩ hõllõngaa adak ꞌgii vẽlẽk, occa hõllõngaa arannĩ ꞌgõõnĩ ꞌcĩ adak hẽlẽggĩ vẽlẽk, hĩnĩngĩtĩ ẽlẽm Nyekuci ĩnõõnnõ. 4Nganiit nganĩ ꞌcĩ occa etteedihi dticciannioohit cĩ eet umwa thõõth ko? Makayyioohit cĩnnĩ dioo ꞌcĩ aduha, hatĩ adĩman nẽẽ thõõth ꞌcĩ aũlanĩ nẽ Makayyioohit hatĩ dioo ꞌcĩ aaꞌnyĩk ĩnõõnnõ hĩdĩman thõõth ꞌcĩ aũlanĩ.

5Ammuk eet umwaa aĩ, ẽllẽẽmĩth waathĩnĩ umwaa ĩllõõan waathĩn umwa nẽ ummuk umwaa ĩĩ, aduhõõ waathinniooha vẽlẽk thõng. Aanytĩk eet hõdẽĩ hõdẽĩ haꞌnyahit muhẽẽnĩt hĩcĩ adiim nẽẽgĩ. 6Nuyyiooha vẽlẽk ꞌcĩg arrĩcana waathĩn hõdẽẽthõng hĩllõõan waathinniook vẽlẽk, adĩman noho, hátĩ hubuluthit Makayyioohit. Nẽ nuyyiooha vẽlẽk ꞌcĩg adak iding, anneek Nyekuc ĩlaallẽ haauto hĩ eeta ꞌcĩg hõllõngaa adak iding. 7Hĩnĩngĩtĩ hõllõngaa harũgĩ naag, hĩnĩngĩtĩ eleeti cĩggaac hode hadaahĩ, hĩnĩngĩtĩ eleeti cĩggaac diooni. 8Má harũgĩ naaga, harũgĩ hĩnĩngĩtĩ Makayyioohit nẽ má hadaahĩ, hadaahĩ hĩnĩngĩtĩ Makayyioohit. Nẽẽthĩ, tananga harũgĩ hode hadaahĩ, nga hĩĩgĩn cĩg Makayyiooktak noho.

9Hĩnĩngĩtĩ thõõth icci, baa adaahĩ Krĩstõ nẽ ũrũga daahĩtha, hátĩ hĩĩ nẽẽ Makayyioohit cĩ daakiahu hĩ cĩ eet ꞌcĩg arũgĩ. 10Inni otongomit ꞌgoonogu ũgĩ ꞌcĩg ĩĩn lemmiook ꞌcĩg Makayyiooktak ko? Aaĩ hatĩ kõrra ꞌcĩ aku etteedĩkeet Nyekuci ngagĩĩt vẽlẽk thooꞌthiok. 11Eheeddi ꞌBuuhaa cĩ Nyekuci aĩ,

“Aduha Makayyioohiti aĩ, ‘Habũtani rũgẽtaa caannĩ haini,

akatĩ hatĩ eeta vẽlẽk huruꞌnyia muumaa caannĩ,

nẽ ĩdĩhĩthĩt ꞌthaar cĩgannĩg!’ ”#Tigiil ꞌBuuk cĩ Iꞌthaia 45:23

12Nẽẽthĩ hoti ho, haduhaak hatĩ naag hõdẽĩ hõdẽĩ thõõth hĩ Nyekuc, hĩnĩngĩtĩ thooꞌthiok ꞌcĩg hadtican naaga.

Ma hĩkõõthaku ꞌgoonogu thooꞌthiok ꞌcĩg abathĩ

13Nẽẽthĩ, hibilli ngaatĩ hẽttẽẽdĩkĩ ꞌgoonogeet thõõth. Nẽẽthĩ hinnianĩ, hũkũmatteek muhẽẽnĩt, hátĩ hiittiõõ hõllõngaa hahĩĩnak ꞌgotoonogeet hẽꞌthẽcattõõ. 14Hĩ ẽẽtĩ ꞌcĩ aaĩ hĩ Makayyioohit Yeesu, haga naa gẽrrẽẽt aitiõõ ꞌgẽẽn ꞌcĩ aꞌngirannii ꞌcĩ ĩĩn ꞌriiring ẽmmẽn tõõ. Nẽẽthĩ, má ammuk ẽẽtĩ umwaa aĩ aꞌngirannii ꞌgẽẽn nẽ ĩĩ ꞌriiring, aꞌngirannii thĩ mĩĩ ꞌthẽk hĩ ĩnõõnnõ nẽ ĩĩ ꞌriiring. 15Má hõllõngaa accamanoothĩk ꞌgoonu ꞌcĩ ĩĩn lemmioohit, hĩnĩngĩtĩ ꞌgii ꞌcĩ adahi niina, iittiõõ hõllõngaa aꞌnyahi nii mĩnnan. Ma haaꞌnyihi ꞌgii ꞌcĩ adahi nii hẽꞌthẽcan ꞌgotonu baa adaaknĩ Krĩstõ. 16Ma haaꞌnyihi thõõth cunni ꞌcĩ adahĩ ꞌgẽẽn, haꞌnyahaak Krĩstõ ngaaoni. 17Hĩnĩngĩtĩ hõllõngaa ĩĩn habuccieet cĩ Nyekuci cĩ duhẽẽttõ hode cĩ hũdẽẽttõ, nẽẽthĩ, ĩĩn habuccieet ꞌcĩ haaꞌnyĩkĩ Nyekuc haccamanoothĩk nẽ ĩĩ ꞌcĩ haattiyyi ganõõna hĩ ꞌcĩ haattiyyi taliitta dĩdĩ. Aku thõõth ciee vẽlẽk, hĩnĩngĩtĩ Lori ꞌcĩ Ẽllẽẽmĩthĩ. 18Má adticanoothiku niig Krĩstõ ꞌgõõlaa cĩ, aaꞌnyiku hatĩ Nyekuc haccamanoothĩk nẽ itingollieeuung eeta.

19Hĩttĩmanit ngaatĩ haattiyyi ganõõna nẽ heelito eleeti cĩggaac, haꞌnyahit lemiinit ꞌcĩ attiranĩ. 20Ma hẽꞌthẽcannu dtiic cĩ Nyekuci hĩnĩngĩtĩ ꞌgẽẽn. Tẽllĩg ꞌgeennioha vẽlẽk, nẽẽthĩ, abathĩ ngaatĩ adahĩ ẽẽtĩ ꞌgẽẽn ꞌcĩ aaꞌnyĩk eet umwa hẽꞌthẽcanõõ. 21Ẽllẽẽmĩth ngaatĩ occa hõllõngaa hadahĩ iding hode hahũdĩ mẽrtĩ cĩ viinoo hode hadĩmanĩ thooꞌthiok ũgĩ ꞌcĩg ahaca ꞌgotoonogeet ꞌcĩg ĩĩn lemmiook hẽꞌthẽcattõõ.

22Nẽẽthĩ, hẽlẽggĩ vẽlẽk ꞌcĩg elemmu niig, hĩnĩngĩtĩ thooꞌthiok iccig, aanytĩk haauto hõrggẽẽnaa cunuung hĩ Nyekuc. Aꞌnyĩĩk Nyekuc haggatan eet ꞌcĩ hõllõngaa etteedĩk ẽlẽ cĩnnĩ ẽmmẽn thõõth ꞌcĩ abathĩ. 23Nẽẽthĩ, ẽẽtĩ ꞌcĩ akidanĩ, etteedothoothĩk thõõth hatĩ adak ꞌgẽẽn tĩho, hĩnĩngĩtĩ duhẽẽnĩtĩ cĩnnĩ ho, hõllõngaa aku lemiitta nẽ hẽlẽggĩ vẽlẽk ꞌcĩg hõllõngaa au lemiitta, ĩĩn ꞌthẽccan.

Currently Selected:

ꞌRooma 14: did

Highlight

Copy

Compare