Terethiinit 14

Mĩꞌnyõõn hĩ nuyyiook cĩgĩnnĩg

1Nẽ hudtuuha Mĩꞌnyõõn abĩllĩ muuraa ꞌcĩ haĩ ꞌThion,#14:1 ꞌThion: ꞌThaara ꞌcĩg haĩ ꞌThion ko, ĩĩn ꞌthaar ũgĩ cĩg ꞌJeruꞌthalẽmĩ. arũmĩ hĩ eet ꞌcĩg ĩĩn aalibꞌnya ꞌmiia hõdẽĩ hĩ hẽẽn ꞌwec hĩ ꞌwec (144,000), ꞌcĩg aꞌnyak ꞌthaar cĩgĩnnĩg hĩ cĩg Maacõnĩ muumtinii cĩggĩĩng. 2Ma ho, hĩthĩha molook umwa ꞌcĩ aku hẽẽtahujjieen ꞌcĩ ẽggẽrẽny hĩ maama cĩg tawaanak, hode aaĩ hĩgõõng ĩccaayyi bõrõhẽẽcĩ hatĩ atĩĩlĩ tammu nẽ gõõng õrõk hĩ addungẽẽta ꞌcĩg aruk benniooha. 3Nẽ ẽbẽnĩ tẽgẽl ꞌcĩ ĩĩn ngeju muumaa cĩ dtaaba cĩ Nyekuci hĩ muumaa cĩ idiꞌngwa baag ĩĩn ꞌwec ko buúk, hĩ makayyiook. Baa hiꞌthihi eet ꞌcĩ aga tẽgẽl nicci ũdũt. Aga tẽgẽl tĩho eeta ꞌcĩg ĩĩn aalibꞌnya ꞌmiia hõdẽĩ hĩ hẽẽn ꞌwec hĩ ꞌwec (144,000) ko diooni, eet baag eelliaa loota nĩnga. 4Baa ĩĩn nẽẽg vẽlẽk eet ꞌcĩg tẽllĩg ꞌthinneeti, ꞌcĩg nga hatagguutho hĩ ngaaĩ tahatak. Nẽ anũ Mĩꞌnyõõn ooo, ꞌgõõlaa ꞌcĩ õkõõĩ, hĩnĩngĩtĩ baa eelliaa nẽẽg hõrggẽẽnaa cĩ eet vẽlẽk loota nĩnga, hátĩ haanytĩhoothĩk Nyekuc hĩ Mĩꞌnyõõn, hĩĩtõ ꞌbaaninit cĩnĩĩng ꞌcĩ oou. 5Eet ꞌthẽk ꞌcĩg nga hoolongit ũdũt nẽ occa hõllõngaa aꞌngaaꞌnyi haaga.

Thooꞌthiok cĩg aajĩlẽẽt ꞌcĩg ĩĩn iyyio

6Ma ho, hudtuuha aajĩlõ umwa ꞌcĩ alilliaan hẽẽtahujjieen, aꞌnyaha nyeemuut ꞌcĩ abũnnaa ꞌcĩ aalla ũdũt cĩ Nyekuci, ꞌcĩ aku aduhaak loonyin hĩ habuccieeꞌnya hĩ hattũũgẽt vẽlẽk ꞌcĩg õthõõth thooꞌthiohĩ cũũmõ cũũmõ loota nĩnga. 7Baa ẽggẽrẽny aajĩlõ ciee gẽrrẽẽt aĩ, “Itingolli Nyekuc nẽ alaac ĩnõõnnõ! Õbõhĩ kõrra ꞌcĩ aku ẽttẽẽdĩ nẽẽ thooꞌthiok cĩg eetuk. Alaac ĩnõõnnõ, hĩnĩngĩtĩ baa ẽhẽnyta nẽẽ hẽẽtkujjieen hĩ looc, hĩ bũlũccwa hĩ hidiowwẽẽn vẽlẽk.”

8Nẽ ũnũa aajĩlõ nicci ꞌgoonnia umwaa ꞌcĩ ĩĩn ꞌramma ꞌcĩ ẽggẽrẽny aĩ, “Irribanĩ ꞌtaaũnĩ cobbi cĩ Babiloonnia! Hĩnĩngĩtĩ aaꞌnyĩk eet vẽlẽk hũdũũtĩtõ mẽrtaa cĩ viinoo nẽ ĩdĩmanit thooꞌthiok ꞌcĩg ĩĩn ꞌriiring, ꞌcĩg ooginni hĩ ngaaĩ tahatak. Nẽẽthĩ ꞌyioko, ĩlĩĩlĩ Nyekuci nẽ irriban Babiloonnia.”#14:8 Babiloonnia: Urutaa cĩ korriook baag Nõõa, baa ẽhẽnyĩt eeta ꞌcieeth ꞌcĩ uuni Babela, ꞌcĩ baa hiita hĩĩttĩk eeta uruta Babiloonnia. Ma urutaa cĩ irkiꞌnyia ꞌcĩg mẽẽlĩg, ikia ũũhĩ habuui Nabukadaneetharĩ eet cĩg Ĩꞌthĩraẽlĩ ũgĩ ĩĩcĩ looc cĩ Babiloonnia, baa ĩꞌthaan nẽẽ ꞌJeruꞌthalẽm, irkiꞌnyiaannĩĩ baag ĩĩn ꞌmiiaꞌnya ꞌtur hĩ hẽẽn tũkĩramma (570), baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 11; 2 Habuẽẽt 24-25; Danieele 1:1-7.

9Ma ho, ũnũa aajĩlõ ꞌcĩ adtuurna ꞌcĩ ĩĩn iyyio nẽ ẽggẽrẽny nẽẽ buúk ĩĩ, “Ẽẽtĩ ꞌcĩ ala nyaharahaak hĩ ꞌthooura cĩnnĩ nẽ ẽlẽm ngaatĩ aarĩkĩ nyamacaar cĩ nyaharahaahõ muuma, hode attiaa cĩnnĩ, 10ahũd hatĩ nẽẽ viino ꞌcĩ adduuttiak battaali lĩĩlĩẽẽttaa cĩ Nyekuci. Accananni hatĩ nẽẽ ꞌgwoyyiatõõ ꞌcĩ aaburii padtahac, ẽbẽk Mĩꞌnyõõn hĩ aajĩlẽẽt cĩgĩnnĩg ꞌcĩg ẽllẽẽmĩth noho. 11Má ala ẽẽtĩ umwaa nyaharahaak hĩ ꞌthooura cĩnnĩ nẽ ẽlẽm nyamacaarwa cĩg ꞌthaar cĩgĩnnĩg, accananni hatĩ nẽẽ baalin hĩ waathĩn. Nẽ ĩꞌngaathĩ hatĩ bũrrẽtĩ cĩ ꞌcannan cĩnnĩ ho, hũũk hẽẽtahujjieen ooo haaga nẽ hõllõngaa hatĩ iyyioman ꞌcannaana ũdũt.” 12Aĩ thõõth ciee, adiim ẽmmẽẽthĩ eeta cĩg Nyekuci ꞌcannan nẽ uꞌthuutti tilooinit cĩ Nyekuci ho nẽ uꞌthuutti lemiinit cĩnĩĩng hĩ Yeesu ũdũt.

13Nĩngĩtĩ hathĩknĩ molook cĩ aku hẽẽtahujjieen aĩ, “Tẽhẽẽd thõõth icci loota. Iꞌthianaanĩ kõr nicci, aggatan hatĩ Makayyioohiti eet ꞌcĩg adaahĩ, hĩnĩngĩtĩ ẽlẽmĩ nẽẽg ĩnõõnnõ.”

Ẽdẽcĩ Lorii ꞌcĩ Ẽllẽẽmĩthĩ aĩ, “Eei, ammũda hatĩ nẽẽg ꞌyiomman dtiicaa cĩnĩĩng õkõmĩ ho nẽ tarĩ, hatĩ aaꞌnyĩhoothĩk ĩhõõggõ ꞌbaaniniti ꞌcĩ adũman dtiic cĩnĩĩng.”

Ibbiir lõõcĩ nẽ ajanĩ

14Ma ho, hudtuuha eet umwa ꞌcĩ aaĩ hĩ Ngeertĩ Eeto,#Tigiil ꞌBuuk cĩ Danieele 7:13 iccioloongan diithaa ꞌcĩ õõppẽr nẽ itihim temedek ꞌcĩ ĩĩn ꞌdaab nẽ aggam thẽrẽthẽrẽ cĩ janiitto attiaa cĩnnĩ. 15Ma ho, uduhuna aajĩlõ umwaa battaala ꞌCieethaa cĩ Nyekuci, ꞌcĩ eggerꞌnyeek eet ꞌcĩ iccioloongan diitha ho anneek, “ꞌThianaaĩ janiinit thẽrẽthẽrẽaa cunni ꞌlẽhẽdĩ ho, hĩnĩngĩtĩ ibbiir mana nẽ ũttũbanoothĩk kõrra cĩ janiitto loota nĩnga.” 16Nĩngĩtĩ attihaanĩ ẽẽtĩ ꞌcĩ iccioloongan diitha ho, thẽrẽthẽrẽ cĩnnĩ nẽ iꞌthianaaĩ ajan looc ꞌcĩ ibbiir ko.

17Ma ho, uduhuna aajĩlõ umwaa tarĩ, battaala ꞌCieetõõ cĩ Nyekuci hẽẽtahujjieen, ꞌcĩ aꞌnyak thẽrẽthẽrẽ ꞌcĩ ꞌlẽhẽdĩ buúk cĩ janiitto. 18Ma uruta, uduhuna aajĩlõ umwaa altaarĩa, ꞌcĩ aꞌnyak ꞌtirrian ꞌcĩ aggamĩ ꞌgwoo ꞌcĩ aruhi looc nẽ uduhaak aajĩlõ umwa ĩĩnnĩk, “ꞌTiha thẽrẽthẽrẽ cunni ꞌcĩ ꞌlẽhẽdĩ hataa nẽ ajanĩ hẽẽn cĩg viinoaak loota nĩnga, hĩnĩngĩtĩ ibbiirito.” 19Nĩngĩtĩ ẽttẽẽdĩ aajĩlõ viino ꞌcĩg abbiiri ho, thẽrẽthẽrẽaa cĩnnĩ. Ma nĩngaata, ũlũteek aajĩlõ nicciee viino ꞌcĩ abbiiri ho ꞌloohatõõ ꞌcĩ ammacciini, hĩĩ terethiinit cĩ liilii cĩ Nyekuci. 20Baa aaĩ ꞌlook ꞌcĩ ammacciini viino ho, battaala ngadiihaa cĩ ꞌtaaũn cobbi. Ma baa amaccĩ viino nicciee ho, ariha hinnia biyyieeta. Ma ho, utuhuyyi biyyieeta hĩĩtõ hidioo ꞌcĩ aarĩk hĩĩ uun gẽrrẽẽt, haꞌnyak maaĩlꞌnya#14:20 Maaĩlꞌnya: Occa õvvõ ẽẽtĩ maaĩlꞌnya iyyio ꞌthaa hõdẽĩ. ꞌmiia hõdẽĩ hĩ hẽẽn turkiyyio (180) nẽ uuthik occa ũũppan ngaatĩ ammũlũũnyanaanĩ nyangõõllẽẽ.

Currently Selected:

Terethiinit 14: did

Highlight

Copy

Compare