ꞌThianaattõ 7
7
Ũcũda Nyekuci eet maamĩ
1Ma ho, uduhaak Makayyioohiti Nõõa ĩĩnnĩk, “Nganiit dioo ꞌcĩ hammũdaannii loota nĩnga vẽlẽk ngaatĩ ĩĩnnĩ eet ꞌcĩ abũnnaa. Uduhunit haahũlatõõ hĩ õlõ cunni vẽlẽk. 2Bĩtĩ idiꞌngwa ꞌcĩg tẽllĩg ꞌcĩg occa ĩĩn ꞌgaarriẽẽn, hĩ ꞌramma hĩ ꞌramma tabattĩ tũkĩramma, hõkõõcan thõng, ꞌcĩ ngayyi hĩ ꞌcĩ maacĩ. Nẽ ũũhĩ idiꞌngwa hĩ ꞌramma hĩ ꞌramma idiꞌngwaanĩĩ ꞌcĩg hõllõngaa tẽllĩg,#7:2 Idiꞌngwa ꞌcĩg tẽllĩg hĩ idiꞌngwa ꞌcĩg hõllõngaa tẽllĩg: Baa aduhaak Nyekuci Nõõa hũũhĩ idiꞌngwa ꞌcĩg tẽllĩg hĩ ꞌramma hĩ ꞌramma tabattĩ tũkĩramma, hĩnĩngĩtĩ abũnnaa idiꞌngwaana tĩko ngaatĩ hadahĩ hĩ ngaatĩ hĩwaadĩ hĩĩ ꞌgaarriẽẽn. Nẽ tarĩ uduhaak Nyekuci Nõõa hũũhĩ idiꞌngwa ꞌcĩg hõllõngaa tẽllĩg hĩ ꞌramma hĩ ꞌramma tabattĩ hõdẽẽthõng, hĩnĩngĩtĩ hõllõngaa occa adaki nẽ hõllõngaa occa ĩwaaddi hĩĩtõ ꞌgaarriẽẽn. ꞌcĩ ngayyi hĩ ꞌcĩ maacĩ. 3Nẽ tarĩ, bẽra hĩbaallĩ õmmõtõ hĩ ꞌwec ꞌcĩg aattĩg cũũmõ cũũmõ, ꞌcĩg ngayyig hĩ ꞌcĩg maacĩg. Dĩman hĩcĩ haduhaakii naa ho, hátĩ hiita hittirit idiꞌngwaana cieeg urutaa ꞌcĩ ũmmũlũũnyattĩ maama looc. 4Hĩꞌthõõa hatĩ naa tammu ꞌcĩ maka gẽrrẽẽt urutaa cĩ waathinniook tũrkĩramma, ꞌcĩ hatĩ aku atĩĩlĩ waathĩn hĩ baalin waathinniook hẽẽn ꞌwec, ĩꞌthõng hũcũda hẽlẽggĩ baag hẽhẽnyta naa loota nĩnga vẽlẽk hĩĩ ꞌthĩĩ.”
5Nĩngĩtĩ adticanĩ Nõõa thõõth ꞌcĩ aduhaak Makayyioohiti ho vẽlẽk jurrung.
6Baa ĩĩn Nõõa irkiꞌnyia ꞌmiiaꞌnya tõrkõnõn (600) baa aku ammũlũũnyan tawanĩ looc. 7Nẽ baa Nõõa dioo hĩ ngaa cĩnnĩ hĩ buul cĩgĩnnĩg hĩ ngaaĩ cĩggĩĩng, ꞌcĩg baag aduhun haahũlatõõ, hátĩ hĩlĩĩttia tawan. 8Nĩngĩtĩ adukni idiꞌngwaana ꞌcĩg tẽllĩg hĩ ꞌcĩg hõllõngaa tẽllĩg, hĩbaallĩ hĩ hẽlẽggĩ ꞌcĩg õvvõ loota haahũlatõõ. 9Baa aduhun nẽẽg haahũlatõõ hĩ ꞌramma hĩ ꞌramma, ꞌcĩ ngayyi hĩ ꞌcĩ maacĩ, ꞌgõõlaa ĩbaa aduhaakĩ Nyekuci Nõõa. 10Ma urutaa cĩ waathinniook tũrkĩramma, ikia tawanĩ ꞌcĩ ammũlũũnyan looc hĩĩ ꞌthĩĩ.
11Nẽ baa ĩĩn Nõõa irkiꞌnyia ꞌmiiaꞌnya tõrkõnõn (600) baa iꞌthianaanĩ tammu. Ma baa ĩĩtõ waathinniooha õmmõtõ hĩ tũrkĩramma, nyĩlõk ꞌcĩ ꞌramma irkit niccia, iita ubbuukti ũꞌngĩ cĩg hidiowweenu nẽ ulubta maama nẽ iꞌthianaaĩ ĩtĩĩl tammu cobbi gẽrrẽẽt buúk. 12Baa atĩĩlĩ tammu baalin hĩ waathĩn, waathinniook hẽẽn ꞌwec habath lõõcĩ dtẽc.
13Ma kõr niccia, iita uduhunit Nõõa hĩ ngaa cĩnnĩ hĩ buul cĩgĩnnĩg ꞌcĩg ĩĩn iyyio ho, ꞌThẽm hĩ Haam hĩ ꞌJavẽth hĩ ngaaĩ cĩggĩĩng haahũlatõõ. 14Baa aꞌngĩdeek nẽẽg idiꞌngwa cĩg olu hĩ cĩg moru hĩ hĩbaallĩ hĩ hẽlẽggĩ ꞌcĩg õgõlĩt loota vẽlẽk, baag ẽbẽra nẽẽ ho haahũlatõõ buúk. 15Nĩngĩtĩ aduknõõthĩkĩ idiꞌngwaana Nõõa hõdẽĩ hõdẽĩ, ꞌcĩ ngayyi hĩ ꞌcĩ maacĩ haahũlatõõ. 16Ma baa uduhunit idiꞌngwaana haahũlatõõ hĩ baa aduhaak Nyekuci Nõõa, ikia ũꞌnyũũg Makayyioohiti Nyekuci hattũũg cĩ haahũlõ.
17Baa atĩĩlĩ tammu waathinniook ꞌcĩg ĩĩn hẽẽn ꞌwec ko, baalin hĩ waathĩn ĩꞌthõng hĩbbĩtĩt maama looc, hataadĩ haahũlĩ lokora. 18Ma baa iita ittoorri maama loota gẽrrẽẽt, ikia ataadĩ haahũlĩ maamĩ lokora. 19Ma baa uruta, iita ũmmũlũũnyanit maama muurriok vẽlẽk, 20nẽ aalla õtõd noho ĩꞌthõng hĩttĩmattĩ hõdõlanit ꞌthoo hẽẽn ꞌramma muurriõhĩ hujjieen. 21Nĩngĩtĩ acũdaanĩ maama nicciag eet vẽlẽk hĩ idiꞌngwa cĩg moru hĩ hẽlẽggĩ cĩg olu hĩ hĩbaallĩ hĩ hẽlẽggĩ ꞌcĩg õvvõ loota vẽlẽk hĩĩ lõõcĩ ꞌthĩĩ. 22Nĩngĩtĩ adaaknĩ hẽlẽggĩ vẽlẽk baag abbeek Nyekuci ꞌlaũk habath dtẽc. 23Ma nĩngaata ikia ũcũda Nyekuci hẽlẽggĩ baag ẽhẽnyta nẽẽ vẽlẽk, nĩngĩtĩ ũũnnĩkĩ Nõõa dioo hĩ õlõ cĩnnĩ hĩ idiꞌngwa hĩ hĩbaallĩ baag õkõõĩ nẽẽ haahũlatõõ.
24Baa aalla maama ꞌcĩg ammũlũũnyan looc ko waathinniook ꞌmiia hõdẽĩ hĩ hẽẽn ꞌtur (150).
Currently Selected:
ꞌThianaattõ 7: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
