Terethiinit 16

Lohilihilit cĩg liilii cĩ Nyekuci

1Ma ho hĩthĩha molook cobbi ꞌcĩ aku ꞌCieethaa cĩ Nyekuci ꞌcĩ aduhaak aajĩlẽẽt tũkĩramma ho anneek, “Õõt udduuttik lilii cĩ Nyekuci ꞌcĩ aaĩ lohilihilitii ꞌcĩg ĩĩn tũkĩramma ho, eetinii vẽlẽk ĩcĩg abũrĩ thõõth cĩ Nyekuci loota nĩnga.”

2Ma nĩngaata ĩcĩĩdak aajĩlõ ꞌcĩ oou mooriꞌthiook ꞌcĩg aꞌnyak nẽẽ lohilihilaa cĩnnĩ ho eet loota nĩnga. Ma hĩdĩĩkoothong, ulubta carrahulita ꞌcĩg abathĩ nẽ ẽkẽdanit gẽrrẽẽt, eetinii cĩg eet ꞌcĩg aꞌnyak nyamacaar cĩ nyaharahaahõ nẽ alaacõ ꞌthooura cĩnnĩ ho.

3Ma tarĩ ho, ĩcĩĩdak aajĩlõ ꞌcĩ ĩĩn ꞌramma mooriꞌthiook cĩg lohilihili cĩnnĩ bũlũcatõõ cobbi. Ma ho, ũtũhũĩ bũlũc ĩĩ biyyi ꞌcĩg aattĩg hĩ biyyieeta ꞌcĩg eet ꞌcĩ adaak ẽlẽk, nĩngĩtĩ adaaknĩ hẽlẽggĩ ꞌcĩg aattĩg bũlũcatõõ cobbi vẽlẽk.

4Ma hĩdĩĩkoothong, ũnũẽẽhĩ aajĩlõ ꞌcĩ ĩĩn iyyio ĩcĩĩdak mooriꞌthiook cĩg lohilihili cĩnnĩ, liilliohĩ vẽlẽk ĩcĩg arik loota nĩnga. Ma ho, utuhuyyi maama liilliohĩ vẽlẽk hĩĩtõ biyyi. 5Ma ngaati, hĩthĩha aajĩlõ umwa ꞌcĩ aggam maam vẽlẽk õthõõth ĩĩ,

“Iini nii Nyekuc ꞌcĩ etteedi thooꞌthiok jurrung

nganĩngĩtĩ baarkit nẽ aalla elleemi noho,

hĩnĩngĩtĩ etteedi nii thooꞌthiok jurrung ꞌgõõlaa ꞌcĩ aũlanĩ.

6Baa uruhit eeta baag abathĩ eet cugunnig ꞌcĩg ẽllẽẽmĩth hĩ põrõvẽtaaꞌnya cugunnig.

Nẽ baa uuku nii ĩhõõggõ, hĩnĩngĩtĩ ĩĩn ꞌgii ꞌcĩ akĩĩny nẽẽgĩ.”

7Nẽ hĩthĩha molook altaarĩa ꞌcĩ õthõõth aĩ,

“Eei, Makayyioohit Nyekuc ꞌTirriannioohit ꞌcĩ ĩllõõan vẽlẽk,

etteedi nii thooꞌthiok jurrung ꞌgõõlaa ꞌcĩ aũlanĩ.”

8Ma ho, udduutik aajĩlõ ꞌcĩ ĩĩn ꞌwec lohilihili cĩnnĩ kõrratõõ nĩngĩtĩ atũũthĩ abuurꞌthet cĩ korro ꞌcĩ aaĩ hĩ ꞌgwaa eet gẽrrẽẽt. 9Baa atũũth abuurꞌthet cĩ korro ho, eet baag abathĩ hippiirria gẽrrẽẽt, nĩngĩtĩ accĩĩnĩ eeta ꞌthaar cĩg Nyekuc baa aꞌnyak makaaꞌthĩt cĩ ꞌthereeni ꞌcĩg abathĩ dtẽc ko. Nẽẽthĩ, baa aalla abũrĩ nẽẽg thõõth cĩ Nyekuci nẽ hõllõngaa abuluth ĩnõõnnõ buúk.

10Ma ho, ũũk udduutik aajĩlõ ꞌcĩ ĩĩn ꞌtur lohilihili cĩnnĩ dtaabawaa cĩ nyaharahaahõ, ma hĩdĩĩkoothong, ũtũhũĩ lõõcĩ cĩ habuccieet cĩnnĩ ĩĩ muguur, nĩngĩtĩ adahĩ eeta ahaatwa cĩggĩĩng huciitha. 11Nẽ hĩnĩngĩtĩ huciith cĩ carrahulit cĩggĩĩng ko, aalla nẽẽg accĩĩn Nyekuc cĩ hẽẽtkujjieen nẽ tarĩ, aalla adĩman nẽẽg thooꞌthiok ꞌcĩg abathĩ noho.

12Ma nĩngaata, ikia udduutik aajĩlõ ꞌcĩ ĩĩn tõrkõnõn lohilihili cĩnnĩ lĩĩlaa cobbi ĩĩcĩ Euvaratẽthĩ, nĩngĩtĩ õdõhõknĩ lĩĩl ciee, hĩĩ ꞌgõõl ꞌcĩ ovvooyyianĩ habuẽẽta ꞌcĩg au ĩĩcĩ uruto. 13Ma nĩngaata, hĩcĩna loriẽẽt iyyio ꞌcĩg abathĩ ꞌcĩg aattĩg hĩ lõkĩdõdõõknya. Adukna hõdẽĩ ũtũũgaa cĩ ꞌbuuk ꞌcĩ aꞌthĩlan ko nẽ uduhuna umwaa ũtũũgaa cĩ nyaharahaahõ nẽ tarĩ, uduhuna umwaa ũtũũgaa cĩ eet ꞌcĩ õõlõng aĩ, hĩĩnĩ põrõvẽtaac ko. 14Nẽ loriẽẽta ꞌcĩg abathĩ ĩĩn iyyio ho, aꞌnyak ꞌtirrian ꞌcĩ adticanĩ thooꞌthiok ꞌcĩg ĩnaat eeta. Ma ho, õõt uduktaak habuẽẽt cĩg lootu vẽlẽk, hulutti ngaatĩ doyyii, hátĩ hõõt joraa cĩ kõr cobbi, ꞌcĩ hatĩ ẽttẽẽdĩ Nyekuci ꞌTirriannioohiti ꞌcĩ ĩllõõan vẽlẽk, thooꞌthiok, kõr ꞌcĩ decciaanĩt cĩ lootu.

15Ummuhuttooth thõõth baa aduha Yeesu aĩ, “Ma hikia naana, akuleeku hatĩ ꞌjieen, hanĩha hatĩ naa hĩ igorriaahiti! Aggatan hatĩ Nyekuci eet ꞌcĩ aaĩ dĩkĩĩm nẽ aꞌnyak cẽrẽm ẽlla, hátĩ hiittiõõ hõllõngaa õvvõ ngũtũtũũny nẽ aaꞌnyĩk ẽlẽ cĩnnĩ ngaaoni.”

16Alũta hatĩ loriẽẽta ꞌcĩg abathĩ ho habuẽẽt cĩg lootu hĩ ũũrũta cĩggĩĩng vẽlẽk ngaatĩ odoyyii, haĩ nĩngĩtĩho Ebereeiyyi, Aramageddon.#16:16 Aramageddon: Nĩngĩtĩ aĩ, muur ꞌcĩ haĩ Megiddo.

17Ma ho, udduutik aajĩlõ ꞌcĩ ĩĩn tũkĩramma lohilihili cĩnnĩ ngõõta. Ma nĩngaata, ẽggẽrẽnya Nyekuci moloohaa cobbi dtaabawa ꞌCieethaa cĩnnĩ ĩĩ, “Hũttũbaneeha thõõth vẽlẽk!” 18Ma nĩngaata, ammad lõõcĩ hĩccaaõ bõrõhẽẽcĩ looc nicci vẽlẽk nẽ uluba hirihidtihi buúk cobbi gẽrrẽẽt, ꞌcĩ gõõng nga hikia irkiꞌnyiaannĩ vẽlẽk. 19Nĩngĩtĩ aku alibiẽẽnĩ ꞌtaaũnĩ cobbi cĩ Babiloonnia hĩĩ iyyio nẽ tarĩ, iita ilibti ꞌtaaũnniooha cĩg loonyin vẽlẽk buúk hĩĩ ꞌthĩĩ. Nĩngĩtĩ ammuhaanĩ Nyekuci ꞌthẽccanẽẽt cĩg eet cĩg Babiloonnia vẽlẽk nẽ uuk ĩhõõggõ lĩĩlĩẽẽtta. 20Nẽ baa iita ũmmũlũũnyanit maama dtuunganĩ vẽlẽk ꞌcĩg aattĩg bũlũccwaanĩtõõ nẽ irribattĩ muurrioha vẽlẽk. 21Nẽ tarĩ, udhukta tẽllẽẽna ũgẽẽgĩ ꞌcĩg obbitig cĩg tammwaak ꞌcĩg ĩĩkĩ hĩ cũaal cĩ haalu nẽ ohoddia eet loota nĩnga gẽrrẽẽt ũdũt. Ma ho, ĩccĩĩnĩtõ eeta Nyekuc gẽrrẽẽt haaga noho, hĩnĩngĩtĩ baa õhõda tẽllẽẽna niccieeg eet hippiirria gẽrrẽẽt ũdũt.

Currently Selected:

Terethiinit 16: did

Highlight

Copy

Compare