ꞌLuuka 7
7
Lemiinit cĩ ꞌgaalac cĩ ũũrũta
(Tigiil Maatteeo 8:5-13; Yõaannẽ 4:43-54)
1Ma baa ẽdẽcaak Yeesu ngaatĩ allimanĩ eeta, ĩtĩnga ũũk Kapernauma. 2Baa ammũdeek õmmõõrĩ dticciannioohiti umwaa ꞌcĩ amĩna ꞌgaalacĩ cĩ ũũrũta#7:2 ꞌGaalac cĩ ũũrũta: Ĩĩn ꞌgaalacĩ ciee makayyioohit ꞌcĩ aggam ũũrũta ꞌmiia hõdẽĩ. gẽrrẽẽt hõbõhĩ daahĩthĩ. 3Ma baa athĩhĩ ꞌgaalacĩ Yeesu nĩngaata ho, ikia ĩꞌthõ makayyiook ũgĩ cĩg eet cĩg ꞌJudeei hõõt hĩĩlallieek Yeesu hikia hẽẽla dticciannioohit cĩnnĩ ho. 4Ma baa õdõlan nyakangaaꞌnya tĩko Yeesu ho, ĩĩlallieek ĩĩttĩk, “Adiimmi ꞌgaalacĩ umwaa cĩ ũũrũta nganiit bĩĩt ẽla dticciannioohit cĩnnĩ. 5Ĩĩn nẽẽ eet ꞌcĩ ammĩnan looc cĩnaac gẽrrẽẽt, ĩꞌthõng hetehenyeheet ꞌCieeth cĩ Laiitto.” 6Nĩngĩtĩ ĩꞌngaannĩ Yeesu nẽ ookorit hĩ ĩhõõggõ.
Baa hõllõngaa ꞌrẽẽn Yeesu hĩ ꞌcieeth ꞌcĩ ĩꞌthõõanĩ ꞌgaalacĩ nyakangaaꞌnya ho. Baa ĩꞌthõõa nẽẽ ĩhõõggõ hiita hĩĩttĩk Yeesu, “Makayyioohit, ma haccanani ẽlẽ cunni haaga, hĩnĩngĩtĩ haꞌngaaoni naa ngaatĩ occa aduknaanĩ nii halang caannĩ. 7Ĩnõõ ꞌcĩ adtuuhanĩ hõllõngaa hũũppanĩĩ ngaatĩ huppwaanaki naa dẽẽdẽ ho. Nẽẽthĩ ꞌyioko, duha nuun thõõth hõdẽẽthõng haaga, hátĩ hũbũna dticciannioohiti caannĩ ho. 8Hĩnĩngĩtĩ hĩĩnĩ naa buúk eet ꞌcĩ haꞌnyahi makayyiook cĩgannĩg nẽ tarĩ hĩĩna eet ꞌcĩ haggami ũũrũta. Ma haduhaahi icci hanneehi, ‘Bĩtõ,’ adĩman ꞌthẽk hĩcĩ haduhaahi naa ho. Nẽ ma haduhaahi iccia hanneehi, ‘Ijjia,’ aku ꞌthẽk hĩcĩ haduhaahi naana. Ma haduhaahi dticciannioohit caannĩ hidtican dtiic icci, adtican ꞌthẽk ꞌgõõla tĩho.”
9Ma baa athĩhĩ Yeesu thõõth icci ho, ikia ĩtĩna nẽẽ lemiinit cĩ eet nicci gẽrrẽẽt, nĩngĩtĩ abbuudi eet ꞌcĩg baag anũ ĩnõõnnõ ho nẽ ĩĩnnĩk, “Haduhaakuunga, nga hũmmũda eet ꞌcĩ aꞌnyak lemiinit ꞌcĩ aaĩ hoti tananga Ĩꞌthĩraẽla.” 10Ma nĩngaata, oboddioothĩ eeta baag ĩꞌthooyyia halangatõõ, nĩngĩtĩ ammũdõõthĩkĩ dticciannioohit tĩho ũbũna.
Ũrũgũtha Yeesu loholeec cĩ ngaatĩbõyyĩ
11Ma hĩdĩĩkoothong, ĩtĩngaacõ Yeesu hĩ nuyyiook cĩgĩnnĩg, õõt ꞌtaaũnaa ꞌcĩ haĩ Nain. Baa õõkõr nẽẽ hĩ lothippit cobbi gẽrrẽẽt. 12Ma baa õbõktõ nẽẽ hĩ hattũũg cobbi cĩ ꞌtaaũnõõ, irrionganaak hinnia eeta buulenit umwa ꞌcĩ adaahĩ battaali. Baa odoyyii buuleniti ciee adaahĩ ho nẽ ĩĩn ngaannia ngaatĩbõyyĩ. Nẽ baa õõkõr lothippiti cĩ ꞌtaaũnõõ hĩ ĩnõõnnõ. 13Ma baa adtuuha Yeesu Makayyioohiti ngaatĩbõyyĩ tĩho ho, atamaatĩk ĩnõõnnõ nẽ ĩĩnnĩk, “Ma halu.”
14Ma ho, ĩbĩlĩt eeta ꞌcĩg irriongan buulenit ko, nĩngĩtĩ õkõ ahumi Yeesu ĩnõõnnõ nẽ othoothĩk ĩĩnnĩk, “Buulenit, hanneekii tĩnga ꞌjieena.” 15Nĩngĩtĩ ĩꞌngaanĩ buuleniti aa adaak ko noho cahũkũr haau ꞌjieena nẽ iꞌthianaaĩ õthõõth lõꞌngõõc. Nĩngĩtĩ õbõdẽẽkĩ Yeesu ĩnõõnnõ aattĩnnĩ.
16Ma nĩngaata, ubulan thõõth ciee eet vẽlẽk ꞌcĩg aattĩg nĩngaata, nĩngĩtĩ au adĩkꞌthĩ Nyekuc gẽrrẽẽt aĩnnĩ, “Uppwaannaheet aattĩ põrõvẽtaacĩ cobbi gẽrrẽẽt. Ikia ẽla Nyekuci eet cĩgĩnnĩg.” 17Nĩngĩtĩ ĩꞌthanõthõõthĩkĩ nyeemuut cĩ Yeesu ho ꞌJudeea hũtũrũũr hĩ loonyin vẽlẽk nĩngaata.
Yeesu hĩ Yõaannẽ Batitta
(Tigiil Maatteeo 11:1-19)
18Baa aduhaak Yõaannẽ nuyyiooha cĩgĩnnĩg thooꞌthiok ꞌcĩg adtican Yeesu ho vẽlẽk. Ma ho, ũtũvvũ nẽẽ nuyyiook cĩgĩnnĩg ꞌramma, 19nẽ ĩꞌthõ hõõt hijinit Makayyioohit Yeesu hĩĩttĩk, “Nganiit baa aĩ occa hatĩ akuuni? Hode occa nga hẽrẽẽyya eet umwa?”
20Ma baa õdõlanit nuyyiooha niccieeg Yeesu, uduktaak ĩĩttĩk, “Ĩꞌthõõanneet ngagĩĩt Yõaannẽ Batitta hiita hijitti hiittihii, ‘Nganiit baa aĩ occa hatĩ akuuni? Hode occa nga hẽrẽẽyya eet umwa?’ ”
21Nẽ kõr niccia, baa ammũdeek ẽẽla Yeesu eet ꞌcĩg õmmõõrĩ mooriꞌthiook ꞌcĩg mẽẽlĩg, hĩ ꞌcĩg aꞌnyak loriẽẽt ꞌcĩg abathĩ, hĩ ꞌcĩg rubettĩg vẽlẽk hũbũttaathõ. 22Nĩngĩtĩ ẽdẽcĩ Yeesu nuyyiook cĩg Yõaannẽ ho annẽẽkĩ, “Oboddiooth õõt uduktaak Yõaannẽ thooꞌthiok ꞌcĩg acinnu nẽ ĩthĩktu ho. Õõt ĩĩttĩk, ĩcĩttĩ eeta ꞌcĩg rubettẽẽgĩ, õtõõcõ ꞌcĩg ahuuli, ũbũttaathõ ꞌcĩg adak helleggeri, ĩthĩktõ ꞌcĩg adĩĩtĩ ĩĩna, ũrũgta daakiaha nẽ illimanoothĩk nyeemuut ꞌcĩ abũnnaa eet ꞌcĩg ĩĩn hullaha buúk. 23Aggatan hatĩ Nyekuci eet ꞌcĩ ẽlẽmma nganĩĩt, hĩnĩngĩtĩ thooꞌthiok ꞌcĩg hadticani naa ho.”
24Ma baa oboddioothĩ nuyyiooha cĩg Yõaannẽ, iꞌthianaaĩ Yeesu ijin lothippit thõõth cĩ Yõaannẽ anneek, “Eet baa ꞌcĩ aaĩ hutuno baa õõ acinnu niig horrwaa ꞌcĩ õdõhõhĩĩ kak? Aaĩ baa nẽẽ hĩ ĩhaõõcĩ aa gõõng uuni uuhan ngõõtĩ? 25Má aitiõõ nẽ baa oottu icittu neegi? Eet ꞌcĩ baa ahimit ceremwa ꞌcĩg ẽllẽẽmĩthĩ? Aattĩg eeta ꞌcĩg ahimit ceremwa ꞌcĩg ẽllẽẽmĩth nẽ irrianit gẽrrẽẽt õlõõ cĩ habuuo. 26Nẽẽthĩ, ne ꞌcĩ baa ooyyu acinnu niig ko dẽẽdẽ? Põrõvẽtaac? Eei dĩdĩ, haduhaakuunga, põrõvẽtaac ꞌcĩ ĩllõõan gẽrrẽẽt. 27Ĩnõõnnõ ciee baa eheeddi ꞌBuuhaa cĩ Nyekuci aĩ,
“ ‘Hĩꞌthõõakii hatĩ naa Nyekuci nganiit ꞌthooyyiahit caannĩ
ꞌcĩ aku akũmaneek ꞌgõõl cunni.’#Tigiil ꞌBuuk cĩ Malaaki 3:1
28Haduhaakuung dĩdĩ, aitiõõ ẽẽtĩ umwaa ꞌcĩ arrita ngaaĩ cĩg irkiꞌnyia iccig ꞌcĩ ĩllõõan Yõaannẽ tõõ. Nẽẽthĩ, ẽẽtĩ ꞌcĩ adtuurna habuccieetaa cĩ Nyekuci, ĩllõõan nẽẽ Yõaannẽ.”
29Ma baa athĩhĩ eeta vẽlẽk hĩ eet ꞌcĩg alũt occoro buúk thõõth cĩ Yeesu ho, iita elemit nẽẽg ngaatĩ aũlanĩ thõõth cĩ Nyekuci, hĩnĩngĩtĩ baa aggameek Yõaannẽ ĩhõõggõ baattithimo. 30Baa hinnia abũrĩ Variꞌtheei hĩ ꞌlimmanniook cĩg nyattaalak thõõth cĩ Nyekuci, hĩnĩngĩtĩ baa nga haggameek Yõaannẽ ĩhõõggõ baattithimo.
31Ma ho, õthõõth Yeesu ĩĩ, “Hĩthakꞌtheehi occa ꞌthẽk naa eet cĩg irkiꞌnyia iccig neegi? Aattĩg ꞌyioko ꞌthẽk nẽẽg hĩ nii? 32Aattĩg nẽẽg hĩ lohollia aa gõõng urangan ngaatĩ tũũõ nẽ othooꞌthik ꞌgõõnõgĩ ĩĩttĩk,
“ ‘Hadtaheekuung loboruẽẽt ĩꞌthõng,
nẽ hõllõngaa arugummu buúk,
hebeneekuung tegellwa cĩg lõngaanak,
nẽ hõllõngaa aluyyu buúk.’
33Ẽdẽta Yõaannẽ Batitta ẽlẽ ꞌgẽẽna hĩ viinoa, ainnu hinnia ‘Aꞌnyak lori ꞌcĩ abathĩ.’ 34Ma baa aku Ngeertĩ Eeto aduhi nẽ ũhũd viino ho, akanneeku hinnia lõbõlõbẽẽꞌthĩt hĩ dũũtĩth nẽ iittihu, ꞌgõõnĩ luttiook cĩg occoro hĩ cĩ ‘ꞌthẽccannioohu.’ 35Nẽẽthĩ, ẽtẽrꞌthaa ꞌgẽẽnyĩthĩ hĩĩ dĩdĩ eetinii ꞌcĩg ẽlẽmĩ thõõth cĩnnĩ.”
Uud ngaa ꞌcĩ ĩĩn ꞌthẽccannioohit Yeesu
36Ma ho, ũtũvva Variꞌtheeniti umwaa Yeesu hũũk duhẽẽtta õlõõ cĩnnĩ. Nĩngĩtĩ õkõõĩ Yeesu hũũk hẽrẽẽõ dtaabawa. 37Ma baa athĩhĩ ngaa umwaa ꞌcĩ baa gõõng ĩĩn ꞌthẽccannioohit ꞌtaaũnaa tĩho aĩ, aduhi Yeesu ꞌcieethaa cĩ Variꞌtheetto nĩngaata ho, aꞌnyaha ngõõrrõ cĩ udẽẽttõ ꞌcĩ aꞌnyak muyuuk ꞌcĩ ẽmmẽdĩ gẽrrẽẽt deera, 38nẽ ikia ũũk ĩbĩl ĩĩcĩ bahuc cĩnnĩ. Ma ho, utulu ĩꞌthõng hĩdtĩlattoothĩk tilaalõ ꞌthoo cĩg Yeesu nẽ upuppuucan ĩmanĩĩ cĩgĩnnĩg nẽ ũcũũcũ ꞌthoo cĩgĩnnĩg nẽ udduuttik ngõõrrõ.
39Ma baa acĩn Variꞌtheeniti baa avvĩ Yeesu thõõth icci ho, ummuk ꞌthĩnĩtatõõ ĩĩ, “ꞌYioko hĩĩ ẽẽtĩ ciee põrõvẽtaac dĩdĩ, occa ꞌyioko aga ngaatĩ ĩĩnnĩ ngaa ꞌcĩ ahum ĩnõõnnõ ho ꞌthẽccannioohit.”
40Nĩngĩtĩ annẽẽkĩ Yeesu ĩnõõnnõ, “ꞌThimõõnẽ, hadiimi haduhaakii thõõth umwa.”
Nẽ ẽdẽc ꞌThimõõnẽ ĩĩ, “Duhaahaanĩ ꞌlimmannioohit.”
41Ma ho, uduhaak Yeesu ĩnõõnnõ ĩĩnnĩk, “Baa aattĩg eeta ũgẽẽgĩ ꞌramma ꞌcĩg acuhana ꞌrabbẽẽt hĩ eet umwa. Acuhana umwaa ꞌdinaarꞌnya#7:41 ꞌDinaar: Haĩ ꞌrabbẽẽt cĩg eet cĩg ꞌRooma ꞌdinaar. Nẽ ũũppan ꞌrabbaacit hõdẽẽthõng ꞌcĩ haĩ ꞌdinaar ko, dtiic ꞌcĩ adũmaniini ẽẽtĩ ꞌcĩ adticanni kõr hõdẽẽthõng. ꞌmiiaꞌnya ꞌtur nẽ ucuhana umwaa ꞌdinaarꞌnya hẽẽn ꞌtur. 42Nẽẽthĩ, baa aꞌnyaman ĩhõõggõ ngaatĩ adũmanĩ, nĩngĩtĩ ũũnnĩkĩ baattĩ ꞌrabbeetu ĩhõõggõ, hiittiõõ hõllõngaa adũmanĩ. ꞌYioko eetinii ꞌcĩg ĩĩn ꞌramma ho, eet iina ꞌcĩ occa ammĩnan baattĩ ꞌrabbeetu gẽrrẽẽt?”
43Ẽdẽcĩ ꞌThimõõnẽ aĩ, “Hammuhi occa eet baa acuhana ꞌrabbẽẽt ꞌcĩg mẽẽlĩg, ꞌcĩ occa atalĩ ĩnõõnnõ gẽrrẽẽt.”
Nẽ ẽdẽc Yeesu ĩĩnnĩk, “Ẽbẽaneehi.”
44Nĩngĩtĩ ũũkõthõõthĩkĩ ngaa nicci nẽ ĩĩnnĩk ꞌThimõõnẽ, “Adtuuha nii ngaa icci? Nganĩngĩtĩ haduknaanĩ naa õlõ cunni ho, nga aꞌnyaa maam ꞌcĩg hacũũranĩĩ ꞌthoo. Nẽẽthĩ, ũtũũny ngaa ciee ꞌthoo cĩgannĩg tilaalõnĩ nẽ upuppuucan ĩmaa cĩgĩnnĩg. 45Nganĩngĩtĩ hakuuni, nga ꞌthaawaa nii nganĩĩta, nẽẽthĩ, ĩꞌthaawa ngaa cieeni nẽ nga ꞌthẽk ĩꞌthaayya noho. 46Nẽ nga ꞌduutika ngõõrrõ õõ caannĩ, nẽẽthĩ, udduutik ngaa ciee ngõõrrõ ꞌcĩ aꞌnyak muyuuk ꞌcĩ ẽmmẽdĩ gẽrrẽẽt ꞌthõõnĩĩ cĩgannĩg. 47Haduhaakii naa nganiita, atamaattiothoothĩk ꞌthẽccanẽẽta cĩgĩnnĩg ꞌcĩg mẽẽlĩg ko, hĩnĩngĩtĩ mĩnnan cĩnnĩ ꞌcĩ maka. Ẽẽtĩ ꞌcĩ ũũnnothoothĩk ꞌthẽccanẽẽta ꞌcĩg hidicig haaga, ẽtẽrꞌtha nẽẽ buúk mĩnnan ꞌcĩ hidici.”
48Nẽ uduhaak Yeesu ngaa nicci ĩĩnnĩk, “Atamaattiothoothĩk ꞌthẽccanẽẽta cugunnẽẽgĩ.”
49Ma athĩhĩ heerinniooha ũgẽẽgĩ ꞌcĩg baag arũmĩ hĩ ĩnõõnnõ nĩngaata thõõth icci ho, iita othoothito nyaagwaana ĩĩtõ, “Eet occa aattĩ gõõng iina ciee ammaannĩk eet ꞌthẽccanẽẽt ko?”
50Nẽ uduhaak Yeesu ngaa nicci ĩĩnnĩk, “Ẽẽlaii nganiit lemiiniti cunnẽẽnĩ. Bĩĩt lõꞌngõõc.”
Currently Selected:
ꞌLuuka 7: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.