ꞌLuuka 5
5
ꞌThooyyiak ꞌcĩg oou
(Tigiil Maatteeo 4:18-22; Maarko 1:16-20)
1Baa kõr umwa abĩlĩ Yeesu dẽmẽtaa cĩ bũlũc ꞌcĩ haĩ ꞌJẽnẽꞌtharẽt,#5:1 Bũlũc cĩ ꞌJẽnẽꞌtharẽt: Haĩ bũlũc icci ꞌthaar ũgĩ ꞌGalileea. alliman lothippiꞌnya ꞌcĩg õꞌngõnyõõnĩ ꞌgõõl ꞌcĩ auuni hĩ ĩnõõnnõ, hiita hĩthĩhĩt thõõth cĩ Nyekuci. 2Nĩngĩtĩ acĩnõõꞌthĩ nẽẽ haahũlĩt ꞌramma dẽmẽtaa cĩ bũlũcõ, ꞌcĩg baag ũũnnĩk ꞌgammiooha cĩg ulugoonnu ꞌcĩg baag nga ũũny nyelelewwaꞌnya cĩggĩĩng. 3Ma nĩngaata, õtõd haahũl cĩ eet umwa ꞌcĩ haĩ ꞌThimõõnẽ nẽ uduhaak ĩnõõnnõ hẽẽjẽhĩ haahũl hĩdĩĩc bũlũcatõõ. Nĩngĩtĩ iccioloonganĩ haahũlatõõ nẽ illiman eeta.
4Ma baa ẽdẽcaak thõõth, uduhaak ꞌcĩ ĩĩn ꞌThimõõnẽ ĩĩnnĩk, “Bĩtĩ haahũl ngaatĩ uuthiki bũlũca nẽ udhuheehu nyelelewwaꞌnya maamĩtõõ, hátĩ ꞌgaam ulugo.”
5Ẽdẽcĩ hinnia ꞌThimõõnẽ aĩ, “Makayyioohit, hĩttĩmatta aabaal haal, nẽ hiꞌthihi ꞌgii ꞌcĩ haggamma. Nẽẽthĩ, hĩcĩ aduha nii ho, ĩꞌnya mĩĩ nẽẽ hajanẽẽhĩ naa noho.”
6Ma baa adhuheek nẽẽg nyelelewwaꞌnya bũlũcatõõ ho, aggam hinnia ulugo ꞌcĩg mẽẽlĩg ꞌrĩng hiꞌthiattaaĩ herreecci nyelelewwaꞌnya. 7Nĩngĩtĩ avvaanĩ ꞌgõõnõgĩ ꞌcĩg baag aattĩg haahũlĩtĩ ũgẽẽgĩ, hiita heelito ĩhõõggõ. Ma nĩngaata, iita aarrik nẽẽg ulugo haahũlĩtĩ vẽlẽk, hĩbbĩt hĩcĩ aĩ hakuuyyia maama.
8Ma baa acĩn ꞌThimõõnẽ ꞌcĩ haĩ ꞌthaar ũgĩ Pẽẽtũrũ thõõth icci ho, akat huruꞌnyia muumaa cĩ Yeesu nẽ ĩĩ, “Makayyioohit, ma hakuu hõbõktõ hĩ nganĩĩta, hĩnĩngĩtĩ hĩĩnĩ naa ꞌthẽccannioohit.” 9Baa abulan ĩnõõnnõ hĩ ꞌgõõnõgĩ thõõth ꞌcĩ aggamĩ ulugo ꞌcĩg mẽẽlĩg ko gẽrrẽẽt. 10Nẽ ubulan ꞌgõõnõgĩ ꞌcĩg haĩ ꞌJeemith hĩ Yõaannẽ buúk gẽrrẽẽt. Baa ĩĩn cieeg lõhõlĩ cĩg eet ꞌcĩ haĩ ꞌThebedeeo.
Ma nĩngaata, uduhaak Yeesu ꞌThimõõnẽ ĩĩnnĩk, “Ma hiꞌngolli ꞌgii umwa, iꞌthianaanĩ kõr nicci, ulutu hatĩ gõõng nii eet hiita hĩthĩhĩt thõõth cĩ Nyekuci hĩgõõng aggami ulugo.” 11Nĩngĩtĩ agurraaki nẽẽg haahũlĩt cĩggĩĩng ko dẽmẽtaa cĩ bũlũcõ nẽ ũtũngteek ꞌgii vẽlẽk nĩngaata, nĩngĩtĩ anũĩ Yeesu.
Eet ꞌcĩ adak helleggeri
(Tigiil Maatteeo 8:1-4; Maarko 1:40-45)
12Ma baa nga aaĩ Yeesu ꞌtaaũna, uppwaanna eet umwaa ꞌcĩ adak helleggeri. Ma adtuuha ẽẽtĩ nicciee Yeesu ho, ẽttẽẽd looc muumaa cĩnnĩ nẽ ala ĩnõõnnõ ĩĩnnĩk, “Makayyioohit, má atabi, aaꞌnyaa hũbũna.”
13Nĩngĩtĩ ahumi Yeesu ĩnõõnnõ nẽ ĩĩnnĩk, “Hatabbii, bũna!” Ma hĩdĩĩkoothong, iꞌnginõõthĩ helleggeri.
14Nĩngĩtĩ ilootĩ Yeesu ĩnõõnnõ annẽẽkĩ, “Ma hõkõ haduhaahi eet umwa thõõth icci ũdũt. Bĩĩt teretheek paadĩr ẽlẽ cunni nẽ aaꞌnyĩhuu Nyekuc ꞌbaaninit hĩ baa aduha Mũũꞌtha, hátĩ hĩĩ terethiinit hĩ ĩhõõggõ ꞌcĩ aĩ, ũbũnauu niina.”
15Baa aalla ĩꞌthanothoothĩk nyeemuut cĩ Yeesu ho lõkõrẽẽt vẽlẽk noho. Nĩngĩtĩ au athĩknĩ eeta ĩnõõnnõ nẽ aaꞌnyĩk ꞌcĩg õmmõõrĩ hũbũttaathõ mooriꞌthioohĩĩ cĩggĩĩng. 16Nẽẽthĩ, baa gõõng õkõ Yeesu ꞌgoolliohĩĩ ũgẽẽgĩ ĩĩcĩg aayyi ẽmmẽn nẽ alaõ.
Aaꞌnyĩk Yeesu eet ꞌcĩ ahuuli hũbũna
(Tigiil Maatteeo 9:1-8; Maarko 2:1-12)
17Kõr umwa, baa nga alliman Yeesu eeta, iita Variꞌtheei#5:17 Variꞌtheei: Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ ẽlẽmĩ thõõth ꞌcĩ arũgnaanĩ daakiaha tarĩ nẽ elemit aajĩlẽẽt hĩ loriẽẽta. Tigiil ꞌBuuk cĩ Dtiicanĩ cĩg ꞌThooyyiahu 23:8. hĩ ꞌlimmanniook cĩg nyattaalak ꞌcĩg baag au olooyyiohĩĩ cĩg ꞌGalileea hĩ ꞌJudeea hĩ ꞌJeruꞌthalẽma nẽ iita aauto loota nĩngaata. Nẽ baa ammũdeek aaĩ ꞌtirriani cĩ Makayyiookto hĩ Yeesu ꞌcĩ aaꞌnyĩkĩ nẽẽ eet ꞌcĩg õmmõõrĩ hũbũttaathõ. 18Ma ho, uppwaatta eeta ũgẽẽgĩ ꞌcĩg irriongana eet ꞌcĩ alalliaa ẽlẽ lotoonwa nẽ ĩttĩmanit ngaatĩ adiim õõĩ ĩnõõnnõ ꞌcieetõõ hõõt haarrik ngaatĩ aayyi Yeesu. 19Nẽ hĩnĩngĩtĩ baa aꞌnyaman ĩhõõggõ ngaatĩ õõyyĩ ꞌcieetõõ hĩnĩngĩtĩ lothippit, otodit ꞌcieeth ĩꞌthõng lokor nẽ õõt erreccia hutuli umwa lokora nẽ õyõyyõõranit eet nicci lotoonwa noho, ĩꞌthõng hõdõlan nĩngĩtĩ ꞌcĩ aayyi Yeesu.
20Ma acĩn Yeesu lemiinit cĩnĩĩng ko, othoothĩk moorriahit ĩĩnnĩk, “ꞌGõõna, ũtũngtoothĩk nganiit ꞌthẽccanẽẽta cugunnẽẽgĩ.”
21Ammuk hinnia Variꞌtheei hĩ ꞌlimmanniook cĩg nyattaalak ꞌthinneetinii cĩggĩĩng aĩ, “Eet ꞌcĩ nganĩ ciee õdõõm Nyekuc ko? Nganĩ umwaa ꞌcĩ occa ammaannĩk ꞌthẽccanẽẽt? Nyekuc dioo ꞌcĩ occa ammaannĩhĩ.”
22Baa aga Yeesu muhẽẽnĩt cĩnĩĩng ko, nĩngĩtĩ ẽdẽcõõthĩkĩ ĩhõõggõ annẽẽkĩ, “Inni aꞌnyahit niig muhẽẽnĩt ꞌcĩ abathĩ ꞌthinneetinitõõ cugguung ko? 23Ĩꞌnya da hijinuunga, ammũjĩ thõõth inoo, ꞌcĩ hannẽẽkĩ eet, ‘Ũtũngtoothĩk ꞌthẽccanẽẽta cugunnẽẽgĩ,’ hode ngaatĩ hannẽẽkĩ, ‘Tĩnga bĩtõ?’ 24Nẽẽthĩ ꞌyioko, hatabi heterꞌtheekuung agaac ngaatĩ haꞌnyahĩ naa Ngeertĩ Eeto#5:24 Ngeertĩ Eeto: Avvĩ Yeesu ẽlẽ cĩnnĩ anneek Ngeertĩ Eeto, hĩnĩngĩtĩ ẽtẽrꞌtha nẽẽ aĩ, ĩĩn nẽẽ Krĩstõ nẽ ĩĩ habu cĩ habuccieet ꞌcĩ aalla ũdũt. Tigiil ꞌBuuk cĩ Danieele 7:13-14. ꞌtirrian ꞌcĩ hammaannĩkĩĩ eet, hĩnĩngĩtĩ ꞌthẽccanẽẽt cĩggĩĩng loota nĩnga.” Nĩngĩtĩ annẽẽkĩ eet ꞌcĩ alalliaa ẽlẽ ho, “Tĩnga bĩtõ. Thõhõt lotoonu cunni ho buúk.” 25Ma hĩdĩĩkoothong, ĩtĩnga ẽẽtĩ nicciee hẽbẽrẽẽnnĩĩ cĩggĩĩng vẽlẽk noho warac nẽ õthõhõt lotoonu nĩngĩtĩ õkõõĩ ĩĩcĩ olu adĩkthõõꞌthĩ Nyekuc ꞌjieena. 26Baa nẽ ubulan thõõth ciee lothippit niccia hũtũrũũr nẽ ĩdĩhĩthĩt Nyekuc ĩĩtõ, “Hĩcĩtta aattĩ kõr nicci ꞌgii ꞌcĩ gõõng nga hĩcĩtta hõdõõkõthĩ.”
Ũtũvva Yeesu ꞌLeevi
(Tigiil Maatteeo 9:9-13; Maarko 2:13-17)
27Ma uruta, ĩtĩnga Yeesu ũũk battaala nẽ udtuuha eet umwa ꞌcĩ haĩ ꞌLeevi#5:27 ꞌLeevi: Haĩ ꞌthaar cĩg ꞌLeevi ũgĩ Maatteeo, ꞌcĩ baa hikia hĩĩ ꞌthooyyiahit cĩ Yeesu. ꞌcĩ ĩĩn luttioohit cĩ occoro iccioloongan ngaatĩ dtiico. Ma ho, ĩĩnnĩk ĩnõõnnõ, “Nũaa nganĩĩta.” 28Nĩngĩtĩ ũũnnĩkĩ ꞌLeevi dtiic cĩnnĩ ho noho ꞌcõm, nẽ ũnũ ĩnõõnnõ.
29Nẽ baa ũũk aarĩhĩ ꞌLeevi Yeesu karrama cobbi gẽrrẽẽt õlõõ cĩnnĩ. Nĩngĩtĩ õõ aduhẽẽnĩ eeta ꞌcĩg alũt occoro hĩ eet ũgĩ buúk hĩ ĩhõõggõ. 30Ongoongoeek hinnia Variꞌtheei hĩ ꞌlimmanniook cĩg nyattaalak nuyyiook#5:30 Nuyyiook: Baa ĩĩn nuyyiooha eet ꞌcĩg ẽlẽmĩ ꞌlimman cĩ Yeesu nẽ ĩthĩhĩt ĩnõõnnõ. Baa ẽbẽra Yeesu nuyyiook õmmõtõ hĩ ꞌramma, hiita hĩĩtõ ꞌthooyyiak cĩgĩnnĩg. Baa ĩꞌthõ Yeesu ĩhõõggõ makaꞌthĩta hõõt hĩdĩmanit thooꞌthiok ꞌcĩg ĩnaat eeta nẽ illimanit eet nyeemuut ꞌcĩ abũnnaa cĩ Yeesu. cĩg Yeesu nẽ ijinit ĩĩttĩk, “Aduheennu gõõng hĩ eet ꞌcĩg alũt occoro hĩ ꞌthẽccanniook hõdẽĩ inni?”
31Nẽ ẽdẽc Yeesu ĩhõõggõ ĩĩnnĩk, “Hõllõngaa eet ꞌcĩ abũnnaa ꞌcĩ adiim akĩĩm, nẽẽthĩ, eet ꞌcĩ õmmõõrĩ ꞌcĩ adiim ĩnõõnnõ. 32Baa hõllõngaa hakuu naa, hĩnĩngĩtĩ eet ꞌcĩg abũnnaa. Hakuu naa hikia hẽẽla ꞌthẽccanniook hũtũngteek ꞌthẽccanẽẽt cĩggĩĩng.”
Ijinit eeta Yeesu ꞌgõõl ꞌcĩ ẽdẽtaanĩ eleeti
(Tigiil Maatteeo 9:14-17; Maarko 8:18-22)
33Nẽ ijinit nẽẽg Yeesu tarĩ ĩĩttĩk, “Hacĩnna naag nuyyiook cĩg Yõaannẽ hõdõõkõthĩ ẽdẽta eleeti ꞌgẽẽna#5:33 Ẽdẽta eeta eleeti ꞌgẽẽna: Baa gõõng ẽdẽta eeta cĩg ꞌJudeei eleeti ꞌgẽẽna waathinnioohĩ ũgẽẽgĩ, halayyiõõĩ eleeti cĩggĩĩng hĩ Nyekuc. nẽ alayyio gẽrrẽẽt. Hacĩnna cĩg Variꞌtheei buúk adĩman noho nẽ aalla aduhi cugunnig nẽ uhuddi hõdõõkõthĩ noho inni?”
34Ẽdẽcĩ Yeesu anneek, “ꞌYioko niig occa aaꞌnyiku heerinniook cĩg nyattaraanak hedettia eleeti hatĩ nga arũmĩ nẽẽg hĩ nyattaraan? 35Nẽẽthĩ, aku hatĩ kõrra ꞌcĩ aggamiaanĩ nyattaraan hĩ ĩhõõggõ, waathinniook tĩko thĩ ꞌcĩg hatĩ ẽdẽtaanĩ nẽẽg eleeti.”
36Nĩngĩtĩ aduhaakĩ nẽẽ ĩhõõggõ thõõth ꞌcĩ awantoothĩk ko anneek, “Aitiõõ ẽẽtĩ ꞌcĩ occa attiha cẽrẽm ꞌcĩ ĩĩn ngeju nẽ uhubeek ĩcĩ ũnũũk tõõ. Nẽ má ĩdĩman noho, occa hinnia ẽrrẽẽc nẽẽ cẽrẽm ꞌcĩ ĩĩn ngeju ho. Nẽ aitiõõ haburkẽcĩ ꞌcĩ ĩĩn ngeju ho hõllõngaa õõkõrõõ hĩ ꞌcĩ ũnũuk ko. 37Nẽ aitiõõ ẽẽtĩ ꞌcĩ occa adũddeek mẽrtĩ cĩ viinoo ꞌcĩ nga ĩĩn ngeju hutubaawa ꞌcĩ ũnũũk#5:37 Hutuba ꞌcĩ ũnũũha: Haarĩk naag mẽrtĩ hutubaawa, nẽẽthĩ, baa alũũlla eeta cĩg ꞌJudeei cẽrẽm cĩ eetho nẽ utududdeek mẽrtĩ cĩ viinoo. Baa õthõõth Yeesu thõõth cĩ ꞌlimman cĩnnĩ ꞌcĩ ĩĩn ngeju, baa ĩthakꞌtheek nẽẽ ꞌlimman cĩnnĩ mẽrtĩ ꞌcĩ ĩĩn ngeju cĩ viinoo. tõõ. Nẽ má ĩdĩman noho, occa hinnia hatĩ alib mẽrta ꞌcĩ ĩĩn ngeju ho hutuba. 38Occa ꞌthẽk aarĩhoothĩk mẽrta cĩ viinoo ꞌcĩ nga ĩĩn ngeju hutubaawa ꞌcĩ nga ĩĩn ngeju buúk. 39Nẽ aitiõõ ꞌthẽk ẽẽtĩ ꞌcĩ occa accamana mẽrtĩ cĩ viinoo#5:39 Mẽrtĩ cĩ viinoo: Ĩthakꞌthoothĩk mẽrta cĩ viino ꞌcĩ ĩĩn ngeju nyeemuut ꞌcĩ abũnnaa cĩ Yeesu nẽ ĩthahĩthoothĩk mẽrta cĩ viinoo ꞌcĩ ũnũũk nyattal cĩ Mũũꞌtha. Baa gõõng itiangĩth eeta cĩg Ĩꞌthĩraẽlĩ mẽrtĩ cĩ viinoo occa aalla irkit hõdẽĩ hode irkiꞌnyia ꞌramma. ꞌcĩ nga ĩĩn ngeju hĩllõõan ꞌcĩ ĩĩ ĩtĩba tõõ. Õthõõth hatĩ nẽẽg aĩ, ‘Ĩllõõan ĩtĩbaaĩ.’ ”
Currently Selected:
ꞌLuuka 5: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.