Terethiinit 7
7
Eelliaa hatĩ eeta cĩg Nyekuci
1Ma baa ho, hudtuuha aajĩlẽẽt ꞌwec ꞌcĩg abĩlĩ kũdũlnyaannĩĩ ꞌcĩg ĩĩn ꞌwec, ĩcĩg lootu. Abĩlĩ hõdẽĩ ĩĩcĩ uruto, abĩlĩ hõdẽĩ ĩĩcĩ õkõlõõthĩkĩ kõrra, abĩlĩ hõdẽĩ ĩĩcĩ hujjieen nẽ ĩbĩl umwaa ĩĩcĩ holooc. Alaam nẽẽg ngõõtanĩ ꞌwec, hátĩ hiittiõõ hõllõngaa uuhan looc hode bũlũccwa hode hẽẽna. 2Ma nĩngaata, hĩcĩna aajĩlõ umwa ꞌcĩ aku ĩĩcĩ uruto, ꞌcĩ aꞌnyak ꞌgiimwa cĩ Nyekuc ꞌcĩ arũgĩ, ꞌcĩ ammacaaranĩ eet. Ma ho, eggerenyeek aajĩlẽẽt ꞌcĩg ĩĩn ꞌwec baag aaꞌnyĩhoothĩk ꞌtirriani ꞌcĩ aruhi looc hĩ bũlũc ĩĩnnĩk, 3“Ereeyyio da nõõ, ma hẽꞌthẽcannu looc hĩ bũlũc hĩ hẽẽna, ĩꞌthõng hamacaaratta muumti cĩg dticcianniook cĩg Nyekuci.”
4Ma nĩngaata, hikia hĩthĩha lothippit cĩ eet ꞌcĩg amacaaranni muumti ho. Ĩĩn nẽẽg vẽlẽk aalibꞌnya ꞌmiia hõdẽĩ hĩ hẽẽn ꞌwec hĩ ꞌwec (144,000), ꞌcĩg eberriaa hattũũgẽtĩĩ cĩg eet cĩg Ĩꞌthĩraẽlĩ. 5Baa ammacaaranni eeta alibnya õmmõtõ hĩ ꞌramma (12,000) habuccieetaa cĩ ꞌJuuda. Nẽ ammacaarattĩ eeta alibnya õmmõtõ hĩ ꞌramma (12,000) habuccieetaa cĩ ꞌRuubenĩ. Ammacaaranni tarĩ eeta alibnya õmmõtõ hĩ ꞌramma (12,000) habuccieetaa cĩ ꞌGaadĩ. 6Nẽ ammacaarattĩ eeta alibnya õmmõtõ hĩ ꞌramma (12,000) habuccieetaa cĩ Aathẽrĩ. Ammacaaranni tarĩ ũgẽẽgĩ alibnya õmmõtõ hĩ ꞌramma (12,000) habuccieetaa cĩ Navtali. Nẽ ammacaarattĩ eeta alibnya õmmõtõ hĩ ꞌramma (12,000) habuccieetaa cĩ Manaaꞌthe. 7Ammacaaranni eeta alibnya õmmõtõ hĩ ꞌramma (12,000) habuccieetaa cĩ ꞌThimiõõnẽ. Nẽ ammacaarattĩ eeta alibnya õmmõtõ hĩ ꞌramma (12,000) habuccieetaa cĩ ꞌLeevi. Ammacaaranni tarĩ eeta alibnya õmmõtõ hĩ ꞌramma (12,000) habuccieetaa cĩ Iꞌthakarĩ. 8Nẽ tarĩ, ammacaarattĩ eeta alibnya õmmõtõ hĩ ꞌramma (12,000) habuccieetaa cĩ ꞌThebuluni. Ammacaaranni eeta alibnya õmmõtõ hĩ ꞌramma (12,000) habuccieetaa cĩ Yothebo. Nẽ ammacaarattĩ eeta alibnya õmmõtõ hĩ ꞌramma (12,000) habuccieetaa cĩ Benyemiino.
Lothippit cobbi cĩ eetu
9Ma ngaati, hudtuuha lothippit cobbi gẽrrẽẽt cĩ eet ꞌcĩg aꞌnyamannaa ngaatĩ hagiili buúk, eet ꞌcĩg eberriaa habuccieeꞌnyanĩĩ cĩg loonyin vẽlẽk ꞌcĩg õthõõth thooꞌthiohĩ cũũmõ cũũmõ, abĩlĩ muumaa cĩ Nyekuci hĩ ĩcĩ Mĩꞌnyoono, ahimti nẽẽg vẽlẽk ceremwaanĩĩ ꞌcĩg õõrĩg nẽ aggamit urwo athĩnĩ. 10Ẽggẽrẽny nẽẽg vẽlẽk aĩ,
“Aku eliiniti vẽlẽk hĩ Nyekuc cĩnaac
ꞌcĩ aaĩ dtaabawa ho
nẽ aku hĩ Mĩꞌnyõõn.”
11Nẽ baa abĩlĩ aajĩlẽẽta vẽlẽk hĩ makayyiook hĩ hẽlẽggĩ ꞌwec ꞌcĩg arũgĩ ho, irriamaneek Nyekuc nẽ akattieek huruꞌnyia, aggiing muumti cĩggĩĩng nẽ alaacõ Nyekuc ĩĩtõ,
12“Aamẽn!
Aalla dĩhĩthẽẽnĩtĩ hĩ bulẽẽnĩt,
hĩ ꞌgẽẽnyĩth hĩ taliinit hĩ ꞌtirrian vẽlẽk
hĩ Nyekuc cĩnaac ooo.
Aamẽn!”
13Ma nĩngaata, ikia ijina makayyioohiti umwaa eetinii ꞌcĩg ĩĩn hẽẽn ꞌramma hĩ ꞌwec ko ĩnnĩhaa, “Eet ꞌcĩg nganĩ niccieeg ahimti ceremwaanĩĩ ĩcĩg õõppẽr ko? Au eeta niccieeg ĩĩna?”
14Nẽ hẽdẽca hĩĩnnĩha, “Aga niina.”
Nĩngĩtĩ aduhaaka anneeka nẽẽ, “Eet baag ẽmmẽẽthĩ ꞌcannan baa obbi gẽrrẽẽt niccieegi. Ĩtĩllahit nẽẽg ceremwa cĩggĩĩng biyyiẽẽtĩĩ cĩg Mĩꞌnyõõnak. 15Ĩnõõ ꞌyioko cĩ,
“Abĩllĩ nẽẽg muumaa cĩ dtaaba cĩ Nyekuci
nẽ alaacõ ĩnõõnnõ baalin hĩ waathĩn ꞌCieetõõ cĩnnĩ ho.
Nẽ ẽẽtĩ ꞌcĩ iccioloonganĩ dtaaba ho,
ẽbbẽttaanĩk hatĩ nẽẽ cẽrẽm cĩnnĩ hubung ĩhõõggõ vẽlẽk.
16Iittiõõ hatĩ ĩhõõggõ hõllõngaa adak magĩthĩ tarĩ,
hode aam kõrra tarĩ.
Iittiõõ hatĩ kõrra ꞌcĩ nga atũũth ĩhõõggõ tarĩ tõõ.
17Hĩnĩngĩtĩ ĩĩ Mĩꞌnyõõn ꞌcĩ abĩlĩ hõrggẽẽnaa cĩ dtaabaõ ho tũhayyioohit cĩnĩĩng.
Õkõõĩ hatĩ nẽẽ ĩhõõggõ ngaatĩ aattiyyi maama cĩg rũgẽt ꞌcĩ aalla ooo.
Attũmũny hatĩ Nyekuci tilaalõ cĩggĩĩng.”
Currently Selected:
Terethiinit 7: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
